سفيرتنا في اذربيجان د. عوضية انحني اجلالا !!
بتجرد
استهلالة:
الدبلوماسية السودانية في زمان ثورة ابريل... يشهد الله قريت ودموعي نزلت وانا الشيخ الستيني.. شكرت الله اني حضرت زمن الدولة ال بتحب مواطنيها.. انحني وارفع لك القبعة د. عوضية سفيرتنا العزتنا ورفعت هامتنا وجعلتنا نفخر بسودانيتنا!!؟؟
البوست:
السلام عليكم .. انا الليلة عاوز احكي عن حاجة حصلت لي انا وأسرتي وجد مامصدق الشي الحصل معاي نهائي لانو انا اول مرة في عمري اسمع بحاجة ذي دي حصلت مع اي شخص على مستوى العالم وليس على مستوى السودان فقط .. انا سوداني مقيم بدولة الامارات العربية المتحدة مع اسرتي المكونه من زوجتي وطفلتي عمرها سنة و10 أشهر .. قررنا انو نطلع اجازة ونسافر لدولة اذربيجان بتاريخ 27/2/2020 اتحركنا من مطار دبي الدولي متوجهين إلى هناك .. وعلى فكره دي اول سفرية لينا كسياحه وكعائلة مع بعض .. جد كنا مبسوطين شديد.. ومن شدة فرحتنا بالسفرية دي كنا منتظرين يوم السفر بفارغ الصبر .. والحمد لله وصلنا مطار باكو الدولي حوالي الساعة 5 عصر وفي المطار وبعد الوصول توجهنا للمكان المخصص لعمل تأشيرة الدخول للدولة ( تاشيرة عند الوصول ) .. ولمن وصلنا مكان التاشيرة بالمطار كانت الصدمة لينا ان السلطات بالمطار ماادوني تاشيرة دخول بحجة ان اقامتي بدولة الامارات فاضل فيها اقل من 6 اشهر واتخيلو انو اقامتي كان فاضل ليها 5 اشهر وكم وعشرين يوم بس يعني اقل من 6 شهور بكم يوم .. لكن قالو حيسمحو لزوجتي وطفلتي بالدخول وانا حيرجعوني تاني يوم الصباح لدبي .. طبعا ياجماعه في اللحظة دي زوجتي دموعا نزلت وماقدرت توقفا وانا اتوجعت شديد وحسيت انو بسببي انا انتزعت الفرحة من زوجتي وخصوصاً دي كانت اول سفرية وفسحه ليها .. وقدر ما حنسناهم انو يسمحو لي بالدخول وانو اقامتي اقل من 6 اشهر بكم يوم .. بس بكل اسف كانو مصرين انو يرجعوني ويسمحو لزوجتي وطفلتي يدخلو هم.. وطبعاً نحنا رفضنا لانو دولة غريبة عننا ومافيها زول بنعرفو .. فقررو يرجعونا كلنا مع بعض واقرب موعد طيارة لدبي تاني يوم الصباح .. حجزو مننا الجوزات وحجزونا في المطار ورفضو يتفاهمو معانا تاني نهائي وطفلتي بتبكي ماختو اعتبار لاي شي ونحنا منهارين ومصدومين .. اتخيلو نحنا في المطار من 5 لي 10 مساءاً وما معانا موية او اي حاجة نشربا لانهم كانو حاجزننا في صالة الوصول عند الجوازت وكل ما امشي عشان اتكلم معاهم يودونا حته يكون فيها موية تتشرب او اي شي يتاكل كانو رافضين يردو علي .. جد كانت معاملة سيئة جدا.. وبقينا قاعدين لا كلام لا تفاهم.. عدت ساعات وساعات .. قادرين تتخيلو موقفي ..
انا كنت متواصل بالواتساب مع صديقي مقيم بدبي وكلمتو بالشي الحاصل لينا فقال لي امشي للضابط المسؤل وقول ليهو انا عاوز اتواصل مع سفارتي ادوني تلفون اتواصل مع اي واحد من سفارة دولتي واني مستعد ادفع مبلغ مقابل المكالمة دي .. وفعلا عملت زي ماقال بس سفهوني وكأنو مافي زول واقف وبتكلم ..الموقف استفزاني جداً واسفز صديقي المتابع معاي اكتر .. فكتر خيرو والله بحت وفتش هو من عندو لحد ماجاب لي رقم وحدة اسمها دكتورة عوضية وطلعت هي الشخص المسؤل عن البعثة الدبلوماسية وقال لي اتصل عليها واحكي ليها مشكلتك .. الكلام ده كان جات الساعة 10 بليل واليوم خميس .. طبعا قلت ليهو اكيد انت ماجادي عاوزني اتصل في الوقت المتاخر ده وكمان يوم خميس واحكي ليها وعاوزوا تساعدني؟؟ .. والله ياخوانا انا ضحكتا من غير ما اشعر لاني عارف من عاشر المستحيلات انو تعمل لي حاجه .. وهم اصلاً ناس السفارات في ساعات الدوام الرسمي بجرجروك خلي لمن تتصل عليهم وكمان في تلفونا الشخصي ونص الليل .. قلت ليهو يااخوي انا اتزليت كتير الليلة وماعاوز اتزل تاني ودي كمان حتوجع اكتر من ناس المطار.. ده لو ردت علي من الاساس وحتى لو ردت حتقول لي كلام واحد بس وهو ( انت متصل علي زي الوقت ده عاوزني اعمل ليك شنو يعني؟ ) ابيت اتصل عليها وزوجتي كانت مصرة انو لازم اتصل امكن تقدر تعمل لينا حاجه .. في اللحظة دي جانا ضابط وقال لينا حنوديكم تقعدو في صالة السلامة عشان بكرة من الصباح تغادرو .. قلت ليهو طيب ادينا الجوازات قال لا ماحنديكم ليها الا وانتو في الطيارة .. اها بعد اصرار من زوجتي وصديقي قررتا اتصل على دكتورة عوضية الوزير المفوض .. وقلت ياخ زي ماتجي تجي .. الحمد لله انو شريحة تلفوني كان فيها رصيد وطلعت اتصالات شغالة في اذربيجان .. قمت اتصلت من تلفوني ومن تاني جرس ردت علي .. حكيت ليها موقفي من البداية للنهاية اول رد منها كان .. ( ليه ما اتصلت علي من بدري ؟؟ ) قلت ليها اني حاولت اتواصل معاك عن طريق الجوازات بس رفضو يتعاملو معاي ولقيت رقمك متاخر .. قالت لي خلاص انا حتواصل مع مسؤل العلاقات العامة بالسفارة واشوف ممكن يقدرو يعملو ليك شنو .. تخيلو بعد 15 دقيقة اتصلت علي هي في تلفوني وطلبت مني ارسل ليها صورة من جوازي مع صورة من الاقامة .. والحمدلله كنت محتفظ بيهم مع اوراقي المهمة في قوقل درايف .. طوالي رسلتهم ليها على الواتساب بعد دقيقتين اتصلت علي وسألتني انو حنزل وين في اذربيجان قلت ليها اني حاجز فندق ودافع مبلغ الحجز من بدري .. طلبت مني ابعت ليها صورة من حجز الفندق وفعلا رسلتها ليها .. وطبعا انا اصلاً الشي الحاصل ده كلو والصور الببعت ليها فيها مامصدق لاني عارف الوضع الحاصل لينا كسودانين برة بلدنا وانو من سابع المستحيلات انها تعمل لي شي وماتنسو الوقت متاخر واليوم خميس.. بعد فترة قليلة اتصلت علي تاني وقالت لي انو هم اتواصلو مع ناس الجوازات بس ناس الجوازات قالو ليهم الا يجيبو خطاب مختوم من السفارة السودانية موجه لسلطة الجوازات عشان يدوني انا الفيزة .. قلت ليها طالما كده معناتو الموضوع صعب جدا وشكرا ليك ماقصرتي .. فكانت الصدمة الثانية لي ردها إنو أبداً الموضوع ماصعب ولا شي انا اساسا اتصلت على السواق وجاي علي في الطريق واتصلت على طاقم السفارة وكلمتهم يجهزو عشان حنمشي نفتح السفارة ونعمل الخطاب .. يعني مش حتتصل هي اتصلت وانتهت..
طبعا انا من شدة ما انصدمت بكلاما من غير ما احس قلت ليها انت عاوزه تفتحي السفارة في الوقت ده عشان خاطري!!!! قالت لي نعم .. وقالت انها اساسا اتصلت عشان تطمني بس وانو الاجراء حياخد وقت لحد ما يصلو هي والطاقم وتعمل الخطاب .. انا متخيل انكم بتقرو في كلامي ومامصدقني ذي ما انا ماكنت مصدق في لحظتا .. والله العظيم ياجماعة بعديها بمسافة جاتني رسالة في الواتساب الساعة 11 ونص منها مكتوب فيها بالنص (السلام عليكم .. ممكن تذهب الان لقسم التاشيرة ) فاتصلت عليها طوالي وكان ردها انهم فعلاً بعتو الخطاب من السفارة لناس الجوازات عن طريق الايميل واني امشي استلم الفيزا بتاعتي .. من الفرح جريت جري للضابط في صالة المغادرة قلت ليو اديني الجوازات عشان نمشي نعمل التاشيرات لانو سفارتي رسلت ليكم الخطاب .. رفض انو يتعاون ماي قال لسه ما وصلو اي امر.. قمت اتصلت عليها تاني وكلمتها برد الضابط وقالت لي خلاص اوكي خليك مكانك لحظات وبجيك ضابط تاني .. وقالت لي انهم ماحيطلعو من السفارة إلا بعد انا أأكد ليها اني اخدت الفيزة وعملت الدخول كمان .. قفلت منها كده جا الضابط التاني وسالني انتو السودانين قلت ليو ايوه مشا جاب جوازاتنا وودانا لحد قسم التاشيرة .. انا اللحظه ديك كان جواي احساس بالقوه والعزة كنت ماشي مع الضابط وانا مفتخر وموقفي اتحول من زله لموقف قوه.. رافع راسي لانو دولتي واقفه في ظهري .. طبعا ادوني الفيزة مجااااااان من غير ما ادفع اي قروش .. بس دفعتا لزوجتي وطفلتي .. وكانت متابعة معاي د.عوضية لحد ما استلمنا الشنط .. قالت لي خليكم في المطار انا حجي اوصلكم من المطار للفندق .. قلت ليها انت كفاك لحد هنا ماقصرتي معاي وكفاية اني جهجهتك معاي في نص الليل وانا اساسا مكلم ناس الفندق انو يجوني في المطار .. ازيدكم من الشعر بيت انا وصلت الفندق اتخيلو لقيتا منتظراني في الفندق ومش كده وبس كانت جايبة لينا معاها كمية من الحاجات والاكياس فواكه وعصاير والبان وشوكلاتات وبسكويت.. المهم شكرتها قالت لي ابدا انا ماعملت غير واجبي وانحنا اساسا دي مهنتا ومهمتنا انو نخدم السودانين في دول المهجر .. ده كلو وناس الفندق مستغربين وبعاينو لينا انو جايين متاخرين وواقفين بنتكلم مع وحده كانت منتظرانا .. مفترض اكمل اجراءات الفندق لقيتهم نفسهم يعرفو دي منو الجات هنا نص الليل ومنتظراك كمان .. المهم في الاخر كملت اجراءاتي وهي بنفسها اتأكدت ان كل شي تمام .. لما ادارة الفندق عرفو انو دي سفيرة السودان وحلت لي مشكلتي وجات تتاكد من سلامتنا .. شفت عظمة بلدي في عيونهم وانو عرفو انها بلد بتكرم مواطنيها .. وده الفرق بين انو يحكموك الكيزان او تكون في دولة اخترت حكومتا انت.. وضحو عشانا شباب وطني وسقوها بدمهم .. جد والله كان موقف لاينسى وموقف بالنسبة لي كان مهيب جدا.. سبحان الله من موقف زلة ومعاملة سوء لموقف عزه وفخر وفي البوست ده عاوز اشكر د.عوضية محمد احمد يحي ،، الدبلوماسي الانسان الغيورة على كرامة وعزة السودانين بالخارج وكل طاقم السفارة وانابة عن كل الشعب السوداني الانا عارف انو اي زول حيقرا الكلام ده او يسمعو حيحس بفخر وعظمة وخصوصا السودانين بدول المهجر وعلى الصعيد الشخصي بنشكرك جدا يادكتورة عوضية على العملتيهو لينا وعلى انك وصلتي رسالة واضحة للعالم انو السودانين ليهم مكانتم وقيمتم وليهم من يحميهم وهم خارج اراضيهم بعد الله.
*لك كل الشكر والاحترام والتقدير د.عوضية. بس خلاص..سلامتكم،،،_
////////////////////
