Moh_Ahm_2006@mail.com
يا أهلنا… أسطوانة الغاز سعة 12.5 كيلو ب 75 جنيه.
الطن يحوي 80 أسطوانه، وهو بالتأكيد أكثر من كدا لأنو حكامنا الشرفاء مؤخرا بقوا يا يملو الأسطوانه بسعتها الكاملة، وفي كثير من الأحيان بتكون الأسطوانه فيها 11 كيلو أو أقبل كمان.
المهم ما علينا، خلينا في المعلن. الطن فيهو 80 أسطوانه، يعنى سعر الطن للمستهلك في السودان يساوي 6000 ألف جنيه.
السعر الرسمي للدولار من بنك السودان المركزي بتاع اليوم 1 فبراير 2016
http://www.cbos.gov.sd/en/currency/category/16
يعادل 6.0771 جنيه للدولار…. مااااااشي، قولو 6.1 جنيه للدولار… قول بسعر البنوك التجارية عديييل 6.5 جنيه للدولار
يعني سعر الطن يبقى 923 دولار.
يالله يا شطار يا بتاعين وزراة المالية يا بتاعين وزارة النفط أو يا بتاعين القطاع الإقتصادي في المؤتمر الوطني، أقنعونا إنو السعر الحقيقي للغاز عالميا الآن!!!!!!
سألت واحد قريبنا متبحر في شغل البترول عن الموضوع دا، بعد ما أرغى وأزبد رطن لي كتيييير بالإنجليزي، شي فهمتو وشى كثير جليتو… المهم خلاصة الموضوع قال الغاز بتاعنا البنطبخ بيهو دا فيهو نوعين من الغاز مخلوطين بي بعض. أغلى واحد فيهم حاليا سعرو وبيخش عندنا في السودان في انابينا البنطبخ بيها دي بي نسبة 30% ولا يتجازو سعرو 390 دولار للطن والتاني أرخص ما بيتجاوز سعرو الأيام دي 320 دولار للطن. يعني لون قلنا خمسين خمسين نسبة الخلط السعر العالمي بيبقى في حدود 350 دولار للطن.
923 دولار تقسيم 350 يبقى الناتج 2.6 ودا معناتهو إنو حكومتنا الغير رشيدة بتبيع الغاز للمواطن (والهي أصلا قالت مرقت منو وحررتو عشان القطاع الخاص يشتغل فيهو) بي أقل شي ضعف سعرو العالمي….!!!!!!!!؟؟؟؟؟؟؟؟؟؟؟
وأظن يا أولاد بدلدي وبناتو عارفين فرق السعرماشي وين حايكون…
أنا متأكد إنو الموضوع بيكون فيهو كلاممم تاني كثير، لكن للأسف يبدو إنو ما عندنا ناس متخصصين يفضحو الحرامية ديل… أو العارفين الشغلة قابضين تقيييييييل….
خلاصة الموضوع يبدو إنو مع أسعار البترول الوقعت دي والخم واللغف الكان حاصل دق الواطه، عشان كدا لازم الجامعة يخترعوا ليهم شغله يمصو بيها دم المواطن المغلوب على أمره…
شحتنا الله يا كيزان يا حرامية يا الماعندكم مثقال ذرة من رحمة بالشعب الصابر دا… اللغفتو كلو من البلد دي تصروفهو علاج سرطانات وفشل كلوى وأمراض مستعصية ما يكفيكم…
قولوا أمييييييييييييييين يا سودانيين……. ووصو الشفع الصغار بالذات يقولو أمييييييييييييييين عليكم الله لانو شكلو نحن موضوعنا بقى باااااايظ ودعواتنا ما مقبولة ليها 26 سنه.
الله يريحنا منكم ويوسدكم االشبر الليلة قبل باكر…
