أصل الحكاية
أستأذن الاستاذ العزيز حسن عبدالرحيم في الكتابة تحت هذا العنوان وأبدأ بسؤال لي شنو الوساطة؟ كل لاعب يعمل مشكلة في المنتخب تدخل الأجاويد عايزين يحلوها.. آخر مشكلة كانت بين هيثم ومازدا.. الحاصل شنو مافي زول عارف بالضبط الحصل شنو لغاية هسي.. مازدا قال هيثم ما اعتذر عن المشاركة مع المنتخب.. وهيثم قال ماقلت.. ماقلت شنو قلنا ليك قال إنت غبت بدون عذر.. وهيثم مصر يقول ماقلت.. لغاية ماعرفنا في النهاية إنو في ناس نقلوا كلام لي مازدا قالوا هيثم وفي ناس نقلوا لي هيثم كلام قالوا مازدا، وكل واحد تسألوا يقول ماقلت.. طيب القال منو؟!
المهم هيثم رجع بعد ما اعتذر لمدربه، وقال ليهو ياكوتش عشنا مع المنتخب الحلوة والمُرّة لغاية ماوصل غانا البينا عامرة.. واتقلبت الصفحة وقلنا ياهادي يلا نبدأ باقي أيام وتبدأ البطولة الأفريقية.. وأول كورة لعبها هيثم كانت مع تونس وإنتهت علي خير (تلاتة نضيفة).. قلنا ما مشكلة قدامنا السنغال والجابون قبل ماتبدأ البطولة نكون كملنا الإعداد..
لكن الحلو زي مابقولوا مابكمل (ده إذا كان واقع المنتخب حلو) المهم أنا قاصد الاستقرار واللاعبين والجهازين الفني والإداري على قلب رجل واحد كلهم حماس وعزيمة لتقديم أفضل ماعندهم.. لغاية ماجانا الخبر شايلو الخبير.. الباشا تلميذ… أول حاجة منو الخبير؟ وتاني حاجة قاصد شنو بالباشا تلميذ؟..
الخبير ممكن يكون أي واحد ما البلد كلها خبراء.. ممكن يكون خبيرا في التدريب في الإعلام أو في القوالات وكله عند العرب صابون.. لكن الباشا تلميذ دي معروفة.. فسر؟ لاعب المنتخب أحمد الباشا قالو.. لاحظ قالو دي.. مازدا شداها ليهو.. كيف؟ شفت القون التاني بتاع التوانسة ؟ أيوه..
مازدا قال للباشا إنت السبب مافي مدافع بقابل مهاجم بالطريقة دي.. مامعقول ياأحمد يكون سايقك من الباك اليمين وبي سببك إنضرب الدفاع كله لا قادر تشيل الكورة لاقادر تعطلوا بره الخط.. ياخي دي مدافع مبتدئ مابعملها..
أها هنا الباشا بقي تلميذ.. قال كيف مازدا يقول ليهو مدافع مبتديء ماأي لاعب بغلط إشمعنى أنا.. والشمطة حصلت ماتقول لي.. بقول ليك.. والحجازين إتدخلوا والباشا (حرن) وقال أقول ليكم حاجة أنا مامسافر معاكم.. يازول كيف الكلام ده أكبر ده منتخب وإنت كنت كابتنو أيام قسطنطين نسيت؟
حليل قسطنطين لو ما اخاف الكضب أقول مازدا خاتيها لي من الوقت داك شايفني أقل منه الكابتنية ومحسسني دايما إنه مجاملني بإختياري في المنتخب وبتعمد يحرجني عليكم الله لو مامتعمد بلعبني مدافع.. عليكم الله آخر مرة شفتوني لاعب مدافع متين؟ قاصدها أنا عارفو ماتقول لي ماقاصدها..
ياباشا أمسك.. شنو؟ التلفون ؟ ده منو؟ معاك جمال الوالي .. بلع ريقو… ألو معاك ياريس.. لا مافي حاجة.. لا.. لا لكن هو قاصدني ياريس.. حصل كده كده كده وما إستحملت.. بعدين نحن متعودين ياريس مافي زول برفع صوتو علينا.. حسام البدري جاء عايز يعمل لينا فيها شفت ناس بله جابر والزومة والدافي قطعوها ليهو في رأسو ..
مامعروف بعد كده الحصل شنو لكن الباشا طلع تلميذ لما عرف الموضوع جد قال لي ناس الإذاعة ماعندي مشكلة مع مازدا وبدون مقدمات غني ( ريدة مازدا في قلبي جوه وعايزها تبقي خوة) واحد من معجبين طه سليمان كان متابع الحوار قال أكيد مازدا الغلطان..
وقفنا وين؟ الباشا تلميييييييذ .. ناس جمال الوالي مع معتصم جعفر وناس أسامة ومعاهم إعلام المريخ عايزين يلمو الموضوع.. قالوا ياجماعة القضية ماعندها علاقة بمازدا والباشا ماقال مازدا بدخل لعيبة من الهلال وهم بعيدين عن اللعب ده كله كلام المغرضين وهواة البحث عن الفتن المشكلة كلها عندو ظروف أسرية..
وبعدين الباشا صغير.. صغير ؟ بالغت الراجل عريس.
hassan faroog [hassanfaroog@hotmail.com]
///////////////
