أصل الحكاية
جاء في الأخبار ، أن عصام الحاج وبعد إكمال صفقة ( المسيد) و( غداء الوالي) ، بالإنقلاب الفضيحة علي قرار مجلس الادارة بعدم تسجيل المخضرم هيثم مصطفي وزميله علاء الدين ، طالب جمهور المريخ والإعلام المحسوب عليه بإختيار لقب جديد لهيثم بديل للقبه الشهير (سيدا) ، سألنا ليه ياعصام؟ قال لأنه اللقب ده أكل سمايته في الهلال ، وسموهو ليه جماهير الهلال ، وماممكن تكون ( صرته) مدفونة في أستاد الهلال ويجينا بكل حاجة حتي اللقب عشان كده عايزين لقب حق المريخ وتبدع في صناعته جماهير وإعلام المريخ .
الظاهر عصام الحاج قايل تغيير الإسم زيو وزي المؤامرة ، الخطط ليها ونفذها ، وخلت الوضع في المريخ ( كيمان) رغم إجتهادات التغطية والتسامي فوق الجراحات والمرارات ، قايلو ممكن يتبدل بين يوم وليلة ، فكروا وفكروا ، عملوا مسابقة ، مافي زول إشترك ، عاملين إعلان شهر زول شافو مافي ، الظاهر في أزمة إبداع في الألقاب بالمريخ ، مع إنه التاريخ بقول كده، من حكاية (الزعيم) البدت مع الهلال لغاية (سيد البلد) الحاولو يزوروا ليها التاريخ عشان يثبتوا إنه الإسم خاص بالمريخ ، وفشل التزوير .
فتشوا لقب جديد لهيثم مصطفي وبعد تعب شديد ، قالوا بس لقيناهو ، شنو؟ نسميهو الظاهرة ، اللقب تقيل علي اللسان ، دي يقولوها كيف ؟ شنو الكيف ؟ الظااااهرة دي عايزة ليها درس عصر ، الموضوع شكلوا حا يقلب مشكلة ، واحد زهجان من لقب الظاهرة وعايز يبوظ التسمية قال ليهم : ياجماعة إنتو الظاهرة ده مش لقب رونالدو سيد الإسم ( البرازيلي) ، كم واحد من الحاضرين قالوا بصوت واحد : بس ياهو ذاتو بالله في داعي ، اللقب ماماشي مع هيثم . وواحد زهجان من اللقب أكتر من الأول قال ليهم : ناس الهلال لما يقولوا ( سيدا .. سيدا .. سيدا) الأستاد كله بتهز ، هسي الظاهرة دي يقولوها كيف في التشجيع ، أعملوا لينا بروفة ونجرب ، عملوا البروفة وفشلت التجربة .
الغريبة ناس المريخ جارين وراء لقب ( سيدا) ، مع إنه هيثم عنده لقب أكثر عراقة وقوة هو لقب (البرنس) ، مرات بتذكروهو لما يكتبوا عن الملك فيصل يقوموا يكتبوا الأمير هيثم ، لاحظ الأمير ما (البرنس) ، الظاهر عندهم عقدة من الكلمة وبيني وبينكم كتيرة ( سيدا) و (البرنس) يعني اللاعب المخضرم السابق بألقابه .
وجاء يوم اللاعبين ( المقرشين) وهي زي ماكتبت قبله كده كلمة دارجة مشتقة من كلمة ( قراش) ، تابعت تفاصيل إحتفال السبت وفتشت لي لقب الظاهرة جريدة ، جريدة ، صفحة ، صفحة ، سطر ، سطر ، كلمة ، كلمة ، مالقيت .
الظاهر الظاهرة إختفت ، عناوين الصحف بمافيها الصحف الظاهرة كتبت ( سيدا) ، وهتاف الجماهير يوم الإحتفال كان (سيدا ..سيدا .. سيدا) ، ودي الظاهرة الظاهر عصام الحاج ماقادر يستوعبها .
الظاهرة كانت في حاجات كتيرة في الإحتفال ، أول ظاهرة حكاية إنه هيثم لاعب جديد مع إنه قديم ومن أكل الكسرة ماشوية ، مقبولة نقول محمد موسي القادم من أهلي الخرطوم لاعب جديد ، لكن مامقبولة نقول زميل مدير الكرة محمد موسي والمدرب العام خالد أحمد المصطفي لاعب جديد .
ظاهرة تانية في الإحتفال ظهرت في فقرة التكريم ، لما كرم الدكتور كمال عبدالوهاب هيثم مصطفي ، بإعتباره نجم قادم ليكتب إسمه بأحرف من نور في تاريخ المريخ ، مع إنه نجم قدييييييم في تاريخ الهلال (17 سنة) خدمة ، كمال عبدالوهاب مالعبها ، دي الظاهرة ، وده الظاهر عصام الحاج ماقادر يستوعبوا ، إنه هيثم ماحايكتب تاريخ في المريخ .
hassan faroog [hassanfaroog@hotmail.com]
