تأملات
• انتو ناس الإنقاذ ديل مش قالوا انهم لقونا شحادين!
• ما رأي السيد مصطفى عثمان إن طالبناهم بأن يرجعونا لي شحدتنا!
• مش أحسن نشحد نحن كمواطنين عاديين كل حسب حاجته الفعلية، بدل ما يشحد كبار مسئولي دولتنا باسمنا جميعاً.
• ياخي ديل خلونا أضحوكة قدام العالم.
• معقول يا ناس جوع وكشف حال كمان!
• وزير ماليتنا الهمام ما صدق لقى ليهو فرصة وسط نظرائه العرب فراح يحدثهم عن النقص الكبير في المال نتيجة لذهاب بترول الجنوب.
• ما قلتو نوبا!
• مش ده نفس الوزير القال لينا أكثر من مرة أنه فعل كذا وكذا وكذا لتعويض الفاقد من النفط نتيجة لانفصال الجنوب، ولا غيروهو يا ربي؟!
• وياريت الشحدة اقتصرت على وزير المالية باعتباره مسئول عن خزينة دولة المشروع الحضاري الفارغة.
• فها هو وزير خارجيتنا أيضاً يمارس الشحدة القالوا جوا عشان ينتشلونا منها!
• قبل أيام شكى السيد كرتي للآخرين من مخاطر الدين الهائل الذي قال أنه يفاقم من صعوبة الوضع الاقتصادي في السودان.
• ويظهر أنه ما وجد تجاوب فقال أحسن يحشد المزيد من عبارات الاستجداء خاصة أن باريس بعيدة وتذاكرها مكلفة والناس ديل متقشفين خااااااااالص وقد ما يتمكن يجيها راجع قريب.
• قال ليهم ” لا يمكن للعالم أن يتراجع ويراقب بكل بساطة الاقتصاد السوداني وهو ينهار بحجة أن الخرطوم لم تعارض انفصال الجنوب.”
• والله حكاية.. يا دوب عرفتو انكم محتاجين تتعاملوا مع العالم!
• وين شعارات الزيف والضلال من شاكلة ” نأكل مما نزرع ونلبس مما نصنع ! ولا دي خلاص زمانا فات وغنايا مات!
• معقول يا سعادة الوزيرين أنتما تشحدان بي جيهة وفي الجانب الآخر يقول السيد نافع مساعد الرئيس أن محاولات تحريك المظاهرات في الخرطوم بدعوى ارتفاع الأسعار ما هو إلا تحريض للإطاحة بتوجه الحكومة!
• يعني شنو يا نافع!.. عرفنا زولكم داك قال الما عندو قدرة لشراء أرض في الخرطوم يديكم عرض أكتافو ويمشي الأقاليم، أها انت كمان داير الناس تبطل أكل ولا كيف؟!
• يعني انت ما شايف انو في غلاء معيشة يا سيد نافع؟!
• دايرين تشحدو كيف يا وزيري ماليتنا وخارجيتنا وفي الجانب الأخر مازال السيد رئيس الجمهورية نفسه يجادل ويحاجج.
• كيف لكما أن تشحدا باسمنا وسعادة المشير يقلل للجماهير بمحلية البطانة من الآثار الاقتصادية المترتبة على الانفصال ويقول لتلك الجماهير ” أن السودان لن يفقد كثيراً ، مضيفاً أنهم ساعون لسد الفرقة وأن الدولة ستأخذ حقها من البترول وإذا رفض الجنوب منحنا حقنا في عبور النفط فليغلق خط الأنابيب من هناك”
• انتو يا ناس حكومتنا ما سمعوتو بي حكاية انو العالم بقى قرية دي ولا شنو؟!
• يعني قايلين كلام جوه ما بتسمع بره ولا كيف؟!
• ولا تكونوا يا ربي لسه فاكرين الناس بره ديل أغبياء ساكت وبصدقوا أي كلام!
• كده قبل ما تريقوا ماء وجوهنا أكثر بشحدتكم المخجلة حددوا انتو دايرين شنو.. يعني شحدة ولا اعتماد على الذات؟!
• لأنو بالطريقة دي ما في زول بديكم الحبة.
kamal elhidai [hosamkam@hotmail.com]
