حكى لنا الزول الساي الما بقعد ساي وما بسكت ساي نكتة قوية جداً عن كديس الانقاذ فقال:
كان في مسطول معارض عندو كديس معذبو عذاب شديد في الخرتوم، سماهو كديس الانقاذ! حاول يربي حمام في البيت ، كديس الانقاذ اكلو كلو وقبل على حمام الجيران كمان وعملو ليهو مشاكل كبيرة في الحلة!
المسطول قرر انو يتخلص من كديس الانقاذ نهائياً لكن كلما يجدعو بعيد يلقاهو رجع البيت!
المسطول قال لى مرتو : الكديس دا يا انا ياهو في البيت دا!
مرتو قالت ليهو : يا زول اعمل فيهو الدايرو ، غرقو ، حرقو اعمليهو اي نصيبة زمان تفكنا منو انا ذاتي الكديس دا عمل لي نفسيات أي لحمة تجيبا لي يسرقا مني!
المسطول قام قبض كديس الانقاذ دخلو في كيس وشالو جدعو في نص سوق الحرامية في السوق الشعبي … رجع!
شالو وركب بص الخرطوم مدني وجدعو ورا كافتيريا الكاملين … رجع !!
شالو وركب بص بورسودان وجدعو في البحر الأحمر … برضو رجع !!! المسطول قفلت معاهو !!! قام شال كديس الانقاذ لفاهو ببطانية ورماهو في نص الصحراء وشرد !!!!
بعد خمسة ساعات اتصل بالموبايل على مرتو …. وسألها : الكديس رجع؟! قالت ليهو : ايوه رجع اهدا قاعد جنبي!!!
قال ليها : الله لا يكسبو ولا يبارك فيهو ، ادي الموبايل بتاعك لى كديس الشوم خليهو يوصف لي الطريق أنا ضعت في الصحراء وما عرفتا ارجع البيت!!!!
فيصل الدابي/المحامي
menfaszo1@gmail.com
////////
