بسم الله الرحمن الرحيم
ريتا
كلبان صغيران كانا يلعبان في الشارع امام ناظري ريتا والدتهما كلبة عمك عباس , وهي كلبه قديمه بالحي يعرفها السكان وتعرفهم بل وتحترمهم ويحترمونها , والغريبه بتفرز الزول الغريب الجايبو الدرب من الزول الغريب الجايبو للحله غرض معين , واذا رأت احد سكان الحي تأرجح (ضنبها ) وهي متوسده يدها اليسري دون ان تتحرك تعبيرا علي رد التحيه , يوم عمك بشاره جا داخل الحله ريتا هزت ضنبها ونظرت اليه ( بالجمبه ) عمك فهم انها تقول بعينيها ( عرفتك ) ياحليلك بقيت تدخل الحله زي الضل صوت ماعندك , زمان صوتك من طرف الشارع يوصل قبالك وتجي شايل الاكياس التقيله وشفعك يجوك جاريين يسلموا عليك ويشيلوا معاك الاكياس ,تقوم تتضاري بالجريده من الشمس وانت في طريقك للبيت , اسي ياكافي البلا كيس (دهني ) ما بتجي شايلو والشمس لافحاك وانت ماحاسي , صغارك حتي لوشافوك مابجوا عليك , كيسك فاضي والزمن غيرك وحيرك , تقوم ريتا من مكانها وتجري نحوه مرحبه في محاوله لرفع معنوياته وتعبيرا عن ان بالحي من ينتظر قدومه , يربت علي رأسها بيده المنهكه , تلحس بطرف لسانها اطراف اصابعه , يبتسم قائلا , ياريتا يعني اتوضأ تاني ؟ ويضحك مواصلا انا علي وضوء بس ياريتا ؟ انا علي كتييير, ويضحك , تعود ريتا وتتمدد في مكانها من جديد تراقب لعب طفليها , واحد اسود حالك والتاني اسود بابيض , اولاد ريتا يزيجيران وينبحان بصوتيهما الخافتين ( عاملين ضكور ومتحنفشين ) ويتابعانه بالنباح المباح ,وهو يكبر فيهما نباحهما ويردد من حقكم ان تعبروا بالصوت العالي عن دواخلكم , ريتا تطلق نبحات متقطعه , التفت اليها وقال ليها شكرا ياريتا , سامعك قلتي ليهم ماتنبحوا فيهو , انتوا احسن منو بشنو ؟ مازيكم وواحد , كتر خيرك ياريتا يا اختي ,, ثم يأتي ويجلس القرفصاء جوار ريتا علي قارعة الطريق , ودخل معها في ونسة , قال ليها والله ياريتا الواحد بقي لو مالقاك في الشارع ده يقول دي ماحلتنا , الناس كلها اتغيرت , باعوا بيوتهم وطفشوا الخلا , وواحدين مشوا مصر اشتروا شقق سكنوا في واحده واجروا واحده وعايشين في امانة الله , والحله اتملت اغراب لابعرفونا لا بنعرفهم ولا بسالمونا , انت ياريتا يا اختي كلب الناس السكنوا في البيت العالي داك بسلم عليك ؟ ريتا هزت ضنبها وعاينت لي اولادها , عمك قال ليها معقول ؟ بالغت ياريتا ! ديل اولادو ؟ وانا اقول اللون الابيض ده الجريو التاني ده جابو من وين ؟ واسي بصرف عليكم ولا عمل عملتو وزاغ ؟ ريتا تتسأب ثم تقفل ( قدومها ) عمك بدهشه بالغه 000 بالله 0000 العضم البخربشن فيهو وليداتك ده جابوا ليكم هو ؟ لكن ماكلفوا شئ , من دقنوا وافتلوا 00 يعني جابوا ليك من هولندا ! ماخمشوا من البيت , وهو سيد البيت زاتو داقي في العضم حجر دغش ! ربك ياريتا بدي الجنه , اسمعي ياريتا نسابتك ديل ماعندهم لي كلبه في العشرينات كده ومتعلمه ؟ مستعد اسكن معاهم , ريتا قامت حيله ومشت علي اولادها (لحستهم ) وجات رقدت تاني , عمك قال معليش ياريتا يعني لو مالحست مابدوني ؟ نسابتك ديل ناس اللحسوني اب لسان ولا شنو ؟ ريتا جرت الي طرف الشارع نبحت شديييد ورجعت رقدت في محلها جوار عمك 0
بعد شويه عمك يسمع قوم فوق 000افتح خشمك قول أه , عمك قام حيلو وقال بالغت ياريتا , حتي انت , والله طول عمري قايلك قاعده في الحله دي ساااي عاطله , اتارييييك0000 وانا اقول صحتك اتصلحت فجأه 00000
سلكتد
لو راجي النيل يرجع للمنابع حاترجي الدهر كلو
والي لقاء
سلك
