ديديه اسم الله عليه

بسم الله الرحمن الرحيم
في السلك

*رمضان كريم
*وربنا يتقبل منا ومنكم الصيام والقيام وحسن العباده
*وربنا يجعلنا من المعيدين
*والسماح من اهل السماح
*نحنا مسامحين الكل
*لان الدنيا فانيه
*دنيا فانيه فايته رايحه
*لا دايمه ليك لا داميه ليا
*في هذا الشهر المبارك
*يفتح الله لنا صفحة جديده
*صفحة التوبه والغفران
*ده الخالق
*فمابال المخلوق لا يسامح !!!!!
*الله ينعم علينا وطن ومواطن
*بالسلام والسلامه واليمن والبركات
*مادايرين نخسر محلين
*نضمن آخرتنا يا فرده
*الشايفنوا ده ما بشجع
* في الفانيه طلعنا كيت لا بانيين طابقين
*ولا فارشين موكيت
*اخير نلحق الدايمه
*المهم
*كورة امس اثبتت ان المريخ كسب لاعب مهول اسمو ديديه
*حركة صاح
*مهارة كبيره
*تهديف من امو
*باصات بالمقاسات
*الله عليه ديدي
*واثبتت ايضا
*ان بالمريخ لاعب الممتاز ما مكانو
*في الكوتشينه لو لعب زميلك ترجف لما ورقك يقع
*الزول ده الجابو منو وجابو ليه ؟؟؟؟
*الله يجيب شهر اطناشر يحلنا منو
*المهم
*المدينه
*المدينه حرقتني
*بكري بو عقرب
*امس اتشقلب
*جاب قونين وصنع قون
*وديدي الله عليه
*جاب قون وصنع قونين
*لكن
*عمر بخيت بالاصفر ونمره اتنين وعشرين
*يشهي في اريبا
*ايها الناس
*غضبة جماهر المريخ كتبوها في لافتات وعلقوها
*انزلتها الجهات المعنيه
*وحقو الجهات المعنيه كانت تخليها
*عشان الرأي يصل
*لانو الراي لو ما وصل بطريقه راقيه ومهذبه
*بصل بانفعال
*والانفعال ما حبابو
*لكن الخلاصه
*جماهير المريخ ساخطه علي الاتحاد
*ولجانه
*ولجنة الاستئنافات
*وعوض
*واهل العوض زاتهم
*ايها الناس
*مافعله التحكيم بالامس يحير
*ضربة جزاء اثر عرقله بكري الشوط الاول
*ضربة جزاء اثر ضرب بكري بالكداره في الرأس الشوط التاني
*ضربة اليد بالكرة من مدافع الاهلي  الشوط التاني
*تلاته ضربات جزاء يسكت عنها التحكيم
*ياما بعرف
*ياعارف وعامل ماعارف
*وفي الحالتين انا الضايع
*تغاضي الحكم ورجال خطوطه عن حالات عنف مبالغه
*والكلام ده البجيب الكلام
*ايها الناس
*جوليام حمام
*جوليام ماسوره
*عليكم الله
*البرازيلي جوليام ولا ديدي ده ؟؟؟
*جوليام ده برازيلي تجنيس ولا اصلي ؟؟؟؟
*المهم
*غرزه
*الباب البجيب (الريح) سدوا عشان نستريح
*ريحنا يا غرزه
*وقبضت الريح
*ايها الناس
*المجموعات لا تتحمل مجازفات
*وغرزه عارف كده
*امس فقدنا علو لو وراجي ورمضان وكوفي وجمال سالم وغيرهم
*فابدع شيبون وديدي وبو عقرب وامير كالعاده وجابسون
*لكن الهدف الاول استهتار واستخفاف من المعز
*يا كابتن
*اصحي معانا شويه
*انت لاعب كبير وخبير
*والجديه التي اظهرتها لينا في البدايات يجب ان تستمر عليها
*فهدف الاهلي الاول
*يشبه هدف الاهلي شندي
*صحصح يا عزو
*اما مستوي لياقة عمر بخيت
*فيعود لعدم الجديه في التمارين بالاهلي
*يا عمر بخيت
*نحنا شامين ريحة مطار
*ولياقتك دي ما بتودي المطار
*شوف شغلك
*نعذرك لانك لا تعرف المطار بحسب قعادك  مع  ناس امجاد جمب جاد
*ولكني اثق بانك سوف تكون سببا من اسباب مشيتنا المطار
*يلا يا معلم
*المهم
*عنكبه احرز هاتريك امس
*اعرناهو وخلينا الباب البجيب الريح
*الباب البجيب الريح قرب يمرقنا امس
*كان مرقنا بيهو
*محتاجين باب سنط مكان الباب البجيب الريح ده يا من ترشحون اللاعبين للمريخ
*ايها الناس
*امس في الاستاد بتاع بحر قال لي بكره مابصوم
*قلت ليهو ليه
*قال لي ماذاعوهو
*غايتو ناس البحر ببالغو
*لكن بي قطعة الكهربا دي كلنا بنمشي البحر في رمضان
*المهم
*اشار رمضان احمد السيد بجوهرته امس
*ان حكم الجلاكسي هو من ادار مباراة المريخ والهلال واحتسب بلنتيين للمريخ مشكوك فيهما
*يا رمضان
*اظن رمضان دخل عليك
*حكم الجلاكسي هو حماده
*الطرد الباشا وضغط المريخ
*ومن الاستاد للمطار
*ونشرنا صورو بالجلاكسي واللاب توب بصالة المغادره بالزعيم
*والارشيف قاعد
*ولو ناسي تاني بننشرها يا رمضان
*ايها الناس
*العفو والعافيه
*ايها الناس
*ان تنصروا الله ينصركم
*اها نجي لي شمارات والي الخرتوم
*والينا
*رمضان جانا ما جايينا
*تصلحوا الكهربا ولا للبحر تودينا ؟
*بحر في رمضان يا والينا !
*اكيد الصيام ما بنضمن لينا
*جغيمات الوضوء بثيرن الشك لدينا
*يبقي معاها جغيمات بحر يا والينا ؟؟؟
*والبحر زاتو كلو زربتوهوا يا والينا
*نجيهو بالواتس آب ولا كيف قول لينا ؟؟؟
سلك كهربا
ننساك كيف ولو الكهربا قطعت صدقوني بنلتقي في البحر مع السخانه دي
والي لقاء
سلك

b_silik@hotmail.com
/////////