الجزء الثاني

بسم الله الرحمن الرحيم
في السلك


•    تتذكروا مسلسل التومه ؟؟؟؟
•    التومه الساكه الولاده خمسه واربعين سنه
•    عمرها طبعا واحد وتمانين
•    يعني متزوجه من عمرها سته وتلاتين سنه
•    طبعا الجزء الاول لما وصلنا الحلقه الاخيره التومه ما اتوفقت
•    حكاية الولاده دي طبعا قسمه ونصيب
•    وبعد ده تنتقد في الاخريات
•    فلانه ولادتها دي اسي ولاده !!!
•    انا لو دايره ولاده زي دي كان زماااااااااااان سويتها
•    وعلانه غير ولدها وحيد ده جابت شنو ؟؟؟
•    لو صحي هي ولاده كان تزيدو
•    التومه تهرطق سااااااااي
•    في الجزء الثاني التومه برضو ساكه الولاده
•    برغم تقدم السن
•    جزء مثير جدا
•    لاخلت فكي ولا خلت دجال
•    الدكاتره ديل بالصف
•    العلاج البلدي ده ماخلت فيهو شئ
•    ردمت الاعشاب في بيتها ردم
•    تشوف القش مردوم تقول مربيه حصان
•    ماداير ابيخ ليكم المسلسل
•    لكن الجزء التاني ده ركز تركيز شديد علي الكوميديا
•    في واحده من الحلقات كان في حنكوشه بتسمع في قصة التومه
•    اتأثرت جدا
•    قالت لي خالتها
•    ياخالتو التومه دي تمشي المستشفي
•    تشوف ليها واحده عندها تيمان
•    تقعد جمبها
•    ام التيمان تحول ليها واحد بالبلوتوث
•    والناس لي بعضيها يا خالتو .....و شنو ؟؟؟؟؟
•    خالتها قالت ليها تلاتين عشره ده يلقوا ليهو بلوتوث وين ؟؟؟؟؟
•    المهم ابقوا معنا
•    ايها الناس
•    تناول الاستاذ معاوية الجاك في زاويته بالامس موضوع عضويه شباب من اجل المريخ
•    قال معاويه انهم شباب متعلم ومؤهل ومثقف ويحب ناديه ويجب ان يعمل علي تطوير النادي والمفاهيم السائده فيه
•    او قل انه معني حديث الاخ معاويه
•    وانا شخصيا اضم صوتي لصوته في هذه الجزئيه
•    ثم تحدث الاستاذ معاويه عن انهم عضويه مستجلبه يصرف عليها آخرون بهدف دخولهم لمجلس الاداره الجديد مع جمال الوالي
•    هنا اختلف معك اخي معاويه
•    هناك اسباب ادت لميلاد شباب من اجل المريخ
•    اول تلك الاسباب هو محاربة العضويه المستجلبه التي تختار للمريخ حكومته وهي لاتدري من اختارت ولماذا اختارت
•    شباب من اجل المريخ تكونوا من اجل قتل عبارة ( اقترح قفل باب النقاش ) في الجمعيه العموميه بعد الخطاب مباشره
•    شباب من اجل المريخ لم يتكونوا من اجل اسقاط فلان والاتيان بعلان
•    بل تكونوا لدعم من يستحق الدعم ولافراغ العضويه المستجلبه من مضمونها
•    تكونوا ليس من اجل اختيار من يحكم فقط
•    بل لوضع الاسس لعملية الحكم  تحت شعار وكيف يحكم
•    لانه اذا خرج عن كيف يحكم لن يكون هناك قفل لباب النقاش في الجمعيه
•    والحساب حايكون ولد
•    استاذي معاويه انا اعرفك جيدا
•    واعرف شباب  من اجل المريخ جيدا
•    والله انت بافكارك واحد منهم
•    قرب اليهم واعرف الحقائق
•    وعندها قرر
•    اراهنك يارائع لن يكون قرارك الا الانضمام لهذا الجيل الجميل
•    المهم
•    سمعت تحت تحت قالوا الدوله دعمت الجماعه بقروش هبل من اموال الشعب
•    عشان تعينهم علي تسجيلات يونيو
•    يعني اللاعب البجي في يونيو ده يكون لي كل مواطن فيهو حق
•    لاعب الشعب
•    و برضو عشان تعينهم علي الاعداد
•    وقالوا تحت تحت كده سداد الديون
•    لكن الشعب دخلوا شنو ؟؟؟؟
•    الم تكن صحة البيئه اولي بتلك الاموال ؟؟؟؟
•    الم تك مستشفيات علاج سرطان الاطفال احق بتلك الاموال ؟؟؟
•    ولا رأيكم شنو يا أأمة المساجد ؟؟؟؟؟؟
•    المهم
•    استاذي الكبير عبدالمجيد قال فيما معناه ان تكرار مزمل للعلامه الكامله جاب ناس الاهلي واقفين لمبه وحثاهم علي هزيمتنا
•    طيب استاذي
•    مزمل ده ليهو زمن بتكلم عن العلامه الكامله
•    ليه المريخ غلب كل الفرق التانيه ؟؟؟
•    ولا ديك تكون فرق لاعبيها مابعرفوا يقروا ؟؟؟
•    او اداراتهم مانعاهم من قراءة الصدي
•    عشان كده ماجونا واقفين لمبه
•    واتغلبوا لينا ببساطه
•    ان كان الامر كذلك استاذي كان الهلال اتغلب يومي
•    لانهم يكتبون من شاكلة  اليوم الغزال يستعد لتدمير الجبال
•    البرنس يقود الموج الازرق لفوز عريض
•    سادومبا يقول كأس افريقيا حقنا
•    كاريكا ينذر الفهود برباعيه في التمرين
•    ليه الهلال بغلب ديل يا استاذي ؟؟؟؟؟؟
•    وواصل استاذي عبدو وقال فيما معناهو  ان كتاباتي بتاعت بتي وخالتي وحبوبتي والجويه هي التي عجلت بخروج المريخ من الابطال
•    كان الموضوع كده يا استاذي امسك عندك
•    جيت خاشي البيت لقيت حبوبتي وخالتي قاعدات
•    سلمت عليهن
•    خالتي قالت لي اسلام وين ؟ (اسلام دي بتي )
•    قلت ليها جايه
•    حبوبتي قالت حلالالالالالاته هدييك جايه
•    ودخلت اسلام
•    اسلام وخالتي وحبوبتي بي صوت واحد قالن
•    الهلال حايجيب بطوله جويه وحايفوز بكأس افريقيا للابطال والسوبر وكأس العالم للانديه
•    موش كلام خالتي وحبوبتي عن الجويه خارج المريخ بدري ؟
•    خلاص
•    قالن الهلال حايجيب كل الكاسات المطروحه افريقيا
•    واظن يا استاذي عبد المجيد ان كلامن ده فيهو نوع من الوطنيه
•    بالذات لو عرفت انهن جميعا بنات اسر كريمه ومريخابيات
•    احتراماتي استاذي مجيد
•    ايها الناس
•    ماتنسوا
•    الجزء التاني
•    بالمناسبه
•    في مباراة فريق الوطن وجزيرة الفيل
•    جاء بعض من الجمهور يحمل لوحه مكتوب عليها العلامه الكامله ومرسوم عليها جلابيه
•    انها مداعبه جميله ومحترمه
•    تجعل الوسط الرياضي مميزا بدعابات اصحاب البديهة فيه
•    ولكنها وضحت مدي الخوف من العلامه الكامله الكان مسيطر علي ناس اللوحه ديل
سلك كهربا
ننساك كيف وحبوبتي قالت الهلال حايجيب جويه !!!!!
والي لقاء
سلك
babikir maki [b_silik@hotmail.com]