بالفل والياسمين
أدْلِق أريج الشوق
وافرد جناح أزهارو
واطلق زمام الذوق
ما الشوق بحر
أطرافو ما بتتلم
والشوق بروق
شوايه فيهو النم
والشوق مطر في ريقنا أبا ينجم
الشوق شتا
صَرَّاجه جياتو
الشوق وتر يا خالدة
أوراقو جمرية
تلعب بي مشاعر الريق
تديهو السلام ميه
زي ما تكون أحلام
جدعة خيوط وعشم
والله جد يا خلود
بُعدِك وراهو ألم
كم مرة جيت ولهان
وحالم أشوف إيديك
لكن لقيت نفسي
في يقظةْ حلم راجيك
مشيت بالحسرة فَرَّادِي
وشِلت الوَدْره أم شِهِّيق
وختيت الأمل غادي
وشديت مراكب الضيق
وجاني طيفك سال
مُسْرِع قريب عَجَّال
بس لحظه ما لقيتو
بَرِقْ امْ شَتَار يا ناس
وبرقِي الدُّرتو عبَّادي
مرحب حباب الطيف
خليك هنا قصادي
بالله ارجع ولف
ما بتعرف الرحمن ؟!!
ما شفت دمعه تَرِفْ؟
جُوَّاها موج غرقان
ما مَرَّ بيك تحلف
يتيم البسمهْ والألحان
الشاري السهر تكعيب
المحتاره أُمْسِيتو
السارح في بحر الكون
مهد الودار بيتو
وسابح في البعيد حيران
لو يمسك حلم جيتو
إلا الوحده حازمه رجاهو
نَدَّاهة عفاريتو
ومهما تسرف الأقدار
تعاودنا وترد الروح
وتَنَدِّي الشوق وآهاتو
وتجيب الفرحة
ونسايم البهجة
تمسح كل قطرة نوح
وننسى الفرقة في لمحه
وسؤال القمره حباب طلتكم الحلوة
ومتين جيتو !
✍? عبدالماجد موسى
