بسم الله الرحمن الرحيم
في السلك
• جمعه مباركه علي الجميع
• اها
• الاهله حيرونا عديييل كده
• مره يقولوا يجب ان يكون للناس وطنيه
• وتتمثل الوطنيه في مفهومهم علي وقفة الجميع الي جانبهم
• بالذات في كورة عمك هرمنا القادمه
• ينادون بذلك ويناقضون انفسهم باعلان الخساره قبل الفريق يمشي تونس ذاتها
• يكتبوا ليك عنوان رفاق هيثم وجماعة مساوي واصحاب فييرا
• وتحت العنوان تلقاهم كاتبين كلام جرسه عديييييييييل
• واقتناع بركوب التونسيه
• الرشيد كتب
• الهلال معيون
• سادومبا عندو صداع
• قدر ما كشفوا عليهو ما اتعرف سببو
• علي الرغم من ان صداع سادومبا معروف علميا
• اسمو العلمي يا روشا مرض ام سادومبا
• وعلاجو واضح
• دولار سايكستين ويورودكياكتين
• بعد كده يروح الصداع علي طول
• بيع ياروشا خلي الصداع يروح
• وواصل روشا
• والاصابات ركبت من طرف
• عمر بخيت بدون سبب انكلو وجعو
• عمر بخيت ده ياروشا بقي رجل صاحب اسره ومسئوليه
• وعدم الكاش بخلي الاسره تضرب في الانكل
• عرفت انكل عمر مالو يا روشا ؟؟؟؟؟
• ويواصل روشا
• مساوي الدكتور يكشف
• يقول مافي حاجه
• مساوي يقول شاعر بالم
• علاء فييرا اصيب بدون سبب
• وعاد لسيرة يوهانس
• وقال اسباب وفاتو كانت غامضه
• من اسباب وفاة يوهانس يا روشا ممكن تكون المغصه
• يوهانس انتوا اديتوهوا شنو يا روشا ؟
• موش ممكن يكون مات مغصه من الفلس ده !!!
• ده كلام الرشيد
• ودي كلها شماعات اعدت من بدري لتبرير الخروج
• ناس لاتثق بامكاناتها
• ويدعون الاخرين للوقوف بشده معهم ويجب عليهم ان يثقوا في فريق ناس الرشيد
• الرشيد اراد ان يقول ان الهلال مكتوب
• الله يسألكم ده ماياهو البضحك ؟؟؟؟
• بيع ياروشا وجبص مساوي وفييرا بالورق الاخضر ابو بقره ( بالمناسبه في ورق عمله فيهو بقره شفتوهوا قبل كده ياناس روشا )
• الورق الاخضر ابو صلعه ده مرحله متقدمه ماجابرنكم عليها
• جبصهم ياروشا بالورق الاخضر ابو بقره
• شوفهم الصباح لو شكوا من شئ
• المهم
• عبد المولي الصديق كب الجرسه كالعاده
• وقال انو هو زول كونفدراليه سااااااااااااااي
• انت يا الصديق قايل الكونفدراليه دي هامله
• يشيلوها الناس ساي
• علي قفا من يشيل
• دي بطوله جوووووووووويه
• اصحي يا عبدالمولي
• المهم
• حلمان انا في المطار
• محل الانتظار
• معاي ناس كتااااار
• الطياره الاولي نزلت
• الناس المنتظرين معاي كل زول فيهم عاين لي زولوا لقاهو
• وطوالي جروا علي باب الخروج
• فضلت انا براي
• واحد قال لي الطياره جات ماماشي ؟
• قلت ليهو ابدا , انا راجي الطياره التانيه
• المهم
• في جماعه هجاصين
• يلعلعوا سااااي
• نحنا وانحنا
• يحلموا ويصدقوا الاحلام
• قالوا عن ناسهم كلام يخلي برشلونه يهرب من مقابلتهم
• الجماعه ديل ذكروني قصة ود جادالله
• قالوا ود جاد الله ده زول طول في عرض
• تشوفوا ماشي يقدل ومعلق السيف بالجنبه والسكين في الضراع والسوط مدلدل والعكاز تصنقع وتدنقر ولابس ليهو اربعمائة دلقان
• تقول وحاتك ده فارس الفرسان
• اها قال ليك يوم ود جاد الله مسافر في الخلا
• جا شاقي ليهو قريه صغيره
• اكرموهوا واعجبوا بيهو جدا
• ناس القريه فرحوا لما عرفوا انو ود جادالله قبيله ماعندو
• حلفوا عليهو طلاق
• واعتبروهوا من القبيله
• بل نصبوهوا فارس لفرسان القبيله
• قاموا عرسوا ليهو من القبيله
• كل يوم الصباح ود جادالله يجيهم مارق
• زينه في زينه
• السيف يتلولح والسوط مدلدل والسكين رافعه كم العراقي لي فوق
• يسألهم
• ياناس …. الحرب لسه ماجات ؟؟؟؟
• يقولوا ليهو لسه ياود جادالله
• يقول ليهم القعاد ساي بدون حرب مابقدر عليهو , ياتسووا حرابه ياقبيلتكم دي مانافعه معاي
• يقولوا ليهو اصبر
• اها
• قال ليك يوم ود جاد الله قاااااعد في قطيتو
• يمسحوا فيهو سااااااااي ويبرم في شنباتو
• الكراع الاولي مسوحه انتهي
• وقت قبلوا علي مسيح الرجل التانيه العدو كبس
• الحله كلها جات جاريه لي قطية ود جادالله يكوركوا
• ياود جاد الله ياودجاد الله
• ود جاد الله نطط عويناتو وقال , مالكم ياناس ؟
• قالوا ليهو الحرابه جات
• قال ليهم بي بي بي بي وين ؟
• قالوا ليهو شرق قطيتك
• قال ليك ود جاد الله قده القطيه غرب وهاك يا فكيك
• بعد الحرابه انتهت كاسوا ود جادالله سما ارض مافي ليهو حس
• قام شاعر الحله قال
• ود جاد الله الدايره بي عينو شافها ***** كراعو الغبشه فاتت كراعو الممسحه بي مسافه
• اها ياود جاد الله
• اقصد ياروشا , الحرابه متين ؟؟؟؟؟؟؟
• ايها الناس
• بالامس كانت نفره جديده للعضويه من شباب من اجل المريخ
• وبحمد الله حققت كسابقاتها النجاح
• والمناشده مستمره
• وكل يوم زياده ماشاء الله
• المره الجايه النفره بي حفلتها
سلك كهربا
ننساك كيف وود جاد الله كراعو التانيه لسه غبشه ؟؟؟؟؟
والي لقاء
سلك
babikir maki [b_silik@hotmail.com]
