حميد أخوي

أهدي هذه الخواطر الى الأخ الفاضل، الشاعر الفذ، الأستاذ المناضل محمد الحسن سالم "حميد"، بمناسبة إهدائي نسخة من ديوانه، "أرضا سلاح" والذى تم تدشين إصداره بقاعة الصداقة بالخرطوم فى الحادي و العشرين من شهر أكتوبر الماضي، آملا أن تليق بمقامه الذي نحته بأشعاره الخالدة فى وجدان الشعب السوداني، ومتمنيا له موفور الصحة و العافية على الدوام .



حميد أخوي
"أرضا سلاح"
نطقا القلب
قبل اللسان
فشان بلدنا المستباح
من جوهو ناس هولاكو ديل
حتى الكتل أصبح مباح
...
حميد أخوي
وينا البلد؟؟
ما أصبحت محتله بى ناسن كتار!!
واحدين حبش
واحدين ترك
واحدين أفارقة بلا بلاد
نسأل نقول
يا أخوانا من وين جونا ديل؟
قالونا جونا من الأمم
مرتزقة مخلوتين جنود
و المغسة بيناتن هنود
...
حميد أخوي
من إنتا فارقتا البلد
جفا الضرع
عدم المراح
والناس بتاكل فى التبن
مع إنو خيرن كيف كتير
لكنو منهوب من بشر
لا بعرفو دين لا بدورو خير
شيتن زكاة
ودمغة جريح
وشيتن حرب
وشيتن سلام
وشيتن بيهرد للقلوب
الميتي بى قولة تمام
من فارقت درب النضال
درب البنا...ودرب النفير
...
حميد أخوي
كان شفتا ناس حلوف هناك
بقى عيشتن زي السجم
يصحو الصباح
فتاح يا عليم
رزاق يا كريم
تلقى الزويل
فوق همو داك
شايلو مليون ألف هم
...
حميد أخوي
من وين يجيب شاي الصباح؟
طول عمرو يشرب فيهو
بي عسمان حسين
يسكت يكب.. من دون حساب
لامن مزاجو ده يتعدل
مو قايل الزمن اللعين
بيحرمو من شيتن
بيشربو بالسنين!!
...
حميد أخوي
من وين يجيب حق الفطور؟
والله "فد فرطاقة ما دخلت جرابو"
ده ليهو دور
ما خيرو شالو أبان كروش
ناسن غراب
لا بنشبهن لا مننا
ناسن تقول غازننا
كان شفتهن حميد أخوي
والله لابد من تدوش
...
حميد أخوي
من وين يجيب حق الملاح؟
ما أصلو كان ساعي المراح
من لبنو داك شاي الصباح
والروب مجهز فى المعاليق للملاح
لكين مراحو صبح عدم
مسكين هو زاتو
الزادو أصبح هم وغم!!
...
حميد أخوي
من وين يجيب حق الرغيف؟
عشرين سنة
عايش محل عز الخريف
ضبحوهو ناس هولاكو
بالضرايب والجبايات والرسوم
شفنا الضرايب للزرع
وشفنا الضرايب للضرع
لكين عمركم شفتو زول
دفع الضرايب.. كان..
فى الحلي ساكت دار يحوم؟!
...
حميد أخوي
من وين يجيب حق العلاج؟
أمونة راقدي بقالا دور
بالوردي دمها دار يفور
لكنو محتار وين يغور؟
الإسبتاليات الزمان
كانن كتار فى كل بكان
الليلي صارن فى العدم
إلا البيدفع كم..وكم
حتى العلاج
سوهو للناس الجعاص
أبان كروش
ما أصلو عندهم القروش
والله يا حميد أخوي
الجونا ديل ماهن بشر
لكين وحوش
...
حميد أخوي
والله شفعنا الصغار
الليلي بايتين القوى
تذكر أيامنا الصغار
وحردتنا للعشي باللبن؟
وزينوبة تجري على التكل
وتنزل الحله أم ضراع
ونشيل وتغرف فى الملاح
وأما شبعنا شبع تمام
والله ما تنوم للصباح!
يا ربي حالا بكون نصيح
لو شافت أولادنا الصغار
ما إتعشوا بايتين القوى
ما جاهن النوم ضمه تب
لامن ديوكنا بدت تصيح؟
...
حميد أخوي
من إنتا فارقتا البلد
رحل الحمام
حتى الزرازير فارقت
رحل الرهو
بلدن فضل فيها الغراب
وجاها الرخم
والله يا حميد أخوي
أكلوها تب
خموها خم
...
حميد أخوي
كان شفتا ساقة الكرسناب
نشفت خلاس
وتمرا الكتير أصبح يباب
و المنقة والليمون خراب
وباجورا مويتو بقت رهاب
وجروفا ديكا بقت تراب
مع إنو نيلنا يفيض دميري
لكنو أصبح زي سراب
حتى الجبل
الكان قبيل قبلة و أمل
للعابدين و الصالحين
أصبح حزين
يشكيلنا من جور السنين
الجابو ناسن كيف قباح
ناسن كتر.. ومتأسلمين!!
...
حميد أخوي
قام حمد إحمد شاف غراب
ينقشلو فى وشمن غريب
ختاهو فى قلب البلد
صعبت عليهو قرايتو تب
ما أصلو شوفو صبح رهاب
سأل الوليد..
يا وليدي أقرأ الكلمة ديك
قالو.. الهناك منقوشة فى قلب البلد؟
أظنها "الإنقاذ"..تقول!!
...
يا وليدي دقق فى الكلام
قام الوليد يمشي ويجي
يمشي ويصنقع فوق بعيد
يجري ويقع
ومرات يقوم
وفوق الوشم يسكت يحوم
قام الوليد شاف الوشم
شاف "وصمة" الإنقاذ
موسومة فى قلب البلد
والمرة دي إتأكد تمام
لأنو دقق فى الكلام
...
قام حمد إحمد مندهش
سأل الوليد..والله صح؟
إنقاذ شنو؟
إنقاذن البعني الدمار!!
إنقاذن البعني الودار!!
إنقاذن الشرد ولادنا من الديار!!
إنقاذن البعني الضياع
إنقاذن القلع شبابنا من البلد
وقام هجرن من غير متاع!!
إنقاذن الرمل نساوين البلد
وخلا البلد من دون رجال!!
آآآآآخ يا بلد.. كل الحصل
والله قبل الكتله دي
ده أصلو ما كان فى الخيال!!
وتقولي إنقاذ ..يا وليد
وبرضك تأكد لي وتكرر
إنو إنقاذ يا وليد
إنقاذ شنو؟
و إنقاذ منو؟؟
...
حميد أخوي
"أرضا سلاح"
كلمة نصيحة وقلتها
فشان بدل السلاح
والبندقيي اليوما ما جا بت ملاح
لوبينا يزهر فى الجروف
وشفعنا يجلسو فى المدارس بالصفوف
يتعلمو الدين و الحروف
ومرضانا يلقو الأدوية
من دون ضرايب أو فلوس
وشبابنا يدخل للشغل جوا
المصانع والجناين و المزارع
ويبدأ تزيين   الشوارع
...
وبعد العمل والإجتهاد
يبأ الجهاد
ماهو الجهاد حق الزناد
لكنو فى درب العمل
درب الكفاح
الهدفو تعمير البلاد
التلقى فيهو إيدين صفيي وحمد إحمد
فوق بعض قايدي الصفوف
لا يشيلو هما للجلد
لا يدخلن هم والله خوف


20/12/2011م


Ibrahim Kursany [sheeba82@hotmail.com]