أصل الحكاية
حالة صعبة يعيشها الحارس السوداني المصري عصام الحضري في وطنه (السودان) فقد إقترب موعد مباراة الامل العطبراوي المحدد له السبت القادم والذي قال لافض فوه أنها مباراته النهائية مع الفريق ولن يبقي بعدها يوما واحد وإن كان سيغادر بالفعل هذه المرة ولكن بسبب توقف الدوري الممتاز في رمضان (الفكرةغريبة شوية) خلونا مع الحضري ..
سيغادر الرجل كما ذكرت إلي القاهرة لقضاء ماتبقي من أيام شهر رمضان مع (العيلة) وبالمرة يشوف الاولاد عاملين إزاي مع المدرسة وممكن يستفيد من شهر الاجازة ويراجع معاهم الدروس اللي ماقدرش يراجعها بسبب ناس المريخ ..
عشان تعرفوا الراجل ده عنده مليون كلام مش قال عايز يمشي عشان ظروفه الاسرية القاهرة التي تمنعه من البقاء لحظة واحدة في هذا البلد طب إيه اللي حصل أهو بيلعب ولاكأنه في حاجة وكأن الظروف الاسرية (بح فص ملح وداب) ..
حتي في سعر إنتقاله للمقاصة المصري في مليون كلام .. بعض الاعلام المحسوب علي المريخ حاول يرفع سعر الراجل وروجو لمبلغ 700ألف دولار هي صفقة الانتقال وفي أقوال أخري المبلغ الذي طالب به مجلس المريخ … طارق يحي لاعب الزمالك السابق ومدرب فريق المقاصة قال في واحدة من الفضائيات المصرية عرضنا علي المريخ 350ألف دولار والحضري حايدفع 100ألف دولار وقال المفاوضات وقفت لغاية هنا المريخ عايز مبلغ كبير وإحنا مش حاندفعوا .. وعندنا لغاية أمبارح الحضري بقول حايمشي المقاصة كيف؟ مافي زول عارف طبعا إلا الحضري ..
مع إني كتبت منذ ظهور إسم المقاصة في المفاوضة وقلت إنه نادي غير ثري وبعتمد في تسجيلاته علي مشاطيب (الاهلي والزمالك) وقلت لو بالغ حايدفع 500ألف دولار ودي ذاتها ماحايقدر عليها لانها بتخرب ميزانيته وقلت الصفقة دي مليون في المية الحضري دافع فيها وماخذلوني المقاصة عرض مبلغ مفروض يعرضوا في سوق أم دفسوا لانه لم يحترم نادي ثري مثل المريخ خسارته في (مشيوير) اللاعب اكثر من مليون دولار ..
لكن مش غريبه حكاية دفع الحضري لي قروش في تسجيله للأندية المختلفة التي لعب لها ؟ المائة ألف دولار ماأول مرة تظهر مع المقاصة المصري .. الحضري دفعها قبل كده عندما إنتقل للإسماعيلي ونفس المائة ألف دولار مشت معاهو للزمالك والمائة الف دولار ذاتها الزمالك حولها للمريخ وهاهو الحضري يعرضها للمقاصة .
الحضري (تفتيحة) زي مابنقول بمعني صفقته مع مصر المقاصة 350ألف دولار لو أضفنا إليها المائة ألف دولار تبقي 450ألف دولار وهكذا إذا كانت صفقته مع الاسماعيلي 500ألف دولار زائد المائة تصبح 600ألف دولار .. وحسب معلوماتي إنه كان يضعها (أمنية) مش كان عندنا لما الواحد يشتري بيبسي مثلا من الدكان (يخلي أمنية القزازة) يعني تدفع قروش لغاية ماترجعها .. دولارات الحضري عاملة كده ..
وتحضر ماتغيب .. وأن تحضر متأخرا أفضل من ألا تحضر .. وحضرنا ولم نجدكم .. والحاضر يكلم الغائب .. وفي حضرة جلالك .. والحضرة … والحضراب .. والحضيري .. ويحضروا ليك الحلو .. والحضارة .. والمتحضر .. وحاضر .. تحضير .. وتحريض .. وتحتضر .. والكابتن عصام الحضري الذي دخل الآن في حسبة برمة ووقع ولم يسم عليه أحد فقد إنتهت وإلي الأبد أسطورة هذا اللاعب والنهاية تمت في السودان البلد الذي تمتع بإمتياز جنسيته التي لايتمتع بها من كانوا أبناء وطن واحد في الجنوب لم يعد مرغوبا فيه من أي نادي بمافيها المقاصة التي رصدت له مبلغا لم يرصد للمحترف الجديد إديكو والذي دفع فيه المريخ 450ألف دولار بينما عرض المقاصة 350ألف دولار ..
يعني بحسابات السوق بقي سعره أقل من العادي .. إتخيلوا لاعب ووكيله الفصيح كانوا بتكلموا عن عروض من أندية إنجليزية ولما طلعت (فشوش) مشوا المقاصة .. ولما ظهر حسن شحاته مع الزمالك قالوا فرصة بحكم الود القديم وذكريات المنتخب نرمي الطعم لكن شحاته أعلنها صراحة لا نفكر في الحضري .. فعاد اللاعب ووكيله لمصر المقاصة (سيون المصري وأهلي شندي السوداني) وتوقفت المفاوضات في سوق كرور .. فقد انتهي الحضري كلاعب ولم يعد له سوي واحد من طريقين إما الإعتزال أو الرضاء بالمقسوم وتكملة المشوار مع المريخ .. إختار ياحضري .. ورمضان كريم وكل سنة وانت طيب.
ملحوظة :
هناك طريق ثالث البيع بالخسارة
hassan faroog [hassanfaroog@hotmail.com]
