أصل الحكاية
كلنا تابعنا الثورات العظيمة في تونس ومصر وكلنا لفت إنتباهنا الشعار الشهير الموجه للرئيسين (بن علي ومبارك) (إرحل) وكلنا قرينا اللافتات الشهيرة التي رفعت ايام الثورات وكانت جميعها ساخرة مثل (إرحل إيدي وجعتني) (وأرحل عايز أحلق) (وأرحل مراتي وحشتني) (وأرحل عايز أرجع البيت) (وأرحل عايز إتجوز) (وارحل عايز إستحمي) .. هذا الشعار هو ملهمنا في المطالبة برحيل رئيس مجلس إدارة نادي المريخ جمال الوالي ..
لذا اطالبه بالرحيل فقد ملينا الانتظار علي رصيف البطولات .. (إرحل يدينا نملت من عدم التصفيق ) .. (ارحل ريقنا نشف) .. (أرحل عايزين نهتف) .. (أرحل متمنين نعمل امواج مكسيكية) .. (أرحل إشتهينا الغلاط) .. (أرحل خشمنا … من السكات) .. (أرحل متين العجب يرفع ليهو كاس) .. (أرحل منصات التتويج بنسمع بيها سمع) .. (أرحل كرهنا القروش) .. (أرحل عايزين نادي مفلس) .. ( أرحل المريخ ده مامريخنا) .. (ارحل ورجع لينا فريقنا) .. (أرحل كفاية انتهي مريخ الروح القتالية) .. (أرحل ده مريخ الفترينات كله للعرض فقط) ..(ارحل المريخ عايز رئيس) .. (ارحل المنشآت مابتعمل فريق) .. (أرحل وخلي اللاعبين يجوعوا يمكن يفوزوا) ..
(أرحل تعبنا من الانتظار) .. (ارحل وخلي قروشك عندك) .. (ارحل المريخ لحق أمات طه) .. (ارحل خطوتين ونصل مقابر حمد النيل) .. (أرحل وشيل ديونك) .. (أرحل خلي الجماهير تفرح) .. (أرحل كفاية عذاب) .. (أرحل عشان الصورة تتعدل) .. (ارحل 21سنة علي مريخ مانديلا) .. (أرحل المريخ بقي في المتحف) ..
(أرحل أشتقنا لبرج الحمام (نادي المريخ قبل الوالي)) .. (أرحل وشيل برجك التاني) .. (ارحل مع مريخ الحكومة عشان مريخ الشعب يرجع) ..
(أرحل انت والحضري والبدري) .. (ارحل زهجنا من الوالي رئيس طوالي) .. (أرحل زهجنا من ستيم تفاح ياالوالي تيمك صاح) .. (أرحل معاك نسينا أسماء اللاعبين) ..( ارحل متمنين نفتح جريدة نلقي صورتك مافي) .. (ارحل وراغو الحضري والنفطي تسجيلات للعرض) .. (أرحل ديونك كم ؟ 90 مليار ح ندفعها بس أرحل) ..
(أرحل حواء المريخ ولادة) .. (أرحل شعب المريخ يريد تغيير الوالي) ..
(ارحل طلعنا من دور ال32فضيييييييييحة عديييييييييل ) .. (ارحل كفاية تخدير) ..(أرحل القروش مابتعمل فريق) ..(ارحل انت المستفيد) ..
أرحل ياجمال الوالي فقد إستنفذت كل الفرص ولم يعد لديك ماتقوله أو تفعله لاشيء علي الاطلاق .. نسيت.. فقد تبقت لك فرصة واحدة تتعاقد فيها مع المعجزة ميسي والساحر كرستيانو رونالدو والمدرب الداهية مورينهو آخر كرت تلعبه لتخدير شعب المريخ ومع ذلك أؤكد لك أنك ستخسر لأن القضية يارجل ليست في من يحضر؟ ولكن في لماذا يحضر؟ فكل السابقين واللاحقين من لاعبين ومدربين ياتون من أجلك وليس من اجل المريخ لهذا يفشلون .. لانك بإختصار مازلت (سنة أولي إدارة) رغم كل هذه السنين وانت لم تتقدم في سلم الادارة درجة واحدة ومازالت أذنك تعشق كلمة (الراجل ماقصر دفع وجاب يخش يلعب ؟) ومازالت أذنك ترفض الاستماع لكلمة (الادارة ماقروش .. الادارة نظام) ومازالت أذنك ترفض حديث من يقول لك (لن تكون إداريا ناجحا في يوم من الايام ) ..لذا أسمعها مني (أرحل) فلن يخسر المريخ أبدا .. صدقني .
hassan faroog [hassanfaroog@hotmail.com]
