فى أزمة كوبا 1962 وبالمناسبه فيها شبه كبير جدا من ازمة اوكرانيا الحاصله الان وطبيعة الصراع بين الروس وحلف الناتو وسياسة حافة الهاوية (دا ما موضوعنا الان).
المهم فى عز الازمة وتصاعد الخطاب السياسي وحصار كوبا وتحريك السفن الروسية كان فى غواصة نوويه روسيه جوه المحيط قريب من امريكا .. فاقده اتصال مع قياداتا فى روسيه الامريكان اكتشفوها وبدوا يرموا تجاها متفجرات عشان يجبروها تطلع السطح ضباط السفينه كانوا عارفين حالة التوتر واقتراب اندلاع الحرب قبل يفقدوا الاتصال لمدة 48 ساعه..
فاعتبروا الحرب اندلعت وان الامريكان مستهدفنهم وقالوا طالما خربانه خربانه (التمطر حصو) علينا وعلى الامريكان واصلا الحرب بتكون قامت والنووى اشتغل والدنيا قربت تنتهى نحن كمان نفك صاروخ نووى فى الامريكان .. واحد من الضباط الثلاثة المطلوب موافقتم على الاجراء قال ابدا الحاصل فوق صراع سياسي ونحن ما عارفين الامور استقرت كيف وقصة (تمطر حصو) دا كلام غير مسئول لانه دا اجراء لو حصل بتحصل كارثه للعالم كلو ..حميدتى وبرهان ومفضل بتاع الجهاز وابوهاجه وكمية من الحمقى قالوا شرف الجيش والجنجويد وتمطر حصو و (فاسيلى ارخيبوف) قال بلا عبط معاكم قالوا ليه ح نتهمك بالخيانه العظمى قال ليهم طز
وفى الاخر وقت الغواصة طلعت على السطح لقوا المشكلة اتحلت .. وانو سياسة (التمطر حصو) غباء وتهور وتخريب للناس والشعوب ..
فى ذات الوقت كان كينيدى بيفتش لحل سياسي و الجيش شغال ليه (رش كوبا) ارح ندرشم ونمسحم من الوجود رغم انهم عارفين فى خبراء سوفيت والامور ح تطور.. قال ليهم لا ..ستين يمين.. قاموا رسلوا طيارة اخترقت المجال الجوى السوفيتى عاوزين الروس يقشطوها ويحرجوا كيندى الروس طاردوا الطياره لامن خرجت من المجال الجوى وقيادة سلاح الطيران الامريكى قالو الزول ما قصد وفقد الاتجاه.. وكينيدى عمل اتفاق مع الروس والعالم استمر.
المهم ازمة كوبا لو خلوها للعساكر الامريكان كان امطرت حصو على العالم ولو خلوها للضابطين المتخلفين الفى الغواصة (برهان وحميدتى وياسر العطا وكباشى) كانت امطرت حصو..
ما القصة انك تكون قادر تستخدم السلاح..
الموضوع ما قوة وبس
القصة تكون عارف وفاهم ومدرك وواعى انك بندقجى يديروك المدنيين فى القضايا الوطنية وعارف الخراب الممكن تعملوا البندقية غير المدركه…
لكن لامن تكون غبي وامى وجاهل ومتهور واحمق وقايل الموضوع عنقالة وعضلات بتشوف عادى يسوقك البرهان وحميدتى اخوان وتنطط مع امطار الحصو قايل الخراب ح يتجاوزك ..
الكويس انه الحمقى ديل مافى تحت اياديهم نووى..
والكويس انه كتار اتعلموا ان الثورة لازم تكون حاسمه وحازمه واى وسخ وعفن لازم يتنضف عشان تمشى قدام.
واول من يجب نظافتهم ناس امطار الحصو لانهم غير مسئولين وغير واعين وتافهين بامتياز.
/////////////////////////
