الكلام دا حايعملي مشاكل لكن حأقولو وأمري لله :
والله يخوانا أنا شايف انو السودان مصاب بمرض عضال وقديم ، المرض دا إسمو ” الإسلام السياسي ” طبعا المرض دا نحن ظهر لينا سنة ١٨٨٠ قبل حسن البنا والترابي بوقت طويل جدا على يد عبد الله التعايشي واللي هو أقنع واحد دنقلاوي إسمو محمد احمد عبدالله يعمل حركة إسلامية مسلحة ، حاجة كدا زي حركة العدل والمساواة ، طبعا الزول دا كان صوفي متدين بدرس الطلاب في خلوة في مناطقنا بالحلاويين وكان مارضيان إستعباد الأتراك للسودانيين وليهو حق طبعا ، المهم التعايشي حاول يقنع كم زول وفشل لحدي ما أقنع محمد أحمد عبدالله إنو يدعي المهدية ويعمل حركة مسلحة عشان تحرر السودان من الإستعمار التركي ، وسبحان الله نفس الحركة دي حاول يكررا بعد مية سنة واحد إسمو جهيمان العتيبي في السعودية واحتل بيها الحرم …
المهم الفكرة المهدية مشت في السودانيين بدوافع مختلفة وأهمها التعامل السئ من الإحتلال التركي وكانت فرصة للتحرر منهم وبالمناسبة أنا جدي الرابع مدفون في منطقة إسمها توشكي في مصر لمن صدقو إنهم حايحررو العالم بالجهاد في حملة ود النجومي ، وجدي من ناحية تانية كان أمير وقائد جيش في المهدية وحاليا في شارع إسمو ” ود البصير ” بإسمو في ود نوباوي ، طيب الحصل إنو محمد احمد المهدي دا إتوفى بصورة غامضة ، طبعا بقولو مات بالتايفوس لكن في شكوك إنو اتسمم بعد مادورو إنتهى بعد تحرير الخرطوم ومقتل غردون ، بعداك إستلم الخليفة التعايشي وحصلت قصص كتيرة مافي مجال ليها …
الإنجليز لمن جو بعد المهدية كانو محتاجين جهة تناوئ ليهم الختمية حلفاء مصر وقامو بحرفنة رجعو واحد من أولاد المهدي الهاربين بعد ما قتلو أخوانو كلهم ، رجعوهو وأدوهو أراضي كتيييرة وشركات وعملوهو من أكبر أغنياء البلد وكونو ليهو حزب الأمة ، وبعداك بقا حزب الأمة مع إستقلال السودان ضد جماعة الختمية الكانو موالين لمصر وبنادو بوحدة وادي النيل …
والحزبين ديل طبعا بستمدو شرعيتم من التاريخ دا وحسب وجود أي سوداني قبليا وأسريا ومناطقيا في ياتو طائفة منهم ، طبعا لو طلعت من الطائفتين ديل زمان كان عندك تكون من إحتمالين ( شيوعي أو إسلامي ) لكن حديثا ممكن تكون مؤتمر سوداني ، حركة شعبية ،حزب جهوي … إلخ ..
وطبعا أحفاد المهدي ناس وصال والصديق ورباح هسي منتظرننا نحن ككتلة تاريخية نصوت ليهم في الإنتخابات الجاية و مستحيل يعترفو بالقصة الخيالية حقتي دي حتى لو انفتحت ليهم نافذة على التاريخ لأنها بتهدم شرعية حزبهم وأسرتهم كووولها …
طبعا حسن الترابي عمل فيها ذكي ومشا جاب لينا نفس فكرة المهدية بثوب حديث ومعاها طبعا فلسفة وأفكار عميقة وناسب آل المهدي لشنو ماعارف صراحة عشان ماأألف ليكم ههههه
طبعا الطوائف دي ( إسلاميين ، أنصار ، ختمية ) كلهم مسلمين سنة ومالكية لكن مستحيل يعملو ليهم حزب واحد لأنهم كلهم بتجارو بالدين وبالطريقة دي الكيكة ماحاتكفيهم … والديموقراطيات بتفشل لمن يجوها الناس المامقتنعين بيها
لمن قلت ليكم أصعب حاجة حاتواجه الحكومات الجاية كيفية كتابة التاريخ أنا كنت قاصد الكلام دا لأنو تاريخنا مبني على الأكاذيب !!
قلتو لي عايزين ديموقراطية ؟؟؟
maristan22135@yahoo.com
//////////////
