tahamadther@gmail.com
بلغنى أيها الملك السعيد (السعيد زيك ضارب الترطيبة. وماهاميك المصائب والكوارث العايش فيها شعبك) ذو الرأى السديد (سديد بتاع رأسك قلبك؟والله سديد فى واد وانت فى واد.عامل رأسك الغليد المليان بالفارقة والمقدودة) وهنا صاح شهريار: وقال (انت ياحرمة تطنطى تحت تحت تقولى فى شنو)؟ومدت شهريار بوزها شهرين لقدام .وهمساَ قالت(حرمت عليك عيشتك ياوهم ياكرور) ثم رفعت صوتها وقالت بلغنى ايها الملك السعيد ذو الرأى السديد.انه فى بلاد السودان. والاسم الحركى لها بلاد مابين المندسين.وهنا وبعد ان جر شهريار نفس طويل من الشيشة الملوكية المطلية بالذهب والفضة .وبالله قالوا ليك شهريار دى عندو شيشة عملاقة .زى الشيشة التى كان يمكلها الانقلابى الفاشل نائب الرئيس المخلوع بكرى حسن صالح..قاطعها شهريار وسألها(ليه سموها بلاد ما بين المندسين.؟) فقالت شهرزاد لان الرئيس المخلوع البشير وخلال ثلاثين سنة كان كلما خلعه شافع روضة او خرجت عليه مظاهرة طوااالى وصفهم بالمندسين.وبعد داك وبعد قيام الثورة المباركة.صارت كلمة المندسين محببة للفريق اول محمد حمدان دلقو.نائب رئيس المجلس العسكرى الانتقالى.وصار يلقيها ذات اليمين وذات الشمال..المهم بلغنى ايها الملك السعيد انه وبعد إزالت حكم المخلوع البشير وتولى المجلس العسكرى الانتقالى مقاليد الحل والربط.صارت بلاد السودان هى بلاد الانقلابات.وبالله يامولاى صارت المحاولات زى الرز!!.مرة كل اسبوع او مرة كل اسبوعين.
ولو ماخاف الكذب اقول محاولة إنقلابية مرة كل ست ساعات.والله يامولاى بالطريقة دى وبالمحاولات الانقلابية المتوالية دى والله السودان يمكن ان يدخل موسوعة جنيس للارقام القياسية.وهنا تملل شهريار وقال لها خلينا من موسوعة جنيس.اها المحاولات الانقلابية دى صحيحة ولا مفبركة ولا مسرحيات ساكت من الاسمو شنو دى المجلس العكسرى الانتقالى ؟فضحكت شهرزاد حتى بانت اسنانها التركيبة ديك.وقالت (اجى يامولاى مفبركة كيفين.و؟ومسرحيات كيف يعنى؟والجهات الامنية قالت قبضت على المشاركين فى كل المحالولات الانقلابية الخمسة.عشان كدى اى زول ليهو صلة بالانقلابين تلقاهو هسع بلا راسو.او قفل تلفونو وشرد.
وبعدين المجلس العسكرى الجبارو على فبركة الانقلابات شنو؟زول قال حصلت خمس محاولات إتقلابية وقال انو الانقلابيين دايرين يجهضوا ليكم ثورتكم وهى لسها فى شهرها السادس.ويامولاى تعرف انو المحاولة الانقلابية الاخيرة بتاعت ناس عبدالمطلب وناس بكرى وكرتى والزبيروكبار نجوم الحركة الاسلامية وكبارنجوم الحزب البائد المؤتمر الوطنى.خلتنى اقول انو العملية بقت كبيرة جداَ.وبعدين المجلس العسكرى الانتقالى ذاتو غلطان؟فقال لها شهريار غلطان كيف؟ شفتى ليك مسؤل كبير قاعد يغلط؟وارادت شهريار ان تتفاصح ولكنها لما رات السياف يقف خلف الملك وهو يهز فى سيفه.قالت.ماشفت لى مسؤل كبير غلطان.ولكن المجلس العسكرى نقول قصر.والشعب ماسمع بمحاكمة اى واحد من الانقلابيين .وقصر ايضا عشان ماسمع كلام الثوار الذين طالبوا بالقبض على كبار رؤوس الحركة الاسلامية وكبار رؤوس حزب المؤتمر الوطنى.فهم سبب الاذية والمصائب ولكن المجلس العسكرى عمل نايم.ماجاب دم الزول الكتل الصايم.وأكيد انت يامولاى لو كنت محل المجلس العسكرى الانتقالى.وقام شخص واحد بمحاولة الانقلاب عليك او الخروج على حكمك.كنت اكيد قطعت راسو.) والتفت شهريار فرات الملك شهريار وقد راح فى سابع نومة.فصاحت(سجمى الراجل نام قبل بعرف مصير ناس بكرى وكرتى والزبير واسامة .)ثم دعت عليه(نوم نامت عليك حيطة مسلحة بسيخ 32 لينيه.وخرصانة حبة كبيرة)!!
//////////////////
