tahamadther@gmail.com
وهل تلد الحية إلا حُيية؟
(1)
خط الفقر.ليت الذين يعشيون فيه.يمسكون به (قوى وشديد)حتى لا يروح منهم.
ثم لايجدون خطاً يعيشون فيه.!
(2)
س//متى سيرفض الرئيس السودانى المشير عمر البشير.الترشح للانتخابات؟.
ج//عندما يرفض الشعب السودانى الشقيق الجلوس فى البيوت.
(3)
قال لصحابه وهو يحاوره (الليلة ح اعمل عملية ماعملها ابليس)وفى المساء.وقف صاحبنا امام القصر(بضم الصاد)ورفع صوته قائلا( يا اخى كرهتنا العيشة.
يا اخى اكلت حقوقنا.يا اخى مامعقولة انت لا بتحس ولا بتشعر؟.انت مالك زول كول كدا(كول بمعنى بارد)يا اخى انت غير الوعود ماعندك حاجة؟.يا اخى احنا صبرنا ذاتو كمل .عاوز فينا تسوى شنو أكتر من كدا؟كل يوم توعد فينا بكرة بحل ليك مشكلتك؟.وبكرة حيكون احسن؟.يا اخى انت وقت مابتقدر على الشغلانية دى وماقدرها مالك ماسكها؟)وفجأة قبضه الحراس.وسأله كبيرهم(دا شنو الكلام القاعد تقول فيهو دا؟)وضحك وقال لهم(كلام شنو؟)وقبل ان يكمل كلامه.وجهو له لكمة طرحته ارضا.فقال لهم عليكم الله براااحة وهدوا اللعب..والله انا كنت بتكلم مع واحد صاحبى مشترك معاى فى مشروع.وداير منه يدنى نصيب فى المشروع دا كل الحاصل)فقال له كبيرهم امشى اغور من هنا.وتانى لو لقيانك بهنا الله قال بقولك.
(4)
صدق الله العظيم الذى قال(إن أوهن البيوت لبيت العنكبوت لو كانوا يعلمون) وبعد هذا البيت الواهن . تأتى المجالس التشريعية الولائية.حيث الوهن والضعف متوفر فيها وبكثرة.من شقاق وإختلاف.وصراع .فهى مجالس ولائية تشريعية واهنة جداً.واقل عاصفة فى الاختلاف فى وجهات النظر.تقطع خيوطها.و(تفرتقها) (فرتقة عدوك)وتحسبهم جسد واحد.ولكن قلوبهم شتى.واهوائهم مختلفة.ومكايدهم عديدة.والسنتهم متباينة.
وأحسب أنك سمعت ماجرى وحدث فى مجلس تشريعى البحر الاحمر.ثم الجزيرة.
ثم جنوب دافور.و(لسه)الاوضاع مرشحة للزيادة.و(خليك صاحى واوع…)اقول ليك شنو ما القى عندك بيت كبريت فاضى..بشرط يكون ناصية!!عل وعسى ويكون افضل من بيوت المجالس التشريعية.
(5)
من قبل شنت الحكومة حملات شرسة على تجار العملات الاجنبية.والقت القبض عليهم.وأعدمت من أعدمت.وسجنت من سجنت.وصادرت اموال البعض..وحبة حبة.
هدأت (الفورة)وهدأ نفس الحكومة الحار.ورجع تجار العملة.بالضرورة هم معروفين ومعلومين للحكومة ولجهاز امنها الاقتصادى..رجعوا بعد ان تحوروا وتحولوا من قطط سمان.الى نمور دولارية.تلتهم كل مايضخه البنك المركزى من دولارات(يكبوها بجاى تذهب بهناك).واليوم تعيد الحكومة نفس القصة.وتحاول القبض على الرؤوس الكبيرة والتى تُدير بيع وشراء الدولار.وإحتمال كبير ان تجار العلمة أذكياء.فعرفوا بقدرة قادر ان الحكومة (بيتت)النية.للقبض عليهم.لذلك اخذ التجار.حذرهم.ومن دغش الرحمن طالعتنا الصحف.بهروب من هرب منهم.وبمن اغلق هاتفه ومكتبه.وإختفى فى (جحر ضب).
وطبعاً.هذه الرواية.لا تدخل الرأس.ولو فتحنا الرأس اربعة ضلف..واليوم إذا قالت حذام قولاً.فليس واجبا دينياً ان نصدقها..بالمناسبة سمعت احدهم يقول للدولار(كم من اهل فارقت؟.
وكم من بلاد قطعت؟وكم ايد لامست؟وكم من خامل الذكر رفعت؟وكم من مفلس أغنيت؟ وكم حكومة أسقطت؟وكم من عملة وطنية عومت فاغرقت)؟قاتلك الله ايها الدولار (الكافر.) فقد اصبحت قبلة كثير من المسلمين.الذين يستفتحون يومهم ب(الدولار عمل كام؟)
(6)
والسيد وزير الاعلام.والناطح الرسمى باسم الحكومة.والامين العام للحزب الاتحادى الديمقراطى.
د/احمد بلال.يضع قبيلة الصحفيين.بين النار او الرمضاء.فاما ان توافقوا على التعديلات الجائرة لقانون الصحافة.او ترجع الرقابة القبلية للصحف؟وصدق من قال هل تلد الحية إلا حُيية؟واللهم فك اسر وحظر دكتور زهير السراج.والاستاذ عثمان شبونه.وعجل لهما بالنصر والفرج.وردهما سالمين غانمين الى القراء والمحبين.
