من الحفير إلي حليوة .. بقلم: د. زهير عامر محمد /المملكة المتحدة
28 يونيو, 2019
المزيد من المقالات, منبر الرأي
24 زيارة
***
ليل الظلم الكالح ، عهد القهر المهين ، عهد الجنجويد وبقايا كتائب الظلام ، تنشر الرعب والخوف والاستبداد في قلب الخرطوم ، وإمتداد ربوع السودان ، عهد أسوأ من عهد المغول والمالياك ، أبشع من أيام الخديوية وحملات الدفتردار الأنتقامية ، دموية أكثر من حملات الأنجليز لإنقاذ غردون الأسير ، عهد حميدتي والبرهان ، أذيال البشير والكيزان ، تستبيح حرائر السودان .
الفجر الساطع آت وكلنا إيمان ، النصر الحاسم قادم ، الأعلام البيضاء ترفرف في سماء الخرطوم ، حتماً ستسود قيم الحرية والعدالة والمساواة ، حتماً سيعم السلام وتتحقق الديمقراطية ، والدولة المدنية ، يحكمنا القانون ويظلنا العدل ، ونتنفس عبير الحرية .
***
في نهاية التسعينات زرت قرية “حليوة” في قلب الجزيرة الخضراء ، ومنذ نعومة أظافري شكلت طيفاً جميلاً جداً من الذكريات الجميلة العطرة ، تتجدد مع محمد طه القدال ، يأخذني معه في الطمبارة والغناي :
نحن أهل الفرحه جينا
لا المدامع وقفتنا ولا الحكايات الحزينه
لما درب الرايحه جابنا في هذي المدينه
يا ولدي الدروب شقاقه بحر التيه
ويأخذنا القدال في دروبه ومسالكه:
ليك درب و لا دربين مساك الدروب ضهاب
ليك قلب و لا بالين سواي القلوب كضاب
ليك ضهر و لا سرجين هدام السروج وقاع
شق يا ولدي بحر التيه بتدردر و تتودر
و لامن يوم علي تاياتنا ديك ترسى
نعزك بالقبيل ذاخرنه ليك
الشوق بحر يا ولدي
بحر التيه
وتأتي النصائح مِن مَن خبر الدروب والشدائد:
قتليك العليك أدرابه لا تنغش و لا ترضابه
في الزمن الزميم و الكي يسوقه خلاف عشان الني
عليك الدور و تصريف الليالي بدور
تشيل ما شلنا من الهم
و لامن دمعه ترمي الدمعه فوق دربك
روح يابا
و أبقى قفاك لا تعاين
و لا تعاين على موطاك
و لا تندم على خطوا تملي مشيته ليقدام
و ابقى العاتي زي سنطتنا
زي صبرا نلوك فوق مره زي الزاد
لا شيتا نزل في الجوف و لا برجع و لا بنزاف
و اركز للبجيبها الريح تقيف أنت و يشيلها الريح
***
سيذكر التاريخ أنه في أيام قلائل ، وقبل أن يطيح الشعب السوداني بالجنجويدي حميدتي ، والسفاح البرهان ، أن رجلاً من عامة الناس ، وقف شامخاً كالطود ، كجبل عوينات ، ملتهب الدواخل كصحراء العطمور ، متوشحاً جلبابه الابيض ، وفي وسط سوق البرقيق ، شمال مدينة دنقلا ، وشرق مسقط رأسي وموطن صباي ” الحفير” ، يحمل علم السودان ، وينشد ويردد أجمل الحروف والأشعار والألحان ، ملهماً ومشعلاً ، لثورة جيل جديد في السودان و من قلب سوق البرقيق.
الحفير والبرقيق وكرمة البلد وكل الأماكن في شمالي الحبيب ، أماكن في القلب ، لم تكن تخطر ببال أبنائها-وبكل أسف-في العهد البائد ، بكري وعبد الرحيم محمد حسين إلا في أيام الكوارث والفيضانات ، وكان كل مافي جعبتهم بعض جوالات الإغاثة البالية القديمة ، تبعث من علي البعد لأهلي المتعففين ، زراع الأرض وتارسي النيل .
***
ومازلت في حضرة القدال وقد تجملت حروفه بأداء عقد الجلاد الغنائية :
النعمه بتعرف عاطيها
و الجمره بتحرق واطيها
بالكيله عطانا و ما لقينا
فوق جمر خطانا وما لقينا
د.زهير عامر محمد المملكة المتحدة
يونيو ٢٠١٩
zuheiramir@hotmail.com
/////////////////
سودانايل أول صحيفة سودانية رقمية تصدر من الخرطوم
