سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• لا نبكي علي اللبن المسكوب
• ولا نتباكي
• ولا نعرف النحيب
• عيوننا لاتعرف للدموع الا معني واحد
• هو دموع الفرح والانتصار
• ولكننا نحزن بعمق
• لانتعامل بانفعال وردود افعال
• ولكن لانفوت اسباب الانكسار
• بالذات اذا تكررت
• اسباب الخروج من البطوله الافريقيه كتيره
• حسب وجهات النظر المختلفه
• ولكن يمكن اجمالها واختصارها في اسباب محدده
• ومتشابهه
• ومتكرره
• نحزن بعمق
• نعود ونصالح ونتصالح من اجل المريخ
• وننسي ماحصل
• نأمل في مستوي متطور من اسباب الاخفاق
• نحلم بتغيير سلبياتهم الي ايجابيات
• ونقع في نفس الفخ
• ثم نعود لنصالح ونتصالح مع اسباب الهزائم
• نحنا شفووووت
• لابنحارب المريخ
• ولا بنقاطع المريخ
• ولا بنسكت علي اسباب العله في المريخ
• المابشبهنا ماحبابو
• ايا كان
• ومهما كان تاريخيه
• لان التاريخ لو كان يشفع ويؤهل للبقاء في الكشوفات
• فكمال عبدالوهاب اولي الناس بالبقاء في الكشوفات
• وحامد بريمه وعاطف القوز وكمال وكل جيل مانديلا
• كانوا احق الناس بالبقاء في الكشوفات
• ايها الناس
• اذا انتهت المدة الافتراضيه يبقي مفروض نتعامل مع تلك الحقيقه بعقلانيه
• الدواء اذا انتهت مدتو بضر بالناس
• يبقي يجب ان نكون واضحين
• ولكل اجل حين
• واذا جاء الاجل يجب ان نقتع به
• نكرم من قدم
• ونعترف له بالفضل فيما قدم
• ونحترم ماقدم بالمحافظه علي تاريخه بعيدا عن الكشوفات
• لان البقاء بعد المده الافتراضيه ينقص من تلك الانجازات
• ايها الناس
• هناك من لم يتطور منذ ان ورد اسمه في الكشوفات
• عليكم الله موسي الزومه ده غير تسريحتو دي فيهو شئ اتغير من جانا ؟
• خلونا واضحين
• متي قدم طمبل للمريخ آخر مره ؟
• وهل يشفع تاريخ طمبل لطمبل ؟
• وهل يستطيع هيثم ان يعود طمبل من جديد ؟
• الزول ده لو بستحق قروش لانهاء العقد قبل مواعيدو ادوهوا
• وكرموهوا
• وحافظوا له علي تاريخه الناصع
• ايها الناس
• اتصلت علي بالامس الدكتوره المريخيه سحر
• كانت تبكي
• لم تستطع الحديث
• قفلت الخط وعادت من جديد
• تحدثت عن المسؤليه
• وروح المسؤليه
• وتساءلت
• هل يعلم اللاعبون بما يسببوه لنا فيه من حرج واحراج نتاج عدم المسؤليه الذي اصبح ديدن الاغلبيه منهم ؟
• اسأليني تاني يا دكتوره !
• من يوم السبت تبكي حتي يوم الثلاثاء
• هكذا هم الشفوت
• ولكن هل يتذكر معظم لاعبينا انهم انهزموا ؟
• ولا من يوم السبت بالليل نسوا الموضوع ده !
• ايها الناس
• ليست لدينا خلافات مع اللاعبين
• ولكن لدينا فريق نتخذه عقيده
• لذا لانجامل فيه
• والمابشبهنا ماحبابو ابدا
• المهم
• خالد عزالدين تحدث عن النقد الموجه لسفاري
• وقال فيما معناه ان سفاري ليهو حق يشيل الساطور حماية لنفسه
• ياخالد
• ان كنا ننتقد سفاري فهذا لا يعني اننا اعداء سفاري
• ولا يعني اننا ناسين لسفاري ماقدمه
• ولا يعني اننا خايفين ان يذهب سفاري للهلال علي طريقة علاء الدين حسب زعمك
• لكن كمان يا خالد لدينا فريق ننتمي له
• ولا نتهاون فيه من اجل لاعب
• بس هل نسيتوا انتوا يا خالد الزول الشال الرقشه وسكي بيها لاعبينكم ؟
• ولا نسيتوا لاعبكم الشال العصايا وسكي بيها جماهيركم لحدي شارع العرضه
• ولا نسيتوا لاعبكم الذي اعتدي بالضرب علي المشجع
• ولا نسيتوا لاعبنكم الاعتدوا علي مشجعنكم يوم راجي وهنو
• ولا نسيتوا عباراتكم الكتبتوها بتاعت لعب العيال
• نسيتوا القاروره ياخالد ؟
• نحن ننتقد قريقنا
• وهذا لايعني انكم ياخالد افضل منا
• كالا ده لو لعب براهو كان طار
• ده حظكم فقط
• لكن الحظ قلب
• وداكم تونس
• والتانيه هناك
• اي زول عندو طفل ضعيف في الرياضيات ومابعرف يحسب
• يكون حريص يحضر مباراة الرد\ يا خالد
• عشان الشافع يتعلم يحسب كويس
• من واحد لي سته
• المهم
• والله لما شات موسي الضربه المعاده انا كنت قايلها اعاده تلفزيونيه للضربه الضاعت
• ولا مجرد تغيير في الاحساس عند التنفيذ بين الاولي والتانيه
• موسي
• ياموسي
• انت لابس كداره ولا كربون ؟
• بنفس الطريقه وفي نفس الحته وبي نفس الاحساس ؟
• اللهم غيرك ياروح
• سأتحدث عن بله جاري اقصد بله جابر يوم تاني
• ايها الناس
• لن نتخلي عن عشقنا
• ولن نقاطعه
• ولكن لن نجامل فيه ابدا
• ايها الناس
• تغيير الشمبر والاوشاش ما بفيد
• بكره المكنه بترجع تدخن
• ابدوا بالكرنك
• واكبسوا القمصان
• رجعوها استاندرد
• اسبيرات اصليه
• التوليف مابنفع
• شوفوها لو وقفت في اي مشوار
سلك كهربا
ننساك كيف بس !
والي لقاء
سلك
babikir maki [b_silik@hotmail.com]
