سودانايل أول صحيفة سودانية رقمية تصدر من الخرطوم
أخبار أخرى
مناظير الجمعة 19 يوليو، 2013
drzoheirali@yahoo.com
* لست صاحب السؤال الاستنكارى اعلاه والذى يعنى حسب ثقافتنا الشعبية (خلاص إطموا اسكتوا)، وليس لى به ادنى صلة ولا يحق لى ان ادعى ملكيته الفكرية ولو فعلت استحق قطع لسانى من لغاليغو، بل هو ملك حر للاستاذة سامية محمد أحمد نائبة رئيس المجلس الوطنى ووزيرة الرعاية الاجتماعية السابقة، أدامها الله وأكثر من أمثالها ببركة هذا الشهر الكريم.
* فعلى ذمة صحيفة (الخرطوم) الغراء الصادرة أمس فان الاستاذة سامية نفت خلال حديث فى المجلس الوطنى الموقر وجود اى أزمة انسانية فى دارفور، واعتبرت معسكرات النازحين مناطق سكنية جديدة لا فائدة من تفريغها وقالت لا فض فوها :” بس خلاس يسكنوا هنا، يصلحوا ليهم الحتة ويدخلوا ليهم فيها خدمات وتصبح زى المدن الاخرى … الكورايك شنو؟!” (دى سامية ما انا ).
* وبغض النظر عن السؤال الاستنكارى الذى وجهته نائبة رئيس المجلس الموقر للسادة الاعضاء المحترمين، ورد فعلهم تجاهه الذى لم تورده الصحيفة هل إطموا ام لا، فاننى اتفق تماما مع الاستاذة سامية فى الحديث الذى قالته، فان احسن حل لمشكلة دارفور المستعصية وانهاء حالة التمرد وسيلان الدماء والفوضى والتوتر وكشف الحال والتدخل الاجنبى الذى تطاول واراحة انفسنا من عبء حماية قواته التى جاءت لتحمينا فاكتشفنا انها جاءت لتحتمى بنا ( على طريقة .. جيتك يا عبدالمعين تعين ..) واخراجهم من بلادنا قبل ان ينقرضوا، هو ان نعتبر معسكرات النازحين أحياء سكنية جديدة زى حى ودنوباوى وحى المعمورة والحلة الجديدة والرياض أو اى حتة تانية ونتعامل معها على هذا الأساس ( يعنى حى كلمة بدل معسكر كلمة وحى طويلة بدل معسكر طويلة وهكذا) .. وعلى رأى الاخت سامية نصلحها شوية وندخل فيها خدمات وتصبح زيييييها وزى المدن الاخرى .. الكواريك شنو؟! (دى سامية ما انا)
* ولزوم التصليح بتاع الحتة لازم نخت ليها شوية جبنة (معليش سرحت .. اللهم انى صائم )، ونعمل ليها شوية شوارع ظلط وطرمبات بنزين(مدعوم) ومحطة كهربة دفع مقدم ومحطة موية قاطعة طوالى ومكتب زين عالم جميل ومطار كده نجمة واحدة زى مطار الخرطوم وكورنيش على النيل، أهم حاجة الكورنيش ده ولازم يكون على النيل، وجامع مصلح خمسة نجوم عشان الجماعة لمن يجوا يصلوا فيو .. ومول جمب الجامع زيييييهم وزى المدن الأخرى .. الكواريك شنو ؟! ( ده ما انا )
* وكمان ما ننسى نعمل فيها روضة ومدرسة أساس الموديل الجديد ( تسعة بستم) ومدرسة ثانوى وكم جامعة كده عشان الاولاد يتخرجوا ما عارفين حاجة، ولازم كم شركة ركشات لزوم االشغل بعد التخرج ان شاء الله زييييهم وزى المدن الأخرى .. الكواريك شنو ؟! (شرحه)
* واهم حاجة محلية ومعتمدية ومجلس وطنى لزوم السفسطة بعض الوقت (لتحليل المرتب) والنوم باقى الوقت ( يعنى المجلس ده لو كان فيو مراتب كان الحصل شنو؟) .. زيييييهم وزى المدن الأخرى .. الكورايك شنو؟! ( (فوق) ..!!
* حقيقى كلام زى السكر وما فى أفضل من كده حل لأزمة دارفور ومشكلة المعسكرات الطولت دى .. وبعدين الناس الراحو أونطة ديل نسأل الله ان يجعل مثواهم الجنة ويلهمنا وإياكم الصبر وحسن العزاء فيهم وفى مجلسنا الوطنى وكل عباقرتنا الميامين .. الكواريك شنووووووو؟ ( ده انا ما سامية ) ..!!
صحيفة (الجريدة) السياسية اليومية
www.aljareeda-sd.net/en/day/
