خارج النص
26 يوليو 2021م
نعم نعم نعم لإصلاح هياكل الدولة المُهترئة…
قبل فترة قصيرة تناقشت مع أحد الإخوة، بأن لا حَل لمُشكل السودان سِوَى مُبادرة مولانا السيد محمد عثمان الميرغني، مُرشد الطريقة الختمية وزعيم الإتحاديين (الوفاق الوطني الشامِل).. نطَّالي في حلقي.. تاني مافي وفاق ولافي إتِّفاق.. في (بَلْ) بس!!!
سألتُو تبلُّو منو؟
قال لي نبِل الكيزان…
ضحكت وقرقرت حتى فزعت كديسة كانت نائمة بجواري وطارت جدادات –حقيقية مُو إليكترونية- كانت متابعة للحوار بِنَهم.. (التعبير لشاعر السقَّاي خليفة حُسين)!!!
إيهْ نَانْ يا الغبيان دا كيزان شنو البتبلَّهُم وهُم الحاكمين والمتحكِّمين في الدولة دي.. وبي صفَّهم الثالث والرابع كمان!!! ودار الحوار التالي بيننا، قُلت ليهُو:
سمعت ليك بي كُوز إتحاكم؟؟ قال لي: لَعْ!
شُفت ليك قط سمين دخلوهو السجن؟؟ الإجابة: لَعْ!
قروشنا الكانُوا قاعْ يبشرونا بيها أيام سُواقة الخلا الـ 64 مليار دولار رجعت؟؟ الإجابة: لَعْ!
قَتَلة الأُستاذ أحمد الخير (رحمه الله) أعدموهم؟ الإجابة: لَعْ!
قُلت ليهُو يا اخوي مادام إجاباتك دي كلها (لعْ = لا = لأااااا) إذاً إنت سايْقِنَّك بالخلا ومستخدمين معاك ومع غيرك سياسة الإلهاء ليس إلاَّ!!!
– الحل يا عزيزي الفاضل يكمُن في الوفاق الوطني الشامل الذي لا يقصي أحد…
– الحل في محاربة الفساد والضرب على يد القطط السمان والرأسمالية الطُفيلية الخانقين البلد…
– الحل في إزالة ثلاثي الشر الفاشل وتوابعهم من أحزاب الفَكَّة المُحيطة بهم…
– الحل في تقديم الكفاءة الوطنية الصادقة.. وتأخير الرخيصين وساسة الساعة 25 الجُدُد..
– والحل وأم الحلول هُو في إقامة دولة القانون والمؤسسات ومحو الدولة الفاشية المُستبِدَّة…
غير كدة حا تِتْبَلَّ إنت آ اخوي (وتطُول إقامتك في مهجرك دا) وحا يِتْبَلَّ الشعب السوداني المغلوب على أمره.. وينعم الفَشَلَة والرخيصين ديل، مستمتعين بخيرات بلدنا المنهوبة من ذهب وثروة حيوانية ومعادن!!!!
*خارج النص:*
الدكتور عبد الله حمدوك رئيس مجلس الوزراء الإنتقالي يوم الثلاثاء 22 يونيو 2021م أطلق مبادرته الشهيرة (تحصين المسار) وأعلن فيها تكوين المجلس التشريعي أحد أضلع الحكومة (المغضوب عليها) خلال شهر واحد كموعد أقصى!!! الآن مرَّ شهر وأربعة أيام ولا مجلس تشريعي ولا رئيس قضاء ولا جيش وطني مُوحَّد ولا يحزنُون، بل البلد جارِّي لا تِحِت وغاتسي في كركِيَّة الفقُر والجُوع والمسغبة!!!
شخصياً أرى أن تكوين مجلس تشريعي بالتعيين سيكون عالة وعِلَّة وزيادة عِبْء على إقتصاد البلد المُنهك وسيكون (سيم سيم) مجلس المؤتمر الوطني المُعيَّن سابقاً، العضو فيه ينوووووم في الجلسة ويبصُم في نهاية (دَقستُو دي) على مُخرجات العرَّاب الكبير، ويستمتع ويقُش خشيمُو بي مُخَصَّصات العضو النائب!!!
إذاً لا حل يلُوح في الأُفُق بعد فشَل حكومة الإنقاذ2 دي.. سوى الوفاق الوطني الشامل.. فهُو المخرج الأكيد لجميع أزماتنا السياسية والإقتصادية والعدلية.. اللهم هل بلَّغت اللهم فاشهد…
.
.
.
*ويظل سؤالنا الدائم.. البلد دي السايقها منووووووو؟؟؟*
*+ يا ربي صلاح منَّاع (بتاع لجنة التمكين) تمكَّن من قبض الدكتورة هبة الهاربة من عدالته ولَّة لسَّع؟؟؟*
*++ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟؟*
*وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟؟!!!*
jamal.trane@gmail.com
