خارج النص
* رئيس مجلس السيادة عبد الفتاح البُرهان –حسب رواية صلاح منَّاع- يأمُر بإطلاق سراح السيدة وداد بابكر والتُركي أُوكتَايْ.. لو صحَّت هذه الرواية يكون الريِّس دحفس القانون!!!
* الريِّس يفتح بلاغ في صلاح منَّاع دا ذاااااااتُو ويجرجروا في نيابة أمن الدولة ويمنع اللجنة دي من دخول القصر الجمهوري، عقاباً ليهُم عشان صلاح مناع كضَّب فُوقُن هُو ونايبُو حميدتي وقال عنهم كلام ما كُويِّس (لا مُواخذة).. والنيابة تقُوم بحظر صلاح منَّاع من السفر..
* صلاح مناع -حامي العدالة في نظر بعضهم- يتحدَّى قرار اللجنة ويسافر لقضاء إجازتُو برة السودان.. أها صلاح دا زعمط القانُون ولة لع؟؟؟!!!!
* لجنة (التمكين) قبل كم يوم تفصل ليها أكثر من 200 موظف/عامل/سائق من بنك السودان المركزي بلا وازع قانوني أو إنساني أو أخلاقي أو ضكارة سودانيين كدي ساكت.. رحمك الله يا حميد الشاعر الإنسان…
* محافظ بنك السودان (الضكران) ينتصر لي موظفِينُو المفصولين تعسُّفياً ديل ويرجِّعُن إلى وظائفهم ومن المفترض اليوم الإثنين 8 مارس يكون باشروا أعمالهم في البنك…
* اللجنة ودجاجها الإليكتروني تتهمه بأنه خالف القانون وكسر رقبتُو!!!!
* أهل القانون ومنهم رئيس لجنة التحقيق في عملية فض الإعتصام نبيل أديب المحامي قالُوا اللجنة دي مُنتهِكة للقانون!!! أما الناطق الرسمي بإسم مجلس السيادة محمد الفكي سليمان فجابها كبيرة شوية.. وقال اللجنة دي سياسية وما خجلانين من كلامنا دا!!!!!
* العدالة (مُو التحَلُّل) المفروض تقول الآتي:
لو في فاسد أو مجرم أو حرامي في مؤسسة شالُوهو فرضاً من وظيفتُو بسبب فسادُوا.. المفروض مُو تشيلو وتديهُو حقوقُو وتقول ليهُو مع السلامة.. مفروض تحاااااااسبُو وتحاكموا ولة شنو؟؟؟!!!!
* حميدتي قبل فترة قال في مافيا متواجدة في البلد دي قاعْ تهرِّب الذهب.. وقالها الصحفي عثمان ميرغني بان تهريب الذهب قاعد يتم عن طريق مطار الخرطوم ويُضرب له تعظيم سلام!!! ومصداقاً لي كلامهم دا في الأسابيع الماضية إتقبضت شحنتين ذهب مهرَّبة إلى الخارج.. وتم القبض على المهربين.. وتحدَّث أردُول زعلان من بعض الجهات في تغريدتين إتنين ساخنتين ملهلبتين جاءت كما يلي:
التغريدة الأولى قال فيها: (نُواجه بعض العراقيل القاضية برفع الحصانة من منسوبيين حكوميين لإكمال إجراءات محاكمة المتورطين في قضية تهريب الذهب الشهيرة عبر المطار قبل اكثر من شهرين، نرجو من الجهات الحكومية ان تتعاون معنا في حماية الاقتصاد الوطني لا أن تتستر على المتهمين والمتواطئين)!!!!
التغريدة الثانية قال فيها: (أصبحنا محرجين أمام الشباب الذين كانوا قاموا بضبط التهريب لا نحن وفَّيناهم حقهم بدفع حافز الضبطية ولا استطعنا تحصيل نصيب الدولة ال10% من الذهب المهرب، وتلقيت أكثر من مكالمة منه يطاردنا ما وعدناه به، ولم أكن لاخرج هنا مغردا الا لأن الامر تجاوز حدود المعقول)!!!!!!
حكمة الله ما شُفنا اللجنة دي إتحرَّكَت نحو المطار ولا هيئة الطيران المدني ولا الجهات الذكرها أردول معرقلة ومعطلة محاكمة المتورطين ديل.. ولا هَمُّوا وجدُّوا السير نحو الملف الإقتصادي الحيوي دا اللِّي بي سببوا -لو ضُبِط وقُنِّن ومشى بالطريقة الدُوغرية- السودان سيلحق بالدولة القاعْ يصلها دهبنا دا في أقل من سنة.. يا ربي ليه؟؟!!!!
السؤال دا موجَّه لصلاح منَّاع شخصياً!!!!
*خارج النص:*
ناقشنا في الأيام الماضية كثيراً حكاية فصل الموظفين وتشريدهم من وظائفهم.. بعض الإخوة إستدعى قانون الظُلم العام الذي قامت بموجبه الإنقاذ بتشريد كثير من الأُسر السودانية من وظائفها ظلماً وعدوانا!!!!
يقُول ليك.. زي ما الإنقاذ عملت كدي نحن نعمل برضو حلالٌ عليهم حرامٌ علينا؟؟؟!!!
طيب إنت كدي بتكون إنقاذ2 والحكاية دي إنت ناكرها حطب وبتقول نحن دولة القانون والعدالة…
القانُون والعدالة ماب تتجزأ يا عزيزي المُدافع عن لجنة التمكين.. والظُلم ظُلمات يوم القيامة!!!!
.
.
.
*ويظل سؤالنا الدائم.. البلد دي السايقها منووووووو؟؟؟؟*
*+ لجنة التحقيق في موضوع شركة الفاخر وصلت لي وين؟؟؟؟*
*++ نسبة الأمن والدفاع في الميزانية الجديدة كم، والميزانية ذاااتة كم؟؟؟؟*
*+++ خبر الجماعة القبضوهم في مطار الخرطوم مهرِّبين الدهب برَّة شنو؟؟؟؟*
*وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟؟!!!*
jamal.trane@gmail.com
