نعيد ونكرر… حتى يفهم البلهاء .. بقلم: راشد عبدالقادر

((ويجوا انقلابيين وبرضو تسقطم))
((محاولات اختطاف تستمر سنوات))
………………
كتير جدا اتكلمت عن ان الثورة ما خط مستقيم بيمشى للامام دائما وانه مرات بيرجع ومرات بيقيف ومرات بيغير مساره بالكامل وانه الثوره معارك مستمره فى كل لحظه بيتحول جزء من الثوار لاصحاب (مصالح) بيقيفو ضد الحراك المستمر لانهم وصلوا محطتم هم واتكلمت كتير جدا عن الثورة الفرنسيه وانها استمرت فترة طويله جدا وانها فى طريقا للامام بعد سنوات جا فيها نابليون بونابرت وعمل نفسه امبراطور ..
كتار من الكانوا بينتقدو استعانتى بنموذج الثوره الفرنسيه الافق عندهم مرتبط باكذوبة (ثورة اكتوبر و ثورة ابريل) الهم عباره عن جوطة كم يوم مع مؤسسه عسكريه واحده و عدد بسيط من الشهداء يتم تسليم السلطه وخلاص .. رغم انه كل البيحصل تغيير سلطه بعد تلاته اربعه سنوات يحصل انقلاب تانى .. ما بيكون فى اييي تغيير حقيقي حصل .. يعنى لاحظ مثلا بعد ثورة ابريل جات حكومة الصادق ١٩٨٦ ما كملت تلاته سنوات وحصل انقلاب ١٩٨٩ مع انه الاحزاب كانو شويييه.. والناس كسرت حنك الثورة
التلاته سنوات بتاعت الصادق دى الجيل دا مقضيها ثورة فى الشوارع مع جوطه بتاعت مية حزب وجيش مؤدلج وفاقد توازن وحركات مسلحة وملايش جنجويد متحكمه وكثافة بتاعت تدخلات اجنبيه..
ولسع الثورة مستمره..
استمرار الثورة دا والروح النضاليه والرغبه فى التغيير هو البيفرق بين الانتفاضات والثورات..
الثورة طريق مستمر بتحصل فيه كميه ضخمه من التقاطعات والتفاعلات وسقوط رموز وتحالفات ومحاولات اختطاف تستمر سنوات.. البيتحكم فى النجاح والفشل روح الاستمرار دى
الخلت الثورة الفرنسيه تستانف مسارا بعد اليعاقبه وبعد نابليون..
الروح البتخلى الثورة السودانية تستانف مسارا بعد سقوط البشير وفض الاعتصام و محاولات الالتفاف المستمره وسقوط الاحزاب وانقلاب البرهان.
عشان كدا اغلب الضد الثورة والعاوزين يدوا دروس والبيعتبروها انتهت ياهم ناس (اكتوبر/ ابريل) الانتجو استمرار الفشل لضيق الافق والمخيال الوطنى حقهم وضيق التصورات.. وظنهم ان الثورة بتنتهى بوصول حكومه بعد الانتفاضه ..
وما عارفين ان الثورة ما بتغير حكومه وانما بتغير وطن وانسان.. عشان كدا بتجيب حكومات وتسقطم ويجوا انقلابيين وبرضو تسقطم لاااامن يتغير الوعى العام ويتغير الوطن
ودا برنامج الثورة السودانيه دى.