لا للحرب

 

 

الفاضل إحيمر
6 January, 2024

 

5 يناير 2024
نحن الشعب
بفم مليان
ومن العقلِ ومن القلب
بنهتف ونقول: لا للحرب
لا للحرب ولا للحرب
لا للنهب وللتشريد
لسفك الدم للذل للغصب
للتضليل، للتعتيم، للتجهيل
ولا للنصب.
*******
لا للحرب ....
باسم الشلة
باسم الحله
باسم المله
باسمِ ممول
باسم الدنيا
باسم الدين أو اسمٍ الرب.
*********
لا للحرب ......
نحن الشعب
ما عندنا ذنب
ليه نشبع ذل ونطفح غلب
نعيش في هموم
كُره وكرب
يتيتم طفل
تترمل أم ويفجع أب
دمنا سايل في الطرقات
وزي عزتنا
مكبوب كب
جثث مرمية في الطرقات
البوت واطيه
ينخرا دود وينهشا كلب
وحقَّاً لينا... لأجله شقينا
أيام وسنينا
ضاع في لحظه
ما بين الحرق والتدمير
وبين السلب.
******
لو عاوز تحكم
تعال بالدرب
اعمل خطه وشكِّل حزب
عشان تخدمنا لا تستخدمنا
تبقى السيد وشعبك (عب)
تعيش في قصور
بذخ وفجور
ونحنا هنا بؤس وضنا
جوع ودموع
لا تعليم ولا ريحة طب
*****
لا للحرب .....
خلونا نعيش
في أمن وحُب
مش ذعر ورعب
نبني نعمِّر وطناً رحب
خيرو مدفق شمال وجنوب
شرقو وغرب
يكفي الكل ويغنيهم تب
بدل الغل نزرع فل
وبدل الحقد نشتت حَب
عشان كلنا نأكل رطِباً طيب
وكلنا نشرب حلواً عذب.
الناس حوالينا
طايرا عديل
تسابق الشهب
ونحنا هنا وطنا ينازع
بدل نلفاهو.. نتنازع
واقعين في بعض
شتيمة وسب
تلفيق تدليس
إفك وكذب
وبدون مفهوم.. شدِّ وجذب
ومن غير رحمه
طايحين في بعضنا
بطش وضرب
*********
لا للحرب في أراضينا
ما اخترناها
لا زول شاورنا ولا نحنا رضينا
عارفنها شينه
ما بتتراد ولا بتنحب
ما دي أراضينا
عجينه وطينه
رمل وحجاره
مويه وعشب
مطرح ماضينا
مكان حاضرنا
والمستقبل سهل وصعب
ليه يرضينا يتحكَّم فينا
كل من هبَّ ودب
بي حقنا يشري سلاح
بدل يحمينا بيو يفنينا..
يصير حادينا بجهاله
ونبقا مطيه.. ليهو وركب
بينا يسير كل صوب وحدب
مره شمال ومره يمين
نمرق من حفره
ووراهو نقع
تاني في مطب.
*******
نحن الشعب
كفانا هزل، دجل وجدل
لوم، تحنيس، عتاب وغزل
مؤتمرات هوتيلات اكلِ وشرب
والناس تتمنى جحراً آمن
فيهو تعيش زي فار أو ضب.
*****
رجال ونسا أبقو عقَّال
اتذكروا شايباَ ندمان ما مات
وشاباً مترع بالآمال أمل
طوَّح حلمو
رجاهو وقع في هوة وجب
وشافعاً راح لسع ما شب
كان كل مناهو يشبع لعب
ومريضاً بائس
فوق دمه وعرقه
دمعه انصب
مناو في الدنيا
كمين حبه ومسكِّن شُرب.
*****
خلو غروركم خلو صلفكم
يوم على جنب
أيقظوا فيكم إنسانية
حبة إحساس بالوطنية
وراعوا علاقة دم
جيره وقرب
واحذروا يوم
الشعب يفور
ويقلبا قلب
يجعل عاليها واطيها
وما يفضل فيها
يابس ولا رطب
ولا للحرب لا للحرب ولا للحرب
الفاضل إحيمر – أوتاوا – 5 يناير 2024

ihaimir@aol.com

 

آراء