وش الملاح طلع

بسم الله الرحمن الرحيم

في السلك

•    تربطي بالاخ الاستاذ الهلالي  ماجد علاقه حميمه وطيبه
•    مثل التي تربطي بكثير من الاهله
•    فالرياضه ان لم تجمعنا في قالب اخوي ومهذب وصادق لا فائده منها
•    جمعتنا كما جمعت كثير من الرياضيين غيرنا علائق قويه وموقره ومحترمه
•    وقام مجتمع الرياضه منذ الاذل علي تلك الاحترامات المتبادله بين اعضاء الوسط الرياضي بصرف النظر عن التوجه والانتماء
•     الرياضيون يوقرون بعضهم ويحترمون اختلاف الانتماء
•    لذا تجد ان مجتمع الرياضه يحترمك ولو كنت تختلف في  التوجه السياسي معه
•    مجتمع الرياضه تلاشت عنده القبليه والجهويه واي مسميات اخري
•    يعرف النديه والتنافس الشريف في الملعب
•    ويعرف الحب والاحترام والتقدير خارج الملعب
•    اخوتي
•    نناكف بعضنا في لهو برئ
•    ولكن لانسقط في بهو التهاتر القاتل القمئ
•    التهاتر والعداوة التي تفرغ الرياضة عن المحبه
•    والمحبه هي اغلي غايات الرياضه
•    وللمجتمع الرياضي مواقف جميله حفظها التاريخ بين اعضائه
•    منها ماحدث بين القطبين الكبيرين
•    منتهي الاحترام
•    سنقص عليكم منها الكثير في حينها
•    اخوتي
•    ماحدث في مقصورة الهلال بين الناس لا يشبه الرياضه ابدا
•    معركه بين اهلة وعرباب (ان صحت التسميه )
•    ومعركه بين اهله ولاعب اجنبي محترف في هذا البلد
•    هذه المواقف جعلتني اقف عندها كثيرا
•    اقارن ما شهدناه وما سمعنا به مع ما نشاهده اليوم ونسمع به
•    اخوتي
•    فالنقف جميعا بكل صدق مع انفسنا
•    ونراجع الموقف
•    الرياضه لاتتحمل داحس الحسد وغبراء الحقد ابدا
•    نعود لموضوع الاستاذ ماجد
•    التقيته امس تلفونيا
•    ووجدت عنده احساس بضياع الوسط الرياضي اذا لم نلحق به
•    واقترح ان يتبني ندوات تعود بالرياضيين الي عهد التسامح والمحبه والاحترامات المتبادله
•    صدقني اخي ماجد
•    قطعا سيتعافي المجتمع الرياضي المتعافي اصلا
•    بقليل من جهدك وجهدنا وجهود غيرنا
•    نستطيع ان نعود بالوسط الرياضي للزمن الجميل
•    وزي ماقال دكتور عمر محمود
•    نحنا في الوسط الرياضي لابنخاصم لابنعادي
•    فالنجعل ذلك شعارا للمرحلة القادمه
•    ولتجمع بيننا المداعبات البريئه
•    مثلا
•    ودي هديه للاستاذ ماجد
•    قالوا ايام الاسطوره العجب كان طريح الفراش بالمستوصف
•    كان في دكتور شباب متابع العجب
•    والدكتور هلالابي
•    ودي ماعارفو عملها كيف
•    لكن قالوا الدكتور عشان يحطم  العجب نفسيا
•    ويضمن انو العجب ما يلعب كورتهم
•    كان كل يوم الصباح يدخل غرفة العجب في المستوصف
•    يخت الفايل
•    يتلفت علي العجب
•    يقول ليهو اصبحت كيف ياحاج
•    ( طبعا عجبتك يا ماجد )
•    لكن الحاج ده بوريكم يوم طمنطاشر الوقوف بين السماء والارض كيف
•    تحت تحت قالوا العجب كان بقول ليهو كويس ياولدي
•    جدك كتفوا صبح كيييييييييييف ؟
•    اها
•    شفت كورة حي العرب
•    وقبلها شفت كورة الحصحيصا
•    وقبلها برضو شفت
•    ياناس
•    بالشفتو ده
•    وش الملاح طلع
•    اتسبكت
•    قربت تمرق
•    خلوها في نارها الهاديه دي
•    ولو مستعجلين عليها
•    لعبوا ديمبا
•    بمرقها ليكم بدري بدري
•    قبل القدحه تستوي
•    تاني باري ديمبا
•    للمعلوميه
•    اصل التوانسه برابره
•    ناس بيبرس
•    ناس حرابه سااااااااي
•    جهجهوا ليك التاريخ كلو
•    سبعه توانسه بشجعوا الترجي سكوا جمهور الاهلي من استاد القاهره لي سوهاج
•    قلت ليك برابره
•    ياخ قال ليك تونسي في شكله ضربوهوا طلقه
•    الطلقه اتعوجت
•    ياخ قال ليك في توانسه كده
•    كان دخلوا في شكله
•    الشكله ما بتنتهي
•    لو حجزوك منهم ودخلوك بيتك
•    يرجوك في خشم بابك
•    ياتطلع يهرسوك
•    ياتخندق تموت
•    قالوا من قبيله تونسيه اسمهما المرابطاب
•    رباطين عديل كده
•    مارقين للربا والتلاف
•    الواحد فيهم لوعضاك الا تاخد حقن السعر
•    صعبين
•    للذكري
•    كاس مانديلا
•    الجبناهو
•    بدري الكلام ده
•    هنا غلبنا واحد صفر بس
•    وهناك طلعت صفر صفر بس
•    ياربي كورة تونس انتهت كم ؟
•    مابصدق
•    عشان كده ناس تونس بكوركوا بالفرنساوي
•    ما غديلا 000ماغديلا
•    ماعارفها يعني شنو
•    انا ضعيف فيالرياضيات  بالفرنساوي  
•    لكن قالوا النون بالفرنساوي غين
•    طيب بكوركوا مانديلا مانديلا ليه ؟
•    اصلوا ما بصدق
•    ياناس سوداني
•    ودوها جوبا وادعموا الوحده

سلك كهربا
              ننسي وين يا حبيب !
والي لقاء
سلك
babikir maki [b_silik@hotmail.com]