حنعبر كييف يا ناسي ويا أهلي .. بقلم: إسماعيل الشريف سليمان
25 أغسطس, 2020
المزيد من المقالات, منبر الرأي
30 زيارة
أضيف كلمات
لقولة الشاعر الحساس
الجاب الفهم من جواه
بي تعبير بسيط وخفيف
تقيِّم الكتير من شعبنا التعبان
و الفاكرين إنو العُرف الجميل وفريد
والعواطف الفارغة من معناها
بطوِّر للبلد من غير رجوع
للعلم والترتيب والتدريب
وأحترام العالم و العاملين
و حب الخير لكل الناس صغير وكبير
و الصدق في كل تعاملنا
وما نخجل ونتستر علي السَّرَّاق
ونفضح الفاسدين بي إسماءهم
وبدون تظليل حتي
يرعوي المرضان والفسدان
من بينا .. .
وأقول كمان بصوت عالي
بنعبر كيف أخياني
و بعض منا هديك
بحفر و في الضلمه
وما في النور
عشان يرمي
أخيانو وأخواتو
دحين بالله ما كفايه
يا ناس ديل وكمان ناس ديك
دحين بالله ما كفايه
سؤال داير مننا جواب
حنعبر كيف ؟
بنعبر كيف ؟
الموضوع القصيده
حنعبر كيف؟
وطن من يوم عرف يمشي
لبس نعلينو مقلوبة
يداقش في السياسة دقش
وطن درويش تِبِع نوبة
وطن خربان خراب سوبا
وطن خيراتو منهوبة
وطن منفوخ على الفاضي
وطن أنبوبتو مضروبة
يشخبط في التراب حيران
وطن ذاكِرتو مشطوبة
وطن متذيّل العالم
وطن واقف على طوبة
وطن شان يلقى تاني العافية
محتاج يقلب الهوبة
ومحتاج ثورة جوة نفوسنا
محتاج نعلن التوبة
ومحتاج طبعنا السوداني
لا الجايينا من كوبا..
وطن مسحور
وطن مشطور
وطن كادت دوايرو تدور
أنحنا صراحة ناس فاشلين
وطن أولادو متشاكسين
ترسل ليهم الواعيين
ترسل ليهم الأعيان
ترسل ليهم الحادبين
وتخطب في المساجد كافة
ما تلقى البقول آمين
تحاول ترتق الفرقات
يفروا كأنهم وزين
نفوس مرضانة بالأحقاد
يغطسوا بعضهم في الطين
دواساً في قعاد الكرسي
بالدبابة والمكسيم
بنعبر كيف
ودام بالطلقة متنافسين
وعارفين الزمان سرقونا
لسع بينا مندسين
وألف عصابة
في البلد لافين
شلل مافيات عديمى الدين
وجات الثورة مهر الدم
تفكك عصبة التمكين
ومازال اللصوص قاعدين
بدل يتبلوا بل الجن
بقينا أنحنا مبلولين
مواكب هادرة بالحركات
حقارة عديل وقوة عين
غسيل أموال وسوء أحوال
وعملاً شين
وتهريب جاز وندرة غاز
وأزمات في دقيق الفين
صفوف العيش
وتهريب حصة البنزين
تقول حرية تلقى الحَر
وسجم الطين ونور مقطوع
لما تقول يا ناس مشينا عديل
يجوك باللفة ناس طاشمين
وسكرانين وعريانين
يا ناسي دي ما الحرية
الكنا ليها ماشيين
ولما تظن إننا مشينا عديل
تفنطط بيك حمير لينين
ولما تقول في سلام
ينفتح باب العنصريه
الكان مقفول وتدفن ليك
جثث بالكوم والقاتل والله ما عارفين
وفي الطرقات هناك حجار
وترس مردوم قافل الشارع
ما بتعرف منو العاملو
والبوليس ما بقصر
يرمي في البمبان
ومرات طلقات تلعلع ساي
ومرات طلقاتو تلعلع ساي
ويتخطي الصفوف كمان
وفي القريه
تتغاتت عليك حركات
أجندات غايصة في التعتيم
تختك في محل ضيِّق
بلد علماني عايزنو
ومرات كمان تقسيم
وأحزاب من زمن تعريفة
لسع تابعة ليها زعيم
وكيمان من عواطلية
مبطحة في ظلال النيم
وعام ضايع من التعليم
سودانايل أول صحيفة سودانية رقمية تصدر من الخرطوم
