أصل الحكاية
لغاية أمبارح كنت فاكر إنه المريخ دخل عالم المؤسسية ، وإختار بقرار في إجتماع طاريء ورسمي لمجلس الإدارة عدم تسجيل هيثم وعلاء الدين ، لكن ولكن ولكن فشل قرار المجلس في الصمود أكتر من 24 ساعة، وإتقرر بدون مقدمات إجتماع طاريء تاني في آخر يوم في التسجيلات بجند واحد ( تسجيل هيثم وعلاء) تااااااااني طيب الاجتماع الاول كان لي شنو؟ واحد قال لي ده سؤال؟ مش عصام الحاج قال ماقال في الاجتماع الاول أرغي وأزبد وهدد وتوعد وخرج غاضبا، وعاد منتصرا في الإجتماع التاني ، ياراجل ده مجلس شنو؟ براحة علينا فهمنا والقرار الاول مشي وين؟ أكلو الدودو ، خليك جادي ، يازول انا جادي ، لو ماأكلو الدودو بكون مشي وين ، والدودو ده منو؟ معقولة لغاية هسي ماعرفت الدودو ؟ ماعرفت قول لي ، أقول ليك حاجة أسأل عبدالله حسن عيسي والله أقول ليك أسال متوكل أحمد علي ، ممكن تسأل ودالريح ، وليه ديل يعني ؟ لأنه عبدالله ومتوكل ماحضروا الإجتماع وود الريح طلع من الإجتماع غضبان غضب شديد .
طيب ماقالوا خالد شرف برضه طلع من الاجتماع غضبان غضب شديد إشمعني قلت ود الريح وماقلتو ، لأنه خالد شرف في كلام إنه كان مع علاء الدين يوسف لغاية باالليل ، طيب ودي شنو الحركة العملها دي طلع وزعلان وماكمل الاجتماع ؟ احتمال يكون اتفق مع علاء الدين علي مريخ فداسي ، جاء لقاهم في الاجتماع عايزنو للمريخ الكبير قام زعل وطلع ، إنت بتهظر ؟ أهظر ليه ؟ فسرها انت لو عندها تفسير تاني .
وين جمال الوالي ؟ إنت سرحان جمال الوالي ما إستقال؟ صاح صاح وسمعت انه سافر قبل الاجتماع باالليل . طيب وعصام الحاج مسنود من منو؟ كان مسنود من جمال ولا قاصد شنو؟ ماتقول لي كلام ناس منصور عبدالرحيم وعبدالمجيد عبدالرازق وكلامهم عن شخصية دينية تجمع عصام الحاج وهيثم مصطفي اتدخلت في الموضوع ؟ معقولة وصلنا مرحلة زي د يده شغل شيوخ ورجال دين ، دي كورة وتسجيلات وشطب لاعبين؟ طيب ماأنا مافهم فهمني أنت ؟
انا الفاهمو حاجة انه المريخ ماعندو مجلس إدارة ، وموضوع هيثم وبعد داك موضوع علاء وبعدهم سادومبا ، كله كان مدور بره المجلس وناس المجلس بسمعو زيهم زينا ، وفي صراعات نحن فاهمنها وأيادي خارجية ( حلوة خارجية دي) بتلعب لعب ، ماقلت ليك القصة ماكورة ، لأنه لو مافي مجلس في الدنيا بجتمع مرتين في ظرف 24 ساعة عشان يطلع قرارين مختلفين في موضوع واحد ، طيب مجلس المريخ عمل كده ، وعشان كده أنا قلت ليك مافي مجلس .
بعدين ح يحصل شنو؟ ولاحاجة .. كيف ولا حاجة الموضوع ده مابأثر في المريخ ؟ والجديد شنو مااصلا المريخ كده ، ياخ هو مجلس إدارة بجتمع عشان عشان يصوت علي تسجيل لاعب دي سمعت بيها قبل كده ؟ أيوه سمعت بيها .. وين؟ مجلس المريخ أسه مش عملها ؟ وعشان كده بقول ليك المريخ ماعندو مجلس.
قالوا التسجيل هيثم وعلاء وسادومبا ؟ عادي ، كيف عادي ؟ أكتر من عادي مش لاعبين كورة ؟ طبعا ، يبقي من حقهم يمشو أي فريق ، لكن بالطريقة دي؟ خاصة هيثم في لاعب بجري وراء نادي كده ؟ من حقو؟ ماممن حقو؟ كيف ماممن حقو؟ مامن حقو لأنه أشعل النيران في المريخ وياعالم متين تنطفي ، ماهو أشعل النيران في الهلال الحصل شنو؟ مش شال الدوري الممتاز ووصل دور الاربعة في الكنفدرالية واتغلب محليا وهو مابلعب ، ممكن برضو تحصل في المريخ ، طيب خلينا من المريخ ، ناس الهلال العاملنو رمز وإعتصامات وانتحارات وناس عيانة وناس بتبكي ، رمز مين ياعم ده رمز الصناعة السودانية .
بس عشان تآمنو .. نآمن بشنو؟ من البداية قلت ليك هيثم ده في النهاية مااكتر من لاعب كورة ، وفي النهاية جري وراء المريخ ، ماكلف نفسه طول الوقت ده وناس المريخ منقسمين عايزنو وماعايزنو ، يطلع للناس الواقفين معاهو في الهلال ويقول انا ماشي المريخ وبفاوض في المريخ مش يتفرج ولا كأنه بعرفهم ، يعني في النهاية طلع بتلاعب بعواطف الناس الواقفين معاهو وصدقو انه فعلا رمز ، وطلع في النهاية رمز الصناعة السودانية ، وبعدين؟ بعدين كراع جادين ، تعرف كراع جادين؟ لا .. بحكيها ليك (الاحد الجاي) اذا فضل في العمر بقية.
hassan faroog [hassanfaroog@hotmail.com]
