تمت كتابة هذه الخواطر فى أوقات متفرقة من الأعوام الماضية، وفى مناسبات مختلفة، فى صيغة “مجادعات” مع الأخ العزيز الشاعر الكبير محمد طه القدال، متعه الله بنعمة الصحة والعافية، وهذا بمثابة إهداء متواضع لشخصه الكريم.
حكم أب تكو و “الهجرة الى الله”
(1)
عشنا وشفنا حكم اب تكو بالتمكين
أهلنا الكانو بي أهل الله محكومين
جونا خلق..أحلف إسم الله نصابين
غشو الناس وتوهو كل ضعيف مسكين
هدمو بيوتنا نشفو ريقنا باسم الدين
يقولولك كتاب الله ..يمين بالله مو صادقين
******************
(2)
الناس الزمان مركوبن الكداري
ما شافو المدن العيشة ديمة ضهاري
في غفلة زمن سوو القصور بتراري
كترو في الحريم والباقي سوو جواري
***********************
(3)
سرقوهو البلد بي نيلو بي وديانو
من فات الشباب إختل عاد ميزانو
يوم وقع المرق وإتفرتكن أركانو
ما خلو الشباب يسرح مع غزلانو
****************
(4)
وحاة إسم الله ديل أبالسة ما بنقدرو
أكلو حقوقنا من عند مدني لا عند هيثرو
سفو بلادنا ما فضل البشيلو يهبرو
وراس القايدة فايت للكبار والقدرو
******************
(5)
هم باعوا البلد بي حالا ما خلولنا شيتن تاني
شن فضل بلا الهبود محكر في بكان تيجاني
هم كالو النجيض إلا الرماد قام جاني
وسمسرو في الرماد.. ما خلوهو لي مجاني
وما هو غريب حكم اب تكو…
كان سوى البرئ هو الجاني
(6)
في بلد النعيم كل الحكومة تهمك
وفي بلد السجم تلقى الحكومة تخمك
كان فلس تشيل الباقي من جيب أمك
وكان كوركت ما تلقى البجيك يهمك
كل عسس البشير مالين جيوبن منك
شايلين لي سيوف الجز دوام هارنك
********************
(7)
الفلم إنتهى والشعب كيف قرفان
شايف العنبلوق يرقص مع الخرفان
قام روح مرق خلاها للكيزان
مااابعرفو الأبالسة عزة الأوطان
*********************
(8)
ماهن ناس أصول أخلاقن المأفونة
شايلين للقلع أختام دوام ماذونة
قلعتو القبيل تحت الأرض مدفونة
مما جيتو شن سويتو غير تاذونا
قاعدين بالكتل ما تظنو خوفتونا
قايلين دايمي؟؟ علي الدنيا مي مضمونة
***********
(9)
إبليس مندهش قرب يجن بي زاتو
متحير عديل كيفن يكون ما فاتو
ديل مرضو الوطن كتلوهو قبل أوكاتو
مو دايرين نضم إلا الرجال بس ماتو
*****************
(10)
يرقص بالنهار وبالليل بيسرق شعبو
والحكم العديل فارق زمان لي دربو
الجور والظلم درسوه قبال يربو
بنشوف الفرح وكت الرجال يتكربو
*********************
إبراهيم الكرسني
9/5/2016م
barakawi204@yahoo.co.uk
