زمان قلنا سفَتنا أفضل من سفَة الإنقاذ

abbaskhidir@gmail.com
سفة المواطن حلال وسفة الإنقاذ حرام تعصف

تحطم بنيتا التحتية لآمال الشعوب تنسف

أقيف هسع وخت إضنيك كدي واسمع

يمين لو عارف إنت الكيف

كت سفيت مليون سفة دون تسويف

فسجائر الدخان ده كيفو مخيف

وللخاصة والعامة كمان معروف

وامراضو معروفة بدون تعريف

وما سمعنا بالعماري يوما ما جابلو نزيف

ولا شكل خطورة علينا بس تهديف

من يدنكل حتة سفة كاربة حريف

تجده طويل مليان ماهو نحيف

يهدف جوة من بٌعد توش تهديف

خت الكورة في الواطة

وتٌر لاغادي ما تصلها

وأرجع من سعوطنا ورا

وما تدخل بين السفة والشفة والقشرة

ف ده أكبر حزب في السودان وقول يا لطيف

فود عماري لاهو سجار ولاهو القات ولاهو مٌخدِر يجيب خبرة

ده تمباك وارد الفاشر يعدل الكيف

تسفو يمين محل ما تقيف

في القاعات وفي السهلا وفي المسرح وعند القيف

ده شغلو نضيف

وسعوط كارب جنب الضيف

وجبنة مدنكلة وتكييف

وحقة ظريفة كريم نيفيا ماتخريف

تخت سفة تعدل الكيف

بعد شايا تقيل وخفيف

وتتمدد بي طولك معلق في ضراعك سيف

منو الزيك عاد في الكيف

تجيك الدنيا بي تشريف
منقادة هي المحتاجة للتشريف

وتشتهر بدون تعريف

تخلف كراع في كراع وتسرح هناك في الطيف

وريحة اللوبي ودعاش النيل في عز الصيف

تقول لي شنو وتقول لي منو

كدي أقيف مرة عند القيف

ودنكل سفة مظبوطة بلا تطفيف

ولايهمك شيخ خفر لاعمدة هناك في الريف

وتتحكر وسط جدول فوق لبقة تحت نخلة وتسرح تحاحي الطيف

منو الزيك يدنكل سفة من حقة ويعدل الكيف

ومنو القدرك يهز ضرعاتو في الضل الوريف

أقيف لسع وأقيف وأسمع

ده ودعماري أصلي صناعة السودان

ما بيشبه قات اليمن ولاتمباك باكستان

ما زي وارد الدخان من الصين واليابان

وتقول لي منو وتقول لي شنو

يازول هوي أبعد من سماء تمباكنا ابقه حريف

شوف ناسك شوف ساستك ارعى بي قيدك
اوعك قدام سعوطنا تقيف

قبل ما تجيك قذيفة سفة فوق راسك تقول ملتوف

تلخبط بدلتك تغير نظرتك في الخوف

تشوف الدنيا مقلوبة والحيكومة راكبة الطوف

وتشوف السفة زي دانة وتبلع دانة جوه الجوف

وتقول لي شنو وتقول لي منو!
أقيف لسع وأقيف وأسمع

لو سفيت سفة كبيرة سفة كيف

وراسك لفة من الكيف

وبقيت تشوف كرعيك تلمع دون تنظيف

وإتلولحت وإتطلوحت وزاد عندك الِلف ليف

أعرف إنك إتكيفت وشبعت تقول أكلت رغيف

ومشيت قعدت بعيد هناك قريب للقيف

وأمواج البحر تتصارع ترمي في الهدام تقوم وتقيف

دي الإنقاذ الجعلت صمغنا سفيف وحورت قطنا كلِيف

وباعت مشاريعنا وأراضينا وكلوكان تزييف

تفهم إنو إنقاذك مجرد حبس وللبلد تكتيف

أقيف لسع وأقيف وأسمع أقيف

أبزق سفتك توف تٌف تيف تيف

تصرخ في قفاك النخلة في الخلفية زي الدٌف

تقول ناجهاك لما عينيك تشِف وترِف

يا المغبون إنت تسف وهؤلاء للحكومة تخم وتسف

نشفو ريقنا ونشفو نيلنا ويبسو الواطة تئن وتجف

زادوا الغازوفي جنوبنا قفلو بلف

والموية تتعكرفي دوامة تدور وتلف

والحيكومة زي مخلوعة مرة تشد ومرة تزيد ومرة تخف

ودي إنقاذنا ما معروف راسها عديل وللايلف

وللا واقفة وقِف

تزيد القصف في الأطراف وفي الأعماق حالها وِقف

من راسها لاعن ميسها كل اعضاها تقوم ترجف

مدها وجزرها مِتِل زولاً يكح وينِف

تقول مسطولة من السٌلطة نهبت ثروة بالكٌف كٌف

أٌف..أٌف قال الشعب قرفنا قرف

عكس السفة لما ترميها بعيد بتخف

السفة أفضل من إنقاذهم مليون مرة

فالنرميهم بعيد وندنكل حقة كاربة نسِف