أصل الحكاية
قال ليك ( الربة) عجاجتها فوق ، الخرتوم مانامت ، سألنا الحاصل شنو؟ قالوا الهلال إتغلب وطار من نصف النهائي الأفريقي ، فريق طار الفرحان منو؟ مفروض نقول المات منو بدل العرس منو؟ مراسلين الفضائيات والوكالات إحتاروا يعملوا شنو؟ يغطوا فرح الهزيمة ولا حزن الهزيمة ماعرفو ، سألت الزميل العزيز سامر عمرابي مراسل الجزيرة الرياضية ، إشتغلوا علي فضايحنا دي ، خلوا العالم يعرف إنه هزيمتنا ما في الملعب بس وفي الشارع كمان هزيمة وفضيحة بجلاجل ، المريخ غادر جمهور الهلال طلع الشارع ( وتيت تيت تيت رقيص وغناء وهتافات) ، الهلال غادر جمهور المريخ طلع الشارع ( وتيت تيت تيت رقيص وغناء وهتافات) .
أفضحوهم ياناس الوكالات والفضائيات ، أكشفوهم ياناس المنتديات والمواقع ، وسموهم ديل ديل جمهور الهلال ( الفرحان) وديل جمهور المريخ ( الطربان) ، وثقوا للتاريخ اكبر سقوط جماهيري في العالم ، قابلوهم في مظاهرات الفرح والشماتة ، إستطلعوهم وأسالوهم وصورهم ، معانا منو؟ عادل اللمين ، احكي لينا ياعادل عن شعورك والهلال مغلوب و طلع من الكنفدرالية الأفريقية ، أقول ليك حاجة أنا فرحان شديد ومبسوط بسطة لي سنين ماإنبسطت زي البسطة دي ، اقول ليك حاجة بحليفتها والله لو المريخ شال الكاس انا مابفرح زي الفرحة دي .
معانا منو؟ حمدان علي ، أحكي لينا ياحمدان عن شعورك والمريخ إتغلب وطلع من الكنفدرالية الأفريقية؟ يازووووووول ده كلامك ، ده شعور مابتوصف عديل كده ، اقول ليك حاجة الكورة كلها لابت الجماعة دايرين قون واحد بس ، وانا اقول ياالله ياالله ، الحكم قال (جيييييييييت) صفر النهاية التقول الهلال شال الكاس وصلت الزلط كيف ماعارف .
وكان للزغاريد مكان بارز المشاهدين الأعزاء في أيام فرح الهزيمة السوداني معانا منو ؟ أمينة العاقب ، شعورك ياأمينة؟ فرحانة طبعا مبسوطة خالص خالص ، ده يوم منتظراهو من بدري ، يعني هم لو شالو الكاس نحن نمشي وين مانخلي ليهم البلد بس ، فشوا غينتي ( اييييييييييييييييوي) .
ده جمهورنا ، وده فهموا ، ودي نظرتوا للكورة جمهور مابشبه باقي الجماهير الفي الدنيا ، جمهور غريب وعجيب ، بشجع عشان يشمت ده الأساسي عنده ، مركز مع الفريق الخصم أكتر من تركيزه مع فريقه ، لو ناس الفضائيات والوكالات فضحوهو أجزم إنه سيجذب السياح ، ونضمن وجود أعداد كبيرة من السياح أثناء الموسم الكروي ، لمراقبة هذه الحالة النادرة في التشيجع ، وهي فرصة للباحثين وطلبة الجامعات لإجراء دراسات علمية عن الأسباب التي تجعل جماهير تفرح وتنتشي لهزيمة فريق ، وتخرج في مظاهرات إحتفالا بذلك .
هل لغياب الوعي دور ؟ هل تلعب الأمية دور ايضا؟ هل هو الفراغ ناس ماعندها شغلة ؟ هل هو نوع التنفيس في (خنقة) الناس عايزه ليها طريقة تطلع بيها الشارع ؟ أبحثوا فتشوا دي حالة ممكن يتعمل فيها ماجستير ودكتوراة ، مظاهرات فرح الهزيمة أكدت حاجة إنه نحن مافاشلين في الكورة بس ، فشلنا الأكبر في التشجيع ، ويبقي دور المراسلين في الفضائيات والوكالات وحتي في إعلامنا المقرؤ والمسموع والمشاهد فضح هذه الظاهرة القبيحة .. بلا خيبة.
hassan faroog [hassanfaroog@hotmail.com]
