ماوراء الكلمات .. القرد الاعمش والوزارة! .. بقلم: طه مدثر عبدالمولى
30 ديسمبر, 2016
المزيد من المقالات, منبر الرأي
64 زيارة
والحكومة السودانية او حكومة المؤتمر الوطنى .والتى فيها الكثير من حيل ومكر وخداع الثعالب .وتلون الحروبية ونعومة الدبيب .اذ ما أرادت ان تشغل الناس من حولها بشئ.شغلتهم بشئ عكس الذى تريده.ومن قبل شغلت الناس والرأى العام بقصة التوالى السياسى.وفى الخفاء و(بالدس )كانت تخطط لامر اخر. وفى زمن الحوار الوطنى شغلت الناس بل مازالت تغشلهم بحكاية منصب رئيس الوزراء..بينما(فلبى وعقلى)يقولان لى انها تخطط لاشئ أكبر من ذلك المنصب. المتعارك عليه من قبل الاحزاب والحركات المتمردة التى شاركت فى مايسمى الحوار الوطنى.وهذا المنصب قال عنه القيادى التاريخى (وايه حكاية القيادى دى كل زول تسالو شغال شنو يقول ليك انا قيادى تاريخى.يا اخونا مافى قيادى جغرافى او فيزيائى او حتى تدبير منزلى؟) المهم ان القيادى التاريخى بحزب المؤتمر الوطنى الدكتور نافع على نافع قال (وهذا الرجل الكلام العلى لسانه هو الكلام الواجب النفاذ ) ان منصب رئيس الوزراء (حق) المؤتمر الوطنى ..بإعتبار ان الابن يسميه ابوه..وطبعا الاحزاب والحركات المتحاورة مع المؤتمر الوطنى (نقرضت نقريض الحمار)ثم هاجت وماجت ثم هدات فى إنتظار رئيس الوزراء.وبعد ذلك ريما يكون لها رأى اخر والله اعلم.وحرام ان تطلع من مولد الحوار الوطنى دون حمص او ترمس. ولكن لماذا كل هذه الضجة وهذا الصراخ والصراع على منصب.قال عنه المحللين السياسين والخبراء الاستراتجيين بانه منصب تشريفى وانه لا يسمن ولا يغنى من جوع.واذا كانت هذه التحاليل صحيحة (وطبعا تحاليل كثير من المحللين والخبراء تشبه الى حد بعيد تحاليل بعض المعامل الطبية. فى خطاء الفحص والتحليل)وانه منصب لا قيمة له .فلماذ قامت السيدة الدكتورة بدرية سليمان باجراء اللازم من تعديل فى الدستور؟ثم دخلت به الى البرلمان .ومن ثم حُظيت تلك التعديلات بموافقة ومباركة اغلبية ساحقة من نواب الهيئة التشريعية.ماعدا خمس من النواب الرافضين و الممانعين لاسباب.قد تزول بزوال السبب..وفى علمنا الظاهر انه لا يوجد نائب يرفض او يمنع اى شئ من المرور من فوق منضدة رئيس البرلمان. وقيل ان القرد الاعمش.كان مارا بشارع البرلمان .وجاءت سيارة سوداء فارهة.فاطاحت بالقرد خارج الاسفلت.فقام القرد ينفض الغبار.من جسمه وإلتف الناس من حوله. وسالوه انت كويس؟
.نشترى ليك نضارة جديدة؟ ولا نعمل ليك عدسات لاصقة ؟ولا جراحة بالليزر.؟. والقرد سارح بعيد فقالوا له نجيب ليك تفاح لبنانى؟والقرد لا يجيب..نجيب ليك نبق إيرانى ,والقرد صامت.نجيب ليك موز صومالى. والقرد لا يرد.طيب نجيب ليك توم صينى.والقرد لا يلقى لهم بالا.طيب نجيب ليك الفنانين الرافضين للعصيان يغنوا ليك.وهنا صاح القرد اوعكم تجبيو لى سيرتهم طيب داير شنو يا القرد حيرتنا………فقال لهم يا اخونا انا دايركم تكلموا لى الست بدرية سليمان تدينى منصب منصب رئيس الوزراء!!.. فإندهش الحضور من تطلعات القرد الاعمش .وقالوا له يا اخى المنصب دا حق المؤتمر الوطنى عديل كده..وكان داير ترجع الغابة ارجع ساكت!! واخيرا ألم تسمعوا بالذى قال الفول فولى زرعته وحدى وساحصده وحدى وسأكله وحدى.
و أيها الناس ثوروا تصحوا
tahamadther@gmail.com
سودانايل أول صحيفة سودانية رقمية تصدر من الخرطوم
