الوالدة في ارض الوطن تسأل هناك وين يا ولد
الغربة طالت بيك سنين الغربة لى متين للأبد؟!
ما شفتا أمك من زمان ما جيتنا راجع للبلد
غبت من عيني وليد واصبحت والد وليك ولد!
الغربة لى متين يا ولد متين حترجع للبلد
القصه ايه يا ود حشاي ايه حكايتك ولد؟!
يا والدة يا نبع الحنان يا والدة يا وش السعد
القصة في بيت ما اتبنى القصة في درس الجنا
القصة قعدة على جمر
القصة في هم منبسط القصة في دين بالقسط
تسديدو من جيب العمر!
الغربة لى متين يا ولد متين حترجع للبلد
القصه ايه يا ودى حشاي ايه حكايتك ولد؟!
القصة قصة زول شقي حاول انو يعيش سعيد
مرا بالمر والامر وكل عيد ما فيهو عيد
القصة بس قصة دوام والمال سلاسل من حديد
كل ما نقول تنتهي القصة تبدا من جديد!
الغربة لى متين يا ولد متين حترجع للبلد
القصه ايه يا ودى حشاي ايه حكايتك ولد؟!
القصة قصة ناس كتار القصة ما ممكون براي
القصة في حالن وقف لاماشي جاي لاماشي جاي
القصة ما قصة فلوس القصة هم ساكن النفوس
القصة ما قلة فهم القصة ما اكبر وهم
القصة واقع جد عنيد!
فيصل علي سليمان الدابي/المحامي
Faisal Addabi [fsuliman1@gmail.com]
//////////
