ارفع شواهدك يا وطن فوق السما .. بقلم: أمل أحمد تبيدي

ضد الانكسار

الشعراء الشرفاء فى ساحة معركة التغيير على مر الحقب كان لهم دور مشهود…. تلاحم الشعراء مع الثوار وكانت كلمتهم سيف باتر لكل انواع البطش والقهر… كانت القصائد السياسية تعبر عن ا لوضع المنهار و جبروت الحاكم و تخبطه لذلك احتلوا القلوب و بعثوا الروح فى النفوس الخاملة… يظل الشعر هو روح الثورة…
رحل من كانت كلماته تخاطب قضايا البلد وتلامس هموم المواطن رحل القدال… تظل كلماته(تقدل) فى الدواخل وتشع نور يضوي العتمة…..

سألتك بالذى ركز الأرض معبد
وسوى الناس عليها مقام
سألتك بى حجا الأمات ودعواتنا ..
سألتك بى كبيداتن و دمعاتنا
شليل وين راح ..
يكون ضل الخريف فاتنا
وشليل وين راح
الحزن يخيم فى دواخلنا… انا لفراقك يا القدال لمحزونون.. مع هذا نردد

شليل ما راح .. شليل ما فات
شليل عند المسورو حرق بقالو حصاد
شليل فوق التقانت قام خدار وبلاد
شليل مشوار.. شليل مسدار
شليلنا أرضنا يا جنيات
شليل قائم نصاصي الليل
يتمتم ليلو وردية
حرازنا شليل .. شليلنا دليب
شليلنا دليل على البلدات بعد درب التبلدية
شليلى ما راح .. شليل ما فات
مزارع بات على عشقين
تراب بلدو وسماح فوق بت مزارعية
وبقول غنوات
الكلمة مكسورة… حزينة… (أبت تطلع)… رحل من قاوم الظلم وقف صامد لن يقهره جبروت العسكر… غنى للنضال وحب الوطن

أرفَع شواهدَك يا وطن فوق السَّما
جُوك العِيال العِندَهُم مِن مَهْدَم شوقَك نَمَا
القَلبَهُم قَلبَك عَديل يَحْمِي ويغَطِّيهُم دَفَا
في حُبك اندَغَمَت دُمُوعهُم بالدِمَا
رغم الطشاش شافُوكا في البَهَا والسُّمُوق
رَفْرِف جَنَاحَك يا سَلام
غَطِّي الجَبَل والوادي غَسِّل ظُلمَهُم ..
يا ظُلمَهُم، قَتَلة ولِئَام
رفرِف جناحك يا سلام ..
فالحَق يعود لى كُلْ شهيد
لي كُلْ أرِضْ مَنزوعَة تَرجَع بالتَّمَام
لى كُلِّ بِتْ مَشْدُوهَة تِتْوَسَّد كَرَامَتا .. بالجَديد
يرجَع فَرَح شُفَّعنا بى جَرَس التَّمام
مِن حُفرَة التلاتين سنة
رحل شاعر الكلمة.. وصاحب الموقف
محمد طه القدال

&والشَّعب المُعَلِّم للمكارم والسَبَق
ما بينْهزِم من تاني لا بْيقْبَل ضَرِب فوق القَفَا
راح المَكَوْزَن في المَدَوزَن من هُتافنا الهَابِّي من جُوف الحُلُوق
فات البِيقتُل حِيلنا قُدَّام المَدايِن والخُلُوق
مات البيملُص دِينُو
شَان قِطعَة أرِضْ
وبلا خُلُق لا راعَى سُنَّة ولا فَرِضْ ..
لا دينو وَرَّاهو الوَفَا.

محمد طه القدال

&حسبي الله ونعم الوكيل ولا حول ولا قوة الا بالله العلي العظيم
Ameltabidi9@gmail.com

الكاتب

طارق الجزولي