اصل الحكاية
أول إجابة لصلاح إدريس عن سؤاله المضحك ( الحاكمنا منو الحكومة ولا الفيفا؟) جات من مجموعة التغيير التي يقودها الدكتور كمال شداد ، المجموعة أكدت علي أنها ستلجأ للفيفا ، ليه ياصلاح ؟ قالوا لأنه الفساد تفشي في الاتحاد العام ، وإنه بعض قيادات الاتحاد تجاوزوا نصوص لائحة الاخلاقيات الصادرة من الاتحاد الدولي ( شركات يملكونها تستفيد من وجودهم في قيادة الاتحاد) ، بجانب وضع المفوضية الاتحادية وإشرافها علي الانتخابات ، وهي ذات المفوضية التي ألغت وجودها الفيفا في الانتخابات السابقة ، وحددت للإتحاد العام إلغاء هذا الجسم الحكومي مع الأجسام الاخري ، عارف ياصلاح موضوع المفوضية فقط وإشرافها مرة أخري علي الانتخابات يمكن أن يفتح علي الكرة السودانية نيران مدمرة من الفيفا .
وهنا مفروض تسأل نفسك سؤال ياعم صلاح ليه شداد ومجموعته مشوا الفيفا ، ومامشوا للوزير ، خاصة إنه الامر عنده علاقة بتفشي الفساد داخل الاتحاد وتجاوز صريح وخطير للوائح الاتحاد الدولي ، وأرجع لسؤالك المخجل الوارد أمس في هذه المساحة وانت نشرته في زاويتك ، سؤالك كان ( ياجمااااااااااعة كلمونا فهمونا ، نحن حاكمنا البشير ولا حاكمانا الفيفا وود البرير) إنتهي ، إنشاءالله تكون فهمت الحاكمنا منو؟ وممكن تكون مافهمت وده مافيهو دهشة ، أديك مثال تاني يوضح ليك الصورة أكتر ، الفيفا لما إتدخلت في الانتخابات السابقة للاتحاد العام وألغت دور المفوضية وأشرفت بنفسها علي الانتخابات ، وين كانت الحكومة ؟ وين كان الوزير؟ ليه ماإتدخلوا وطردوا الفيفا وقالوا ليها نحن عندنا مفوضية كوناها بقانون حقنا وهي الحاتشرف علي الانتخابات ، ونرفض تدخل أي جهات خارجية في الشأن الداخلي ؟ ليه مش هم الحاكمين ؟ عارف ليه لأنه رغم تدخلاتهم السياسية عارفين أحسن منك وإنت الزول العامل عارف وماعارف اي حاجة ، الحكومة وافقت لانه الفيفا تملك حق التدخل ، ولو منعوها من دخول السودان والاشراف علي الانتخابات الكورة إنتهت تاني مافي لعب إلا دافوري جوه السودان ، عرفت الحاكمنا منو ولا لسه يا عم صلاح ، لو لسه الوضع بكون صعب لانه بكون عايز فهامة ودي قصة طويلة ، اوقعها ليك براحة يمكن تفهم دخول الفيفا وابتعاد الوزارة والوزير والمفوضية ، لاحظ إبتعاد مش إبعاد يعني بإرادتهم ده معناه ياصلاح إنه الفيفا هي البتحكم مش الحكومة .
ماعارف ليه عندي إحساس إنك لسه مافهمت وهي مشكلة لكن الواحد مجبور يشرح أكتر خاصة وإنك كنت رئيس نادي كبير ، والبشرح ليك فيهو ده منهج ( الروضة) في كرة القدم .
اقرب ليك أكتر ، ليه ماشين بعيد ، قبل كده الوزير الاتحادي يوسف وقف دكتور شداد ثلاثة شهور ومنعه من السفر ، الفيفا إتدخل وهددت بمنع السودان من المشاركات الخارجية ، وتاني يوم شداد سافر ، والوزير قراره راح شمار في مرقة ، في رايك بعد ده كله الحاكمنا منو ؟ ماعارف لكن برضه شكلك مافهمت ، مع إنك فهمك صعب لكن مامشكلة أبسطها ليك أكتر ، أنت ذاتك قبل كده الاتحاد العام برئاسة شداد وقفك ومنعك رئاسة بعثات الفريق وقتها ، ورسل للإتحاد الافريقي بهذا الخصوص والافريقي والاتحاد العام خاطبوا الاتحادات في المغرب ويوغندا ، وخاطب ايضا الاتحاد العربي كتابة بقرار ايقافك ، وإنت ياصلاح رضخت غصبا عنك ولم تتراس البعثات ،ليه رضحت غصبا عنك الحاكمك منو؟ بعد ده كله لو ماعرفت الحكمن منو ، تبقي مشكلتك مشكلة ، لأنه حا أسألك طوالي واحد زايد يساوي كم؟
hassan faroog [hassanfaroog@gmail.com]
/////////
