ذكـريـات زول ســاي! (حنكشة أولاد الأقاليم!) .. بقلم: فيصل الدابي

(حنكشة أولاد الأقاليم!)
حكى الزول الما بقعد ساي وما بسكت ساي الطرفة السودانية الآتية :
زي ما عارفين ناس الاقاليم لمن يصحوا من النوم اصلو ما بقولوا لي بعض صباح الخير ، والسبب معروف ، ناس البيت كلهم تلقاهم بنومو في اوضة واحدة وممكن اخوك يكون نايم معاك في نفس السرير والليل كلو يرفس فيك ، عشان كدة ما معقول تقوم من الصباح وتقول ليهو (صباح الخير)! صباح الخير بتاع شنو هو الخير وينو؟! قال ليك في ولد من اولاد الاقاليم دخل جامعة الخرطوم وسكن في الداخلية مع حناكيش الخرطوم ، بعدين حناكيش الخرطوم شبكو ليك في كل صباح : (صباح الخير) (صباح الخير) ، أها لمن جات الاجازة ، ولدنا الاقليمي رجع لي اهلوا في الجزيرة ووصل بالليل ، سلم على اهلو ، اتعشو ، كملو الونسة ونامو، في الصباح بدري ولدنا الاقليمي مشى على الحمام قام لاقى ابوه راجع من الحمام ، قال ليهو : يا ابوي صباح الخير،  ابوه صرا ليهو صرة شديدة وقال ليهو : يا ولدي انا تعبتا فيك وربيتك ووديتك الخرطوم عشان تتعلم لي العلم والله عشان تتعلم لي قلة الادب دي!  
فيصل الدابي/المحامي/الدوحة/قطر
menfaszo1@gmail.com