حاجة تَبَكُي يا ناس: الذهب السوداني إماراتي؛ والصمغ العربي السوداني إماراتي كذلك!

* إذا أشِرت إلى عملاء دولة الإمارات في السودان (وما أبغضهم!)، إحتج المعلقون (الما ناقشين) والكتاب الإنتهازيون العملاء بالانتساب.. تخوين! تخوين! بينما الإمارات تحلب من ضرع السودان كي تضاف قوتها الاقتصادية المهولة، وزيادة..
* قالت المهندسة غادة ساتي،العضو المنتدب لمصنع الصمغ العربي السوداني بالمنطقة الصناعية بالحمرية بالإمارات، عقب التوقيع على اتفاقية إقامة مصنع لإنتاج بدرة الصمغ العربي (السوداني) المجففة رذاذياً.. وأن إقامة المصنع تلبي الطلب العالمي المتزايد لبودرة الصمغ العربي كسلعة إستراتيجية، لا سيما بعد الإتجاه العالمي للإنتاج الغذائي الخالي من الإضافات الكيميائية..
* لا يقتصر الطلب المتزايد للصمغ العربي (السودان) على الأغذية فقط، إنما يتعداها إلى صناعة الأدوية ومواد أخرى بدلاً عن المكونات الكيميائية المشاركة في تصنيع تلك المواد..
* وللعلم، فإن دولة الإمارات تصدر الذهب السوداني، وكأنها دولة منتجة للذهب.. والإمارات ثاني دولة مصدرة للصمغ العربي (السوداني)، وكأنها منتجة كبيرة للصمغ السوداني!!
* كتبت مقالاً في أبريل ٢٠١٧، نشرته عدة مواقع إلكترونية، تحت عنوان:- ( إمبراطورية أشقاء
البشير تتمدد! ..)، أشِرتُ فيه إلى أن من أقاموا المصنع هم: علي حسن أحمد البشير وعباس حسن أحمد البشير وعبدالله حسن أحمد البشير، وشريكهم، عبدالباسط حمزة..
* ويطلق على هؤلاء الأربع شركاء ( عصابة الأربعة عِينات) لأن اسم كل منهم يبدأ بحرف العين.. ولأن شراكاتهم ( كعصابة) كانت تمتد إلى كل شيئ ذي قيمة في السودان، سلباً لموارد البلد..
* وقد تطرقتُ إلى سوء إدارة موارد السودان بإهدارها على ذلك النحو الخام، دون الاستفادة من القيمة المضافة، خاصة وأن الصمغ سلعة إستراتيجة لاينبغي أن يتم هدرها، على أية حال..
* ويجدر ذكر أن أمريكا حظرت التعامل الإقتصدي مع السودان وقتها، تماماً، لكنها استثنت استيراد الصمغ السوداني الذي لا بديل له، وإلا توقفت آلات بعض الشركات الأمريكية الكبرى عن الدوران..
* وبالأمس، وصلتني الرسالة أدناه، فأثارت المواجع، إذ جاء فيها:-
"" لا_سلم_الله_الامارات
تعال اوريك مشكلة الامارات معانا شنو عشان ما تكون مغيب بأمر الاحزاب العميلة!
في 2017 تم الاتفاق علي انشاء مصنع لمعالجة وإنتاج «بودرة الصمغ العربي المجففة رذاذياً» بقيمة استثمارية تصل إلى 55 مليون درهم (15 مليون دولار) بطاقة إنتاجية تصل إلى 8 آلاف طن سنوياً
وللعلم الامارات ثاني دولة في العالم في تصدير الصمغ العربي (اقسم بالله جد) ما تطيّروا لي عيونكم.. شجرة هشابنا دي ملك للامارات كيف ما عارف
اها الامارات بقت تدخل دولار تقيل من وراء الصمغ ده ، كوكاكولا تدفع وبيبسي تدفع ديل خليهم كل شركات الاغذية في العالم تدفع ياخي ديل ذاتهم خليهم شفتوا الادوية وكبرى شركات الادوية في العالم المالكة للمصانع الضخمة بتدفع للامارات في صمغنا ده
ده صمغ بس تعال شوف الذهب 🙂🙂🙂🙂🙂 ما داير اقول أرقام ما بتصدقوني ولا شيء
وبعد ده يجيك واحد يقول ليك الامارات دي دايرة مننا شنو بتدعم في المليشيات وتشتري في السياسيين ؟؟
يا (با) الامارات دي قامت من خيراتك انت قامت من جبال الدهب ودولارات الصمغ قامت من فانوس علاء الدين السحري العندنا ده الاهلها ما قادرين يطلعوا المارد الفيه الا للاجانب 🙂
اها انت في رايك الامارات تضحي بي تريليونات الدولارات دي عشان انت يا مواطن تنعم بالراحة والامان مالها ومالك؟
قال لا للحرب قال نحن ما بنحارب في ابناء الوطن نحن بنحارب في الخارج لاجل الوطن ده يا بليد
لا سلم الله الامارات وعملاء الامارات ومليشيا الامارات
كفاية انو بعض الجنجويد بقاتلوا في جيشك بي كاكي الامارات وللاسف عليه علم الامارات يا بليد يا مسطح يا مغيب
السيسي الكعب ده زاتو في 2019 اكد انو ابو ظبي تتحرك لاستبدال الجيش السوداني بمليشيات.
الموضوع ما البرهان وحميدتي زي ما بحاولوا العملاء يختزلوا ليك الصراع ده في شخصيات الموضوع موضوع استعمار بالوكالة يا نايم الموضوع استنزاف دولة وافراغ مواردها و ده ما ببقي الا بكسر سيادتها ولعلمك مافي دولة في العالم بتجتهد معاك في شي الا اذا عندها مصالح عندك وعقلك في راسك تعرف خلاصك يا مواطن .
*#لا سلم الله_الامارات*"""
____________
* إنتهت الرسالة، ولكن عملاء الإمارات لا زالوا يكابسون للعودة إلى الإتفاق الإطاري لتحقيق المدنية، تحت رعاية حميدتي، رافعين راية الجنجويد..

osmanabuasad@gmail.com