# بيان استباقي من د.حمدوك ، قبل المليونية ، ووعود بالجملة دون تحديد ، يعني ( نقي العايزة منها ) وما مشكلة باقي عشرة أيام ( ونقعد جنب الحيطة ونسمع الزيطة )
# القوات المسلحة تكذب ما ( نسب للدكتور الجزولي ) في الفيديو المتداول ، منسوب شنو ؟ ما هو الزول قدامكم بيتكلم .
# عمنا الصديق حاول جاهدا المحافظة على ( كراع بره وكراع ) جوه ، ونفي وجود أي كادر من حزبه في الحكومة ( الشينة منكوره ) .
# ويقول عن المليونية أنها ( احتفالية ) . احتفال بي شنو ؟ وناس تخاطر في زمن الكرونا عشان تحتفل ؟ ( دا كلام يا عمك )
# الكيزان اتجهجهوا بجد في المليونية دي ، قياداتهم البره دخلوهم جوه ، وبقوا ( جته بلا راس ) لا عارفين يطلعوا ضد الحكومة ولا يسكتوا يخلوها لأهلها يدعون لسقوطها ( جحا أولى بلحم توره ) .
# مقاطع صواتية مغبشة قبل المليونية ، قالوا الكيزان بخططوا فيها لاختراق المليونية ، وبصات لنقلهم وبأرقام مرتبة وكيف يندسوا وسط المتظاهرين ويحدثوا بلبلة . ما شفنا بصات ولا بلبلة ( هو مقطوع الراس بيتكلم )
# واستشهد ثائر أخر في أمدرمان ( ربنا يرحمه ) ، اها الضربوا منو ؟ وكيف ؟ المهم أهو دا واحد شهيد جديد لنج يا أديب ، انضم لموكب الشهداء ، حتقعد تمدد في المدة لمن كلنا نصبح في خبر كان ؟
# د.أكرم في فيديو ( في فتيل الثوار ) بدون كمامة ( للحق متدلية من أضانو ) وفي اليوم التاني يصرح أنا ما كنت في المليونية جابني الطريق لافتتاح حاجة كدا وعلقت هناك ( وأنا من الحكومة وأخرج ضدها ؟ ) لا والله حاشاك . بس انت كدا قلت ( ضد ) طيب تعال شوف ناسك قالوا شنو ؟
# ناس أكرم ومحبنه قالوا هي مليونية لتعديل مسار الثورة مش ضدها ، واللا زلة لسان طلعت الحقيقة ؟
# فيصل بقول للثوار ( الرسالة وصلت ) على قول زين العابدين للتونسيين ، طيب لو وصلت انت لسه قاعد تسوي شنو ؟ ما تلملم بقجتك وتفرتك .
# ناس الحكومة وجماعتهم فهموها أو عايزين يفهمونا أنها مليونية لتعديل ( مسار ) الثورة . طيب هو القائد الثورة دي منو ؟ عشان يعدل مسارها ؟
# قالوا ما خرج الناس لاسقاط الحكومة جرد حساب بس . طيب بحسبة بسيطة الحكومة طلعت ربحانة واللا خسرانة ؟
# كان ربحانة نكون نحن ما بنعرف حساب ونقول آسفين . ونرجع كل واحد لصفه عشان يتعلم الحساب ، بتاع البنزين يمش يشوفوه وين ؟ بتاع الرغيف يغشي أول فرن عند الناصية ، والبفتش للدواء يشوف أكرم في أي فتيل .
# وإن طلعت خسرانة يبقى عليكم الله ورونا عرض أكتافكم .
zahidzaidd@hotmail.com
