اعفص فى شوارعك . . كع
افكر فى الغشانا ضلام . .
وحالف انو ما يقشع
واتذكر فى حالنا قبيل . .
قبل ماهمومنا تتوسع
لمن كان حنينا اصيل
ويوم كانت صلاتنا ورع
كيف يوم كانت اتراحنا
حواليها النفير يجمع
ولما تزغرد الدنيا
نلم شمل الفرح نجمع
وربك ينثر البركة . .
ويجود بى رحمتو ويوسع
براى ماشه !
وفجاة عليك امان الله . .
دخلنا فى عصرنا الهسع
وكت فيهو النفوس نفرت
ولو حتى الصلاة بتجمع
لا الجيران بعرفوا الحال
ولا زول الاهل بدفع
ان جعت التجوع جوعك
ولى ريقك تبل تبلع
ولوتاكل اًكل اًًكلك . .
واًكل غيرك . . اكان تشبع
لما الناس نست انسانا وانخلعت
. . اصابا هلع
ولما يرتل الطاغوت كتاب الله . . كيف نسمع؟
براى ماشه !
اها النرجع
نفكر فى المهم اسع
حبوب امى وحقن يابا ومصاريف بيتنا اتوقع
ؤو مدارس وايجار حارس
وايييك كم مرة راح اطلع؟
يالله الليلة كان سجمان
وكان سكران بيترتع
وكان زولا تقيل مليان
وكان كلبا على يشكع
لازم المها قروشى
كدى الناخد الحبوب نبلع
يااا الله اكان خسرت انا . .
سالتك للاهل تشفع
براى واقفة !!
اكرم محمد زكى
akramaddress@yahoo.co.uk
