eabter@msn.com
يالسودان سيرتك معانا
حبك ملانا واحتوانا
صديقي سنين الغربة طالت
ومابننساهو ولو نسانا
حليلة طفولتنا البريىة
فى الخرطوم نيلين حدانا
تذكر خلوتنا بتلاتة
سبيلا غزير دايما روانا
تعال ياخوي قسمنا شدت
وفي المسا نادي شليل معانا
ويوم العيد ودينا توتي
نعوم في بحيرة علي هوانا
وفي امدرمان دار الاذاعة
سميرتنا فايام صبانا
وفيها سرور و كرومة غنو
روايع هي اسس غنانا
وكنا هلالاب يعجبنا جكسا
وماجد بالاهداف كوانا
وفي الاعراس مزيكة بوليس
وسفرة مجهزة لي عشانا
زغاريد حلوة رنينة يدوي
ونعرض والشبال معانا
رجال ونسا هندامة راقي
يوري حضارتنا وعلانا
وعلم ازرق رفعوهو واصفر
واخضر يرفرف في سمانا
شمالنا تمور والتيك جنوبنا
شرقنا طلح دخن ظبانا
غربنا هشاب وتبلدي صامد
وانقارا الصبغت دمانا
تراهو البان اهدانا قامتو
ونهر النيل صلصال طلانا
ولاكن يا صديقي طفولة مرت
وعارفين مين سبب شقانا
هويتنا وكرامتنا المباحة
سحابة ذل كتمت هوانا
وبترول ما صلح لينا حالة
جلب دشمان دمر قرانا
شرق مغبون وغرب مهمش
جنوب صوت فرتق ابانا
ووسطنا محتار غالباهو حيلة
عياهو اليوم اصبح عيانا
يالسودان سيرتك معانا
حكاتك لسة محيرانا
