بسم الله الرحمن الرحيم
في السلك
*سمعنا بي كذبة ابريل
*برغم انو مطلع ابريل ليس مبررا للكذب
*جاتنا كمان كذبات نوفمبر
*الكذب في فترة التنقلات كتير كترة
*قدر الشباب امام السفارات
*بالكوم والردوم
*ورسولنا الكريم عليه افضل الصلاة والتسليم
*قال في معني الحديث
*المؤمن بعمل اي حاجه الا الكذب
*ايكذب المؤمن يا رسول الله ؟؟؟
*قال لالالالالالالا
*المهم
*ابريل كضبتو واحده
*لكن نوفمبر كضاب كضب
*الشهر كلو كضب
*اسي البرازيلي وينو ؟؟؟؟
*في السفاره ولا في العماره
*ولا في السفاره الفي العماره ؟؟؟؟
*خليهو البرازيلي
*الاستغناء عن عمر بخيت ومهند والمعز
*لان الاستراتيجيه الجديدة الاعتماد علي صغار السن
*ومهند يصرح في لقائه الصحفي
*بان عماد اتصل به ليجدد العقد معه وهو الذي رفض
*وتاني يوم صدر القرار بعدم التجديد لمهند
*وجمعه من ابيي
*دي نوفمبر زاتو ما فكر فيها
*والجوهرة الزرقاء
*كضبة السنه كلها
*دي كضبه شهر ما بشيلها براهو
*الا سنه كامله
*ده بهناك
*تعال شوف بي جاي
*الغيني يصل
*الفلبيني يتصل
*العاجي يناجي
*الفلبيني غادر القروب
*الجابوني قال ما قابلت الجابوني ورجع
*التايواني احتمال يرجع تاني
*تسويق الاناني
*الاناني يرجع تاني
*الاناني يعرض فكرة الرحيل
*الفلاني يتفق مع الاناني
*الاناني يقوم فوق ويبقي سنه تاني
*احتمال عودة الالماني
*نوفمبر يا عمك
*ايها الناس
*ورد من الرشيد ان نجم كبير يستعن بالدجل للعودة لناديه السابق
*وضحها يا روشا
*السابق ولا الاسبق !!!!!
*وبعدين حكاية الفلس يضرب مريخ جمال دي نوفمبريه يا روشا
*وقصة مهاجم جنوي الايطالي ده حقيقيه ولا نوفمبريه يا روشا ؟؟؟
*تسليم اللاعبين الذين تم الاستغناء عنهم استحقاقاتهم قبل تلتين نوفمبر
*اللهم اجعلها آخر النوفمبريات
*ايها الناس
*ان كانت الانديه في العالم تدير ملفات الاحلال والابدال كما نديرها نحن في سودان العزه
*صدقوني العالم كلو زول بشيل كاس مافي
*كاس العالم احسن زول يطلع التاني
*كأس اوروبا للانديه حدو دور الاربعه
*كاس آسيا
*زول يشمو مافي
*خليجي ده
*كان قطر ما شالتو
*كان شالو الحكم ومشي
*ملفاتنا نديرها بطريقة تشبه شراء الخرفان
*مامحددين دايرين شنو ولا منو
*ولا عارفين قروشنا كم
*دايرين نعزل البهيمه ونتفق
*حتي بعد داك نكوس لينا دين
*نمشي الزريبه
*نجس ده ونجس ده ونجس ده
*نخلي ده قروشو كتيره
*اتنين مليون ليه
*العربي ده جنه
*وداك قرج بحتاج فحم
*هو وينو الفهم
*اقصد وينو الفحم
*وده ما بخت لحم
*ولما نتضايق والعيد يكبس
*نخم لينا حمل باردب قروش
*نعزلو عزل ليل
*دفن الليل اب كراعا بره
*ونجي نتورط بيهو
*لا بضحي لينا
*ولاعندنا طريقه نجيب غيرو
*نتبالي بيهو كده بس
*الله يكون في عوننا
*الانتقالات عندنا عنتريات ونتمها نوفمبريات
*ونتخارج بدري من كل البطولات
*اللهم حلنا يا رب
*ايها الناس
*ان تنصروا الله ينصركم
*اها
*نجي لي شمارات واتلي الخرتوم
*كان شفت يا والينا
*تاني قصص لحم الحمير رجعت لينا
*امس في الواتس رسلوا لينا
*منتجات حميريه كانت في طريقها لتسوق الينا
*شي بريقر وشي مارتديلا يا والينا
*بالله الحمار بعرف مارتديلا يا والينا ؟؟؟
*وشي كفته جاهزه تتحمر لينا
*وسجوك شدة ما احمر بحمر لينا
*ومن لحم الحمير اظننا اتملينا
*بس الخوف يا والينا
*هوت دوق ضنب الحمار يكون في حشا لينا
*وضنب الحمار طويييييل يا والينا
*كان عملوهوا هوت دوق كلنا بكفينا
*هوت دوق ضنب الحمار ده البودينا
سلك كهربا
ننساك كيف وهوت دوق ضنب الحمار ميته وخراب ديار
والي لقاء
سلك
b_silik@hotmail.com
