أصل الحكاية
أطفال زمان وأطفال الزمن ده اي حاجة عند أولاد الجيران بشوفوها سمحة حتي في الأكل لو (عجنو ليك كسرة بي موية) بتشوفها مسيخة لكن نفس الكسرة المعجونة بي موية بتشوفها عند الجيران أطعم أكلة في الدنيا إتذكرت الحاجة دي أمبارح لماشفته الحضري حارس مرمي المريخ في آخر ربع ساعة منقولة.. بيني وبينكم الفرق كان كبير بين الحضري حارس أفريقيا الأول وحارس الاهلي في الفترة الذهبية (ايام مانويل جوزيه) بإختصار فقد هيبته وكان أول أمبارح حارس عادي دخل مرماه أول هدف من (الكلاكلة) اقصد من مسافة بعيدة في أول مباراة تنافسية يشارك فيها لأننا لو حسبنا أهداف المباريات الإعدادية ممكن يكون يكون هدف بمعدل كل مباراة عشان كده خلونا في التنافسي أفضل .
وبعيدا عن مبلغ المريخ الخرافي الذي لم يكن يحلم به وهو في قمة شبابه وعطاءه الكروي وحكاية الإيقاف والغرامة .. أقول المريخ يحتاج لحارس لايدخل مرماه هدف ده الواقع ودي النظرية وإلا أي حارس ممكن تستقبل شباكه أهداف ده ماحارس حسب تقييم جهابذة الخبراء سواء الاعلاميين أصحاب الكلمة الاعلي في التسجيل والشطب أو المدرجات (الجمهور) ديل برضه عندهم دور كبير في المريخ في الشطب والتسجيل وماننسي الإداريين أو بعضهم حتي لانجمع العنده لاعب عايز يسجله والبشوف إنه بفهم في التسجيلات أكتر من الفنيين عشان كده ما في زول يصدق حكاية اللجان الفنية البكونوها للتسجيلات.. ديل في النهاية آخر من يعلم يتعبوا ويرشحوا ويعملوا إختبارات وفي النهاية التسجيلات يايقوم بيها صحفي أو إداري وتكتشف اللجنة الفنية إنها كانت مجرد ديكور بخدعوا بيهو الرأي العام عشان يقولوا في مؤسسية وكده .
نرجع تاني لكسرتنا البي الموية وكسرة الجيران.. بهاءالدين القالوا عليهو أفشل حارس وسبب كوارث المريخ.. من فارق المريخ ليهو ثلاثة مواسم وده الموسم الرابع ولم يفارق المريخ محطة الكوارث بحراس آخرين وكلهم طاردتهم نفس اللعنات (حراس فاشلين) أكرم الهادي ومحمد كمال وحافظ محمد أحمد وحتي الفلسطيني رمزي صالح الذي بنوا عليه آمال كبيرة حملوه كارثة فقد المريخ للبطولات ..
بهاء الدين بعد مافارق المريخ أصبح حاليا حارس السودان الأول تخيلوا سبب كوارث المريخ وفقده للبطولات المحلية والخارجية أصبح حارس السودان الأول ونجم من نجوم بطولة أفريقيا للاعبين المحليين .. النكتة السمعتها قالوا ناس المريخ شغالين معاهو مفاوضات عشان يرجع تاني خاصة وإنه ده آخر موسم ليهو مع جزيرة الفيل . لاحظوا عايزين يرجعوهوا قبل مايعرفوا الحضري حا يتستر ولا يبقي كارثة تانية .. وزي ماقلت المريخ عايز ليهو حارس مابدخل فيهو قون وده مابلقاهو لو جاب حراس العالم كله مابلقي حارس بالمواصفات دي إلا حارس واحد ..
حارس حيطة .. حيطة عديييييييييل يبنوها ويقفلوا بيها المرمي من بدايته لي نهايته بشرط تكون حيطة مسلحة لأنه في لاعبين رجلهم ممكن تهد الحيطة العادية وبالنسبة لبهاء الدين خليكم مع (كسرة الجيران) أقصد الحضري خسرتوا فيهو اموال طايلة أصبروا عليهو يمكن يطلع ماكارثة رغم أن الهدف الدخل مرماه ماكان بيدخل في حارس هلال الساحل والمريخ الحالي ياسين .. حاجة تغيظ مش ؟ قون مابيدخل في ياسين جايبين الحضري ليه؟
hassan faroog [hassanfaroog@hotmail.com]
\\\\\\\\\\\\\
