أصل الحكاية
حقنا .. منصرفاتنا .. جماهيرنا .. تاني مافي طريقة لشيلني وأشيلك .. هم بجيبو محترفين ونحن بنجيب محترفين وهم بجيبو مدربين نحن بنجيب ونحن بنجيب مدربين .. هم بعملوا معسكرات نحن بنعمل معسكرات .. هم بعسكروا بره السودان نحن بنعسكر بره السوان .. لكن نحن جماهيرنا أكبر وهم ماعندهم جماهير .. عشان كده الإتحاد العام مفروض يميزنا في قروش البث التلفزيوني نحن شركاء أصيلين ولازم يشاورونا قبل ماياخدونا أي قرار يعني نحن البنختار معاهم القناة الناقلة للدوري الممتاز ونحن البنحدد تفاصيل العقد والمبلغ المفروض يندفع ..
دي إتفاقيتنا وهي إتفاقية ملزمة وماح نتراجع عنها .. في الظاهر نحن مع حسن النوايا وإزالة الإحتقان الموجود في الوسط الرياضي لكن في الحقيقة نحن عندنا حقوق لازم ناخدها ومافي منطق يخلي كتفنا بكتف الاندية التانية ولافي منطق يخلي الإتحاد ينفرد بكل القرارات لازم يشركنا وإلا .. الجرايد هللت وكبرت للإتفاقية وبقت موضوع وودملاح وود الحاج بقوا أشهر من البرير وجمال الوالي .. وأخبارهم بقت أهم من أخبار نجوم الكورة .. في البيت في الشارع في المكتب في بيت بكاء في بيت عرس كل يوم إجتماع مرة في بيت ملاح وتاني مع ودالحاج وحطبة يستضيف والجرايد مامقصرة بدل الصفحة صفحتين وبدل الصورة ستة سبعة ..
والدنيا قايمة وقاعدة والبيانات (تطاقش) وبرقيات التهنئة والتاييد فرغوا ليها ناس عشان يقروها ويوم تكريم هنا ويوم تكريم هناك وماعرفنا التكريم لحسن النوايا وفتح صفحة جديدة ولا تأييد لمطالب حقوق البث وآخر خبر قريتو أمبارح ( إتحاد تمبول يكرم الوالي والبرير) سألت وين عصام الحاج وهاشم ملاح وضحكت بدون سبب ..
ياخي حتي جهاز الأمن إتبني الموضوع وجاب الجرايد والفضائيات والإذاعات وحسب المنشور في الصحف مافهمت جهازالأمن مؤيد الإتفاقية كلها بحقوق البث والتلفزة ولا حسن النوايا بس .. المهم الموضوع كبر شديد .. وكانوا قبلها قدموا مذكرة مزورة للإتحاد العام في إستنادهم علي التجربة الدنماركية أقصد التجربة المصرية في البث التلفزيوني قدموها بعين قوية للإتحاد وطلبو إجتماع لمناقشة المذكرة .. الغريبة المذكرة جات في وقت البلد مليانة مذكرات .. مذكرة وفي أقوال أخري أكتر من مذكرة في المؤتمر الوطني الحزب الحاكم .. ومذكرة في حزب الأمة .. ومذكرة لحزب المؤتمر الشعبي وفي كلام كتير عن مذكرات حديث المجالس .. الظاهر ناسوا الهلال والمريخ عجبتهم فكرة المذكرات وقدموها بشروطها حاجة كده زي محلات العطور والإثاث والإتصالات والخدمات وشركات الدعاية والإعلان تفتح محل الباقين يفتحوامحلات تعمل شركة تلقي السودان كله شركات دعاية وإعلان ..
الحاجة البتغيظ في موضوع المذكرة إنه الجبل تمخض في النهاية فولد فأرا .. وبعد (العار) بالتزوير في تجربة الإتحاد المصري لكرة القدم .. جاء الإتحاد العام امس وإنتهي من الإكذوبة الإسمها هلال مريخ بطريقة كشفت (كم هما ضعيفان هذان الناديان) ..
كلمتين بس قالهم معتصم جعفر (مافي طريقة) واحد فيهم فتح خشموا مافي مش كده وبس حتي ماأداهم شرف الإجتماع المنفصل وده في تقديري عين العقل وناقش المذكرة في إجتماع جمع كل رؤساء الأندية بدون تمييزوكان الاجتماع مخصص لرعاية الدوري الممتاز يعني جات عرضا كده ..
وبطريقة تانية العملوا معتصم جعفر كان مفروض يعملو مع اندية الممتاز يقعدوا معاهم ويطرحوا وجهة نظرهم ويسمعوا منهم ويحترموا الكتلة البتجمعهم (قانونا) ويحترموا القضايا المشتركة قبل ان تصبح من الماضي
ولكن ماذا نقول .. الصغير عمره مابكون كبير حتي لو بالجماهير .
إتفاق بدأ بالكذب والتزوير إنتهي بمافي طريقة .
hassan faroog [hassanfaroog@hotmail.com]
