بسم الله الرحمن الرحيم
في السلك
• طرنا
• دي الحقيقه
• البقت بقت
• لكن افتكر الوكت مناسب للحديث بصراحه
• حاجه نخاف عليها مافضلت
• ياناس
• المثل بقول تطلع من بيتك حزين تلاقي الفرح عند مين
• نحنا طلعنا من بيتنا والحزن نقيم له سرادق
• حانفرح وين !
• استهتار
• فشل معسكر الاعداد
• برغم تصريحات هاشم الزبير
• الآن ندفع ثمن عدم الانضباط البدا معانا منذ بداية الموسم
• تخيلوا
• المريخ خارج المجموعات
• يخرج من فريق سيكون اضعف فرق المجموعتين
• سينهزم خارج ارضه بالستات
• وينهزم داخل ارضه بالتلاتات
• ليؤكد للجميع ان المريخ هان
• هان يارجاله بالانجليزي
• و هان بالاستهتار
• ايها الناس البقت بقت
• تصالحنا وشجعنا ونفخنا
• ولكن كان النفخ في قربه مقدوده
• قداها الاستهتار وعدم الجديه
• النفطي سافر
• النفطي جا
• لاسانا في مالي
• وناس يقولوا في الجريف
• والمعسكر الاعدادي شغال
• يجب التصحيح منذ الآن
• وطالما سافرنا بطائره خاصه
• يجب ان نوجهها زي مادايرين
• كلموا الكابتن
• نحنا عندنا مشواير
• غاشين لينا كم غشوه كده
• اول بالتبادي
• من النيجر علي مالي طوالي
• عندنا زول ينزل
• لازم ينزل
• مادايرين معاهو
• ومن هناك عديييييييييييييييل تونس
• في زول نازل
• اولادو وعفشو بنلحقهم ليهو
• ومن تونس عندنا مشوار طويل
• البرازيل
• ننزل الجاليه البرازيليه العامله لينا زحمه دي
• علي الاقل الطياره تفضي
• باقي الجاليه الهنا يرجعوا بالمواصلات
• ومن البرازيل علي عطبره عدل
• قرصه صغيره
• في زول نازل
• ومن عطبره ماعارف حانكتر السفريات الداخليه ولا لأ
• او ننزل الطياره في الكبري الجديد
• ومن هنك كل زول ركشه
• واهلوا عدل
• ياناس
• المحترفون
• نفطي ولا سانا ووارقو وغاسا
• افادونا بي شنو !
• اضافوا لينا شنو !
• ضرورتهم شنو لما يعجزوا عن حسم فريق يمكن ان ينهزم عادي في دار الرياضه امدرمان
• علل
• خصموا من قروشنا
• وخصموا من رصيد اعصابنا
• المريخ ما نقاطه
• ولا جنينه وسيدها نايم
• ياناس
• النفطي مدتو منتهيه
• بلعب من زمن بو رقيبه
• اتذكر بو رقيبه مده رقبتو طوووويله
• وقال النفطي دائما لعاب
• ما دائما يا بو رقيبه
• لما مدتو تنتهي بقعد عاله
• لاسانا لايحترم اسس الاحتراف
• كل البعرفو كل يوم يسمن زياده
• ويزوغ من بداية الاعداد
• ووارقو ده عربيه ماعندنا ليها شوارع
• اما غاسا
• نهديه مركوب جنينه قطع
• كراعو الكبيره دي
• وحفلة وداع
• شجعنا
• وهللنا
• وقلنا لامستحيل امام الزعيم
• لان الزعيم عودنا علي ذلك
• لكن انكشف المستور
• نحن امام جيل مؤمن بان اقل الانجازات مستحيل
• ياناس
• الجيش لعب بي مهاجم واحد
• سفاري هو سفاري
• وطارق مختار هو طارق مختار
• والمهاجم يهدي لهما كل واحد هدف
• امال لو الجيش لعب باربعه مهاجمين كان عملتوا شنو يا ملوك الدفاع !
• اعصابنا بايظه
• وعلي العليها نقل المباراه بوظها زياده
• تخيلوا
• افضل الناس حركه فيصل العجب
• تخيل مستوي لياقة الآخرين
• تقول لي اسماعيليه يا هاشم !
• غايتو النفطي ده ماتونسي
• تونسيه عديييييييييييييييل
• تشكيله زي وضاية الجامع
• كلها مواسير
• بعد ده تيمم ساااااااي
• مادايرين ولا نقطه مويه
• السيد الحكم لعب بتكتيك افضل من الذي لعب به كاربوني
• شفتوا الحكم لما انهي الكوره جري كيف !
• والغريبه ما كانت محتاجه لحكم
• النفطي
• عافين ليك قروشنا لو قطعت وشك
• حال الزعيم هو نفسه الحال في الموسم الماضي
• بس كان ايداهو بطلعنا من الحرج
• تتذكروا السنه الفاتت ضد الفريق اليوغندي !
• هناك مرقنا ايداهور بمجهود فردي
• وهنا مرقنا بالتعادل بهدف مجهود فردي من ايداهور
• ولما رحل ايداهور انكشف المستور
• غايتو لجنة التسجيلات القادمه راجيها جنس شغل
• حقوا يفتشوا من اسي
• تلاته حراس
• اتنين مدافع متأخر
• اتنين مساك
• اتنين صانع لعب خفاف وصلحو
• اتنين محاور جامدين
• عشرين مهاجم صريح بدل ايداهور
• ودائرة كره
سلك كهربا
وريني سبب واحد ننساك بيهو
والي لقاء
سلك
babikir maki [b_silik@hotmail.com]
