• أول حاجة.. لو كنتَ من أهل الغرام، فلا تشكو غرامك ونارو ولهيبو وأنت جالس إلى جوار زول مُغرم متيَّم غرقان في تهاويمو، فيقوم يشكو إليك حالو ومآلو بأشد مما شكوتَ إليه فتندم، وأصلو الناس الزي ديل قاعدين (على الهبشة وما بستحملوا) !!
• تاني حاجة لا تشكو ألم فراق الأحباب والأصحاب إلى من فارق ديارو ومتغرِّب بعيد، والذي سوف يغلبُك بالدموع إن هبشتو، فالغرباء (أصالةً) متعبون مرهقون بكَّاؤون نائحون !!
• ولا تشكو أوجاعك إلى مريضٍ مهيض، أضواه الألم، وخذلته العافية، وأحاطت به أجهزة الأطباء من كل (ذراع وأنف وخشُم) فتأسف أنك شكوت وتوجعتَ أمامه، فالمرضى أقوياء بمن حولهم فقط !!
• وفي الأصل أنت حقو لا تشكو آلامك وأوجاعك إلا لمن تثق فيه فعلاً، وتثق أنه سيتعاطف معك ! بل حاول يا أخي (ويا أختي) ألا تشكو من أساسو.. وحاول أن (تاكل نارك لوحدك)، إذ أنه كلما شكوتَ لأحد كلما أكتشفت أنك أفضل من كثيرين ممن شكوتَ إليهم، وأنك ربما أقلهم دموعاً !!
• مرة واحد عمنا قاعد أتونس معاهو في موضوع زي دا قال لي حكمة بالغة جداً.. قال لي عارف يا إبني أهلنا زمان كانوا بقولوا (لا تبكي لزولاً ما بمسح دموعك)!!..شفتوا كيف !!
• قبل فترة كدة جاتني بت تكنيشان technician خواجية زميلة، كانت شغالة معانا، وعندها مشكلة كدة..وقعدت تحكي لي..وتحكي لي.. وتحكي لي..وأنا بسمع ليها سااكت ومتأثِّر شديد خلاص.. وشويتين كدة المسكينة دميعاتا شوووووووو نزلن !!
• أها نظام أمريكا هنا لو قدامك زول (بكى) إنت لازم تتأثر، وتتعاطف معاهو، حتى ولو ظاهرياً..مثلاً تطبطب عليهو أقل حاجة..ولو زولاً كمان بتعرفو شدييييد أحسن تديهو (هَق) hug مع الطبطبة دي.. وتقول ليهو I am sorry ، يعني بالسوداني كدة تواسيهو و(تَقِلدُو) !!
• البت دي عاد أنا بعرفا تببب.. فقمت قلتا (أبقى أمريكي) وأديها (الهق) حق الواجب، والمواساة، والطبطبة داك..طبعاً أنحنا (أسياد واجب) وكدة.. الحصل شنو بعد داك ما عارف والله..لكين أظني زِدتَ (الهق) دا شوية، ولا (أخلصت) فيهو شوية إحتمال..ولا الحصل شنو بالضبط ما عارف !! لكيين بس حتى قُبَّال ما أتم (هقي) دا ذاتو قال كدة مآسي الدنيا دي كلها جاتني في راسي..والقيامة الرابطة في السودان ديك كلها (أتلايمت) وجاتني.. شيتاً الكورونا، وشيتاً الصفوف، وشيتاً الجنجويد، وشيتاً غباين البرهان، وشيتاً الكيزان، وقتل شباب التروس، وقحت، والإعتصام، والنائب العام، والإنقلاب، وتِرِك، وحميدتي، والتجاني السيسي، ومناوي، وجبريل، وبرطم والتوم هجو، والجنينة، وحمدوك..(وهناية ديك ذاتا) جاتني، وعييييييك..
الحاجات دي كووولها (كبست) علي مرة واحدة، وملت لي وشي وعيوني (ووجداني) تُففف، وربطت حلقي، والعبرة خنقتني، وقال كدة وفكيتا بكية أنا ذاتي !!
البنية تبكي..وأنا أبكي ومتقالدين ترا.. هي تبكي.. وأنا أبكي.. هي تبكي وأنا أبكي.. هي أخدت ليها صنة كدة وأنا أبكي..وأنا أبكي..وأنا أبكي..هي سكتت وأنا أبكي !!
• في النهاية المسكينة شكلها أتخلعت فهدأت واستغفرت، وخلَّت بُكاها ذاتو وقعدت تسكِّت فيني، وأدتني مناديل ورق عشان أمسح وشِّي.. وقعدت تتعذَّر لي..وتطبطب علي..وردَّت لي (هقي) الناقص الأديتا ليهو داك بأحسن منو، وبالزيادة كمان..وقالت لي معليش دكتور موهمد..أنا آسفة شدييد والله.. انت زول طيب..إنت ڤري إيموشونال emotional دكتور موهمد !!
قلت ليها والله ڤري إيموشونال جداً يا كريستينا..إنت بس ما عارفانا سااكت أنحنا السودانيين ديل..والله أنحنا متوَّقين تويقة جد وممكونين وصابرين ساكت.. الأيامات دي والله في (البلد هناك) وصِل بينا الحال (كُسناها من التوم هجو يا كريستينا وما لقيناها..تصدقي).. البت هنا أنتبهت..قالت لي (وااات what)؟؟!!
That idiot drooling guy??
(يعني الزول المطرطش وعوير داك)؟!. قلت ليها آي والله..في هذه اللحظة تااااني (قلدتني) (وحررنا) بكيتنا تاني من جديد !!
قلت ليها والله يا كريستينا (وإنتِ ما طالباني حليفة) الحالة عندنا في البلد بقت كعبة خلاص.. (وكمان تخيلي حميدتي…) وقبل ما أتم كلامي قالت لي :
(Whattt? the tall janjaweedi guy too)?
يعني زعيم الجنجويد الطويييل داك كمان؟! قلت ليها آآآي والله..وقال كدة تاااني أدتني (هق) أشد من الأولاني داك.. والدموع ديل شوووووو !!
قلت ليها : لا وإيه كمان جابت ليها (برطم ومناوي وأردول) !! وقال كدة البت دي (عاطت) بطول حسها، وختت يدينها الإتنين في نص راسها، وقعدت في الواطة دي، وهي تردح وتولول وتقول لي (أو ماي قوط، ذيس إز أنبليڤأبل) Oh my God, what a shet, its unbelievable..يعني يا إلهي، (تُفَّاااااا)، هذا شئ لا يُصدق !!
• وأنا لما رأيت الأمر (متحدراً) هكذا، قمت دنقرت عليها كدة وهي (متفرجخة) في الواطة، وقلت (في قلبي) أصلها الحكاية بايظة بايظة.. خليني أديها الأخبار كووولها (فَت مرة).. قلت ليها: أها وأزيدك من الشعر بيت يا كريستينا.. وحمدوك كمان أستقال.. نطت لفوق وقالت لي واااات..وااات وااااات !! whattttttt, whatttt, whatttt..والساعة البت دي صرخت (وقلدتني) أنا قلت الليلة غايتو يا روحي يا روحا واحدة بتطلع..بعد مساااااااااافة كدة افاقت شوييية، لكييين قلدتني قويييي، وبقت تشير لي على المناديل..يعني أديني مناديل..قلت ليها لشنو ؟! يعني عشان (تقُشِّي) بيها نخامتك؟! يا زولة قُشيها لي في قميصي من ورا..ولا أقول ليك حاجة..قُشِّيها لي في عنقرتي دي (ما هي لسه قالداني والعنقرة قريبة من نخرتا)..عليك الله هو ذاااتو شِن فايدة (العناقِر) في وضع زِفِت، ومنيِّل بستين نيلة زي وضعنا دا !!
السودان دا إلا يوم يكتُلنا ويقعد براهو..
bashiridris@hotmail.com
