بسم الله الرحمن الرحيم في السلك *الحقيقه ان هيثم مصطفي بلعب باص القون بمهارة *بمهارة فائقه جدا *برغم انه لا يملك مهاره *الا انه يلعب باص القون بمهاره *ودي هي المهاره زاتها *هيثم لا يلعب بالشمال ولا بالرأس *هيثم لا يملك مهارات زي سكسك مثلا وفائز نصر الدين *وبرغم ذلك يلعب باص القون بمهاره *وبالدارجي كده *هيثم لو قلت ليهو (اضقل ) *الاولي بتقع في الواطه *لكن لو وقعت قدامو اثناء اللعب *بلهعب باص قون *زمان نحنا كنا بنقضل لحد ميه *وما لعبنا لا في منتخب ولا في طرف قمه *لانو كان عندنا مهارة التحكم *لكن مهارة التكتيك ماكانت في *يبقي هيثم بي حقو *ومن حقو *ولذا ما تزعجونا بانو هيثم اعتذر *اعلونها ساي *هيثم راجع غصبا عن كل الشعارات المرفوعه *وهيثم وصل لدرجة تحديد من يدخل الاستاد من الجماهير *ومن لا يدخل *زول زي ده ما بعتذر *ايها الناس *سبعطاشر سنه هيثم في الهلال *وسنه واحده في المريخ *في سنة المريخ الواحده دي قابل روبن *ولو قعد السنه دي في الهلال *كان قابل ربو *هيثم عائد برغم كل شئ *نضفوا الخانه كويس *الزول ده خانه مغبره ما بتسجل ليكم فيها *الهلال كبير وهيثم كبير *والله اكبر *المهم *تسجيلاتنا لا زالت زي ضربة الشفا *لي اسي ماعارفين في شنو والجاي منو والماجاي منو وليه *كلو يوم نسمع جديد *ولكن بصراحه من المجلس ماسمعنا شئ *يكون يا ربي المجلس زاتو ماعارف !!!! *نصر علي توضيح من المجلس بمنتهي الشفافيه بعد قفل باب التسجيلات *روشا *البرازيلي وصل ولا لسه !!!! *فطومه قولي شئ *بيتزا جنوي وصلتكم ولا جايبنها ليكم دليفري ؟؟؟ *في السقط ده بتبرد *مواتر الدلفري دي بتبرده في الشتا ده *قنبلة ردنه طلعت فشنك ولا غنبلتو كانت فيصل موسي !!! *لكن سمعت لي ببرازيلي من اولاد ابيي *اليومين دي حايم في العمارات *الزول ده بنفعكم يا كردنه *منها برازيلي منها قنبلة *وسماحة الزول في الطول والعلا *ايها الناس *قالوا كردنه قال *سنة الفين وسبعطاشر مابكون في اجنبي في الهلال *ياربي يكون قاصد سنة الفين وسبعطاشر مابكون في هلالاب ؟؟؟؟ *ولا قاصد انو مابكون في هلال ولا كاردينال ؟؟؟ *ولا او كما قال !!!! *علي المجلس ان يبين لنا الدعومات التي وصلته للتسجيلات *ويورينا اي زول دفع كم *انا متأكد بانو اعضاء التحالف دفعوا *بس علي المجلس ان يبين ما انجزه الرجال *حتي التبرع بالرأي نعتبره تبرعا سخيا *بس ورونا *المهم *اليوم هو تلتين نوفمبر *يعني آخر يوم في شهر الكضب *من بكرة الكضب حرام والقبر قدام *ايها الناس صدقوني *ان تنصروا الله ينصركم *اها *نجي لي شمارات والي الخرتوم *كان شفت يا والينا *عندنا جيرانا لينا *عندهم سبعه اولاد يا والينا *السبعه اولاد عندهم سبعه جوازات ما من بليدنا *الامريكي والانجليزي والهولندي والفرنسي والكندي واسباني واسترالي يا والينا *بعد ده منو الفضل لينا يا والينا ؟؟؟؟ سلك كهربا ننساك كيف والمواطن هاجر جواز الوطن وعوج لسانو ورطن …يا كائد المحن يا كائد المحن يا كائد المحن والي لقاء سلك b_silik@hotmail.com ///////////
