الشغل الشاغل بيه البلد هو انتخابات 2020 لاعادة انتخابك لدوره رئاسيه جديده حتى لو يتم تعديل الدستور وقطعا سيتم ذلك الحكومه حكومتك والبرلمان برلمانك والحزب الحاكم حزبك والقطط الشحمانه والضعيفه معاك وعشان يبقى فيها شوية مشهيات عملتو افلام المنافسين والرافضين من نفس المله والشجره الاصليه وهم نفس البشربو بيه المويه البختو فى المزيره
طيب انا الغلبان ده عايزك تقنعنى عشان وراء الستاره اديك صوتى بثقه طبعا حاتسالنى اقنعك كيف يعنى؟! طيب يالبشير اقول ليك
انت حتكون حاكمنا لغاية يوم الانتخابات ليك 31 سنه وطبعا المساله حساب وانا وانت نحسبها
العشره سنوات الاولى عملت مالم يعمله اى نظام حكم السودان من قبل قتل وتشريد وارهاب ونهب اموال الناس لمواطنين لم يحملوا مجرد مطوه
بعدها فصلتوا تلت البلد جنوبنا الحبيب وضبحتوا كرامه وسلامه وهللتوا وكبرتو وناس اهلنا الفى الغرب وجبال النوبه والنيل الازرق ده وجع براهو
مشاريع البلد كلها راحت بين الجيوب الجزيره سودانير والخطوط البحريه وباقى الفكه ديه غير اصول وممتلكات الشعب السودانى خارج السودان فى انجلترا والقاهره ووو ... اها قروش البترول والدهب ده كوم براه
الشى الجيتو بى سببه وسميتو الانقاذ بقى اسوا مما كان صفوف العيش البنزين الغاز وكمان زاد ليها صف ما ممكن يخطر على بال اكثر الناس تشاؤما الا وهو صفوف اصحاب القروش الختوها امانه فى البنوك وعديل البنوك ابت تدى الناس قروشها والشيك المرتد معروف البقاء لحين الممات يعنى فى ناس اتسجنت وعندها قروشها ماسكه الخانق البلد اها ده يسمو شنو
كلو ده كوم كمان تخصخص المؤسسه العسكريه البى سببها واسمها حكمتنا وعملت انقلابك عمرنا ما سمعنا بلد خصخص جيشه بل الحقيقه خصيتوهو من الخصى ياخى انت عشان تبقى مشير دخلت كليه حربيه ودرست اركان حرب و فى اخر الزمن تجيب واحد همباتى مابعرف الكليه الحربيه موقعها وين تديه رتبة فريق وميزانيه لا وكمان رئيس اركان الجيش الرسمى ومدير عام الشرطه والامن يدوه تعظيم سلام واى جمجمه عارفين بحصل شنو
كلو ده سبنا على جنبه اخرتها الحمدلله الما حضرها صديقى الحميم سعد الدين ابراهيم اخرتها بقت جماعه بالزى الرسمى العسكرى وعربات ومدافع ومقصات حلاقه وفى نص البلد المليانه ناس الامن حايمين وناس الشرطه رسمى وملكى حايمين وناس الجيش رسمى وملكى حايمين والموبايلات عند ناس ستات الشاى والخبر مباشره بالوتساب والفيس وصل اخر الدنيا كندا وامريكا واستراليا مافى جهة دقت سدرها وقالت توقف البحصل ديه لانو كل جهة بتعتبر ديل ناس الجمجمه وما عايزين يعملو معاهم جمجمه.... وعمل مجهولى الهويه عمايلم بمزاج ومعاها رفع فى العربات ودق..حيث تبرا منهم الجميع بما فيهم حميدتى جمجمه الخاتينو يحرس البلد..... تيب ياربى ديل جو من وين والموجع القلب يجى السيد مدير عام الشرطه يقول للناس بلغوا بدون خجله ياخى حاجه الاطفال شافوها تقول لى بلغوا معليش بلد وزير داخليتها حتى فى حزبه ما اشتغل تامين للحزب ما غريبه هو جمجمه احسن منه فى شنو بلد فيها قوات مسلحه بكامل عتادها ما قادره توقف حلاقين مسلحين بمثل اسلحتها دخلو كيف وحامو الحوامه دى كلها كيف لا استخبارات عسكريه رصدتهم مش يمكن عايزين يقلبو الحكومه لا الشرطه الحايمه بعرباتها ونقاط ارتكازها تبلغ رئاستها بالحاصل لا قوش ناسو يبلغو حتى حميدتى ذاتو اذا قلنا ديل كلهم معتبرينو ناس جمجمه وخايفين منه وهو يعلم انو ديل ما ناسو ليه ما اتصدى ليهم وبرضو يجى بدون خجله مدير عام الشرطه يقول الناس غلطانه ما بلغت ليه
لا والنصيبه انو حصاد هى لله ومابعرف الهجره لله وحاجات تانيه برضو لله ..النتيجه ناس الله بتاعين الخلاوى بقو يعملو عمل اهل لوط والعياذ بالله دى غير العملو ودخالتك قبل كم يوم خمر وحشيش وبنات وغير المبانى فى دبى والقاهره وماليزيا ودهب ودولارات.... شفيق يا رااااجل تقول لى عايز تقبض الكدايس الشحمانه وهى خربشتك لما نسيت الوضوع ياخى خلى الكدايس ترعى فى الفيران قاطع رزقها مالك
يا البشير بصراحه كده دى دفتر حسابك ورينى حسنه واحده تخلينى اجيبك تحكمنى تانى ان كان فى حاجه لسه ما سويتها ياخى سوى سواتك وخلينا من مسالة انتخابات ووحع راس طيب ياخى ناس البرلمان ما يصدروا قرار من عندهم بتعديل الدستور لتكون الرئيس مدى الحياة ماهى ما فارقه انت عامن اول جيت بانتخابات وكمان بالمره نقفل بلف الانتخابات عشان ما تجى لمره الجايه برضه نكرر الفيلم
ماهى كده كده اذا جاملت الناس وعشان تكف العين ممكن تقول انك فزت بنسبة 55% ما بطاله وفيها شويه غشة ديمقراطيه وكيتا لناس لاهاى المابجيب سيرتم
البشير بالله فضها سيره وباقى القريشات دى خليها للمفيد وخليك فى حالك وكرسيك ...هو فى حد سالك او حتى يقدر يسالك ما جمجمه قاعد البقول بغم منو؟؟ قومت النفس لزومه شنو!! وسير سير يالبشير حتى المقابر يا بشير والاعمار بيد الله
انا شخصيا عهدك على لو اقنعتنى بسوقك من يدك وادخلك القصر واى واحد يعمل جمجمه حتى لو جمجومى ذاته الله قال بى قولو بس كيف تقنعنى انك ال 30 سنه الفاتت ما خليت السودان صحراء العالم وعدمتو القدامو والوراه
waladasia@hotmail.com
