ركن نقاش
** حذرت وزارة الصحة الاتحادية (قبل فترة) من انتشار المخدرات بارقام فلكية مهولة ونبهت الى خطورة الارقام (لم تكشف عنها) المتداولة عن نسبة الادمان على المجتمع السوداني..
الايس راس جبل جليد المخدرات:
** موضوع الايس (يعني المخدر الخطير) والانتشار الخطير البقا حاصل…فالايس مخدر الجرام بتاعو بي ١٦ الف جنيه سوداني..واذا انت الان بتسمع في الفيديو دا وللان ما متعاطي الايس وما جربتو قبل كدا فانت واحد من اكثر الناس المحظوظين في الحياة… فاذا انت ما متعاطي وما بتعرف عن الايس وما جربتو قبل كدا فانت واحد يعني من المحظوظين جدا جدا جدا في الحياة..ماتحاول تجرب الايس لاي سبب من الاسباب فاستمر على هذا المنوال…لانو حتموت حتموت….الايس من خطورتو من اول مرة ح تخش في حالة بتاعة ادمان…ما زي باقي المخدرات تجرب مرة ومرتين لامن جسمك يحتاج الحاجة دي.. لا – من اول مرة ح تدمن…الغريب في الموضوع دا انو الايس ما حاجة مدسية او ما شي بيتباع في الخفاء كدا.. لا الايس تجارتو على عينك يا تاجر…بمعنى شنو بمعنى الموصوع دا متوفر بصورة ما تتصورا…يعني ما تقول لي انو بيتباع خوفا من البوليس او البوليس ما قادر يصل للتجار ديل…دا حنك ساهي والله دا حنك ساهي…انا جرجس دا عندي تجربا في شارع النيل دا انا اشغالي سبعين في المية في شارع النيل (دا من غير خوض في التفاصيل)…شارع النيل دا بيتباع الموضوع دا في اكشاك السجاير على عينك يبيعو ليك في علب كواليتي استريم فيها البنقو فيها التراما فيها الاف فايف…. بيختو ليك الايس دا في العلبة زي علبة العيد بيقولو ليك اتفضل داير شنو من الحاجات دي؟؟..فيا شفاتي وشفاتية ح تصل لي مرحلة ح تبيع كلوة امك عشان تشتري جرام من الايس…الموضوع ما هظار الموضوع دا حقيقي…والسلطات عارفه..والله ما في زول يجي يقول لي السلطات ما عارفا وقسما بالله اذا السلطات ما عارفا الايس دا بيتباع وين وانا كجرجس الابوي ميت المسكين الماشي يتيم دا عارف يجو يشغلوني في المباحث يشغلوني وش كدا رئيس مباحث اوريهم شايف الكشك داك بتاع ايس وبتاعة الشاي ديك بتاعة ايس فما ممكن انا جرجس دا اكون عارف والسلطات ما تكون عارفا الموضوع دا بتباع وين..والله الموضوع دا خطر خطر..هيي يا سلطات امشو شوفو الايس دا بتباع وين امشو اقبضو الناس ديل واخفوهم …وانتهو من القصة دي..(المصدر: فيديو متداول في الواتساب)
الانقاذ والمخدرات:
** من اكثر الاشياء التي ادهشتني واثارت حيرتي كضابط مباحث ان كل ضبطيات المخدرات التي حدثت خلال الخمس سنوات الماضية رغم خطورتها لم تجد حظها من العمل الجنائي والبحثي المطلوب وصولا للمتهمين الرئيسيين الذين يقفون خلفها حيث كانت البلاغات تنتهي بتقييدها ضد مجهول او الاكتفاء بالقبض على متهمين لهم ادوار هامشية دون بزل المجهود الكافي للتوصل للجناة الحقيقيين..ولكن كانت لدي قناعات شخصية بان الامر يقف خلفه نافذين ومتنفذين من الدولة العميقة الفاسدة التي ضربت جذور كل مناحي الحياة المدنية..
وساتناول “حادث” من اشهر ضبطيات المخدرات وبيان مدى الفساد الذي وصلت اليه البلاد في عهد الظلم والاستبداد والمحسوبية
بتاريخ الثالث من ابريل ٢٠١٩م تمكنت قوة من شرطة المباحث من ضبط حاوية محملة بالمخدرات فى مدينة عطبرة وبالتحري تم التوصل لمستودع بالخرطوم وتم العثور على (15) طناً من الحشيش، مكون من (74) قطعة، معد للتوزيع داخل (1541) شنطة داخل ثلاث كونتينرات وتم القبض على المتهمين وعددهم اربعة ثلاثة سوريين والرابع من جنوب السودان ودون في مواجهتهم البلاغ رقم ” 4″ لسنة 2019م تحت المادة 17 من قانون المخدرات والمؤثرات العقلية المتعلقة ” بالتعامل مع عصابات دولية فى تهريب المخدرات.. (وتعد هذه الكمية من اكبر الضبطيات بالقارة الافريقية والاسيوية على الاطلاق) وقد اعترف المتهمون بادخال خمس شحنات مخدرات من المناطق المسيطر عليها حزب الله بلبنان خلال ثلاث السنوات الماضية بطائرات شحن عبر الجهة الانقاذية المتنفذة..
باعتبارها الوسيلة المستخدمة في ادخال المخدرات وأصدر وكيل نيابة التحقيقات الجنائيه أوامر قبض في مواجهة (قيادات الجهة المتنفذة) بإعتبارهم المشرفين علي شحنات المخدرات بإستغلال نفوذهم ولكن قوبلت هذه الأوامر بالعراقيل ووضع التروس أمامها بدأت بنقل وكيل النيابه من مكانه وسعى في ذلك مدير الجهة الانقاذية المتنفذة
في عهد النظام البائد..سوريون ينتمون الى تنظيم دولي للاتجار بالمخدرات يسمحون لهم بالدخول للسودان !! ويمنحونهم الجواز السوداني!! ويسمحون لهم بالمرور من خلال (جهة سيادية انقاذية مننفذة) هذا هو مشروعهم الحضاري لايهم ان يصبح كل ابناء السودان مدمني مخدرات فالمهم هو ان يحكموا اطول فترة وان يكنزوا اكبر قدر من المال..بربك هل هنالك فساد بكل العالم اكبر من فساد هولاء؟؟..(الدولة العميقة الفاسدة وعلاقتها بالمخدرات (الحلقة الثانية) من مذكرات ضابط شرطة مارس2020)
البرهان يسابق فوحان وفحيح المخدرات:
** أعلن رئيس مجلس السيادة الانتقالي الفريق أول ركن عبدالفتاح البرهان انطلاق الحملة القومية لمكافحة المخدرات.
** ومن الغرابة وما يرفع حاجب الدهشة ان يقول البرهان: “أن جهات ظلت تعمل على انتشار المخدرات عن طريق دعمها لبعض المجموعات الشبابية تحت ستار دعم الديمقراطية وأنشطة مختلفة”..وهو يعلم ان المخدرات تم توطينها وانتشارها منذ النظام الانقاذي المباد!!..
** نحن نطالب وزير الداخلية ان يكشف عن جميع الضبطيات التي حدثت ابان عهد النظام االانقاذي المباد ومن كان وراءها وماذا تم من احكام رادعة في حقهم ولماذا تباع المخدرات الان في شارع النيل “على عينك يا تاجر” كما هي شهادة الشاهد المرفقة؟؟!!..
eisay1947@gmail.com
