بسم الله الرحمن الرحيم
في السلك
*كل سنه وجميعنا بخير
*وطن ان بقي منه شئ ومواطنين ان اجبرهم حظهم التعيس علي عدم دخول صالة المغادره
*كان العيد سعيد
*لان الامر الرباني لنا ان نسعد
*فسعدنا
*ولان الاحزان لا تجوز في العيد
*كظمناها ونحن نودع انبل رجالات المريخ ليلة الوقوف بعرفه
*رحل رجل عظيم في ليلة عظيمه
*رحل وصدي صوته علي منابر المساجد مناديا بالصلاة
*كان حريصا جدا
*ويحرص علي ان يؤذن في جميع المساجد
*وفعلها
*اسألوا مساجد محافظة امبده
*رحل ونحن ننتظر منه الكثير
*لنتعلم حب المريخ
*ونتعلم التفاني
*ولندرك ان هناك رجلا باع بضائعه المخزنه في ثمنطاشر مخزن
*لاجل المريخ
*لاجل ان يحل مشكلة ماليه يمر بها المريخ
*كانت كل ما يملك
*ولكنه دفع للمريخ كل ما يملك
*بدون رياء
*وبدون ان يسجلها مديونيه
*وبدون ان يستخدم ذلك لدعاية انتخابيه
*لذا كان القبطان فينا
*يقود سفينتنا بكل جدارة واقتدار
*رحم الله كبيرنا رحمة واسعه
*رحمة تتعاظم وعظمة الايام التي قابل فيها رب رحيم
*اللهم ابدله دارا خيرا من داره
*واهلا خيرا من اهله
*واجعل الفردوس نزله يا رحيم
*برغم الرجل القامه والرحيل المر
*امتثلنا لامر الله ولم نحزن
*الدنيا كانت عيد
*ان العين تدمع وان القلب يدمي وانا لفراقك محزونون يا كبيرنا
*المهم
*الحبيب خالد عز الدين
*كشح جرسه شديده
*كتب مخاطبا الوالي
*ينصحه بعدم الالتفات للاعبي الهلال مطلقي السراح
*بنصح في جمال قال
*تنصح بالنا يا خالد ؟؟؟
*ومن متين قلبك علي جمال او علي المريخ ؟؟؟
*موش انت الكنت بتشارك في مفاوضات لاعبي المريخ لصالح الهلال ؟؟؟
*ليه ما عملت بالنصيحه ؟؟؟
*قول النصيحه يا خالد
*قول انك او انكم ترجفوا كده
*خايفين جمال يقوم يسجل من ناسكم
*لانو البدخل مع جمال في درب ضيق ما بفوز
*وقبلكم الاهلي القاهري دخل مع جمال في درب ضيق
*في موضوع وارقو
*وفاز جمال
*دي العب غيرها
*من حق جمال ان يفاوض من يشاء
*والبقعد مع جمال ما بقوم
*ومن حق المريخ ان يسجل اي لاعب يستحق من الانديه المحليه
*وتعريف الانديه المحليه يا خالد
*انها الانديه الماليها في الجويات نصيب
*اي نادي ما ليهو في الجويات نصيب يبقي نادي محلي
*وبالتالي يحق للمريخ ان يسجل من لاعبيه
*لان الانديه الصغيره طبيعي ان تفرخ للانديه الكبيره
*والماطبيعي العكس
*نبشركم ايها الاهله
*الدايرنهم فاوضناهم
*قعدناهم وغلبتهم القومه
*فيهم واحد شدة ما غلبتو القومه
*كورة نيجيرا غلبو يلعبها
*بكري المدينه لو نشغلوا جنايني في النادي
*دايرنوا
*جري زي ده زاتو بشبهنا
*ونجضوا لينا محمد عبدالرحمن سريع
*اعملوهوا سفري بس بدون شطه
*الشطه عندنا
*دليخ حبش يا عمك
*قال بيتاكو قال طرف شمال
*ايها الناس
*اكتب قبل لقاء نيجيريا
*بالتأكيد لن اتخلي عن رقمي الوطني
*ساقوم بواجبي في التشجيع
*سأتمني النصر لوطني
*ولكن هل معقول نعد منتخب في خمسه ايام ؟؟؟
*اعداد المنتخب في خمسه يوم ؟؟؟
*الفكي لو مشيت ليهو قلت ليهو الكورة بعد خمسه يوم
*بقول ليك مابقدر اشتغلها الزمن ما بكفي
*اعداد منتخب عشان يقابل نيجيريا في خمسه ايام
*نيجيريا دي لو عزمناها غداء
*اعداد الطعام داير اكتر من خمسه ايام
*اكالين ياخ
*اها
*نجي لي شمارات والي الخرتوم
*كان شفت يا والينا
*عن النظافه تاني ما تحكي لينا
*الشفناهو في العيد بكفي يا والينا
*والدور القامت به الكلاب في اكياس النفيات اللينا
*كان جهد مقدر منهم واعتراف ضمني بانهم عليهم حق لينا
*والتمشيط القاموا بيهو شماسة لينا
*برضو خفف كتير من التراكمات علينا
*شالوا الكرستالات والكرتون والفلينه
*والفضل الهواء رجعوا لينا
*بلد كلها هواء يا والينا
*والغريبه كاتمه علينا
سلك كهربا
ننساك كيف والدنيا عيد وعربية النفايات ماجات من زمنا بعيد
والي لقاء
سلك
b_silik@hotmail.com
/////////