اتصلت على تلفونياً عصر اليوم موظفة الاستقبال في عيادة طبيب العايلةGP لتعلن لي انني محبوس من لحظة حكيها معاي ولمدة اسبوعين ومن غير ما اشعر حسّيت ليك بالقليب العجوز حقنا اسوي التح التح زي مابتقول فلانة الفلتكانية ديك الله يطراها بالخير وقال كدى زولكم اب راصاً مدوقس (بدلع في روحي براي) انعدلت للبنية في التلفون وهاك ياداك (سعال) المعنى سعال وجواب لكن من نوع سعالات الخوفة والخلعه البتخليك مربوش وتكضب على رقبتك وتعمل فيها ابو العناتر وانت جوه ماسكاك ام هلا هلا تاني حابت ليها كلاماً اعوج وزي الرطانه اسي ام هلا هلا دي جبتها من وين؟ جماعتنا في الضهاري بقولو : الخواف ربّ عياله والمثل ده على فكرة في غاية الذكاء والحكمة وكان مغالتني اسعلو المرضعات..وبعد الطرطشه دي وخوف اولاد العرب ده نرجع لحكوتنا، انا:يعني ما امرق؟ وجاني اول امر وحاسم قوي على قول جيرانا ناس بمبه كشر (no way Mr Yousif) وكمان ديل خواجات معاهن لولوه ولا لف ودوران بتلعب انت ولا بتلعب..
واردفت (حلوه اردفت) وحاتكم اردفت دي نطت زي قطعة الشيطان) طيب اسوي شنو لى اكلي وشرابي..
I said no way
وبقلبي الماكن والقلب الماكن في عرفنا يعنى خوافاً مرعى بالمناسبه مرعى دي يعني شنو؟ قمت رديت على الزوله دي وقلتلا ( هنا نطّ العوض الجلف الجواي متربي الترع والكنار) التسد نيتك يامره..بعلت اوامرها واهو بديت انفذ فدحين اصبروا علينا باقي حا نفلقكم بالكلام الكتير ..
وبعدين مع المصيبة الحدفت عليك يا ود امي ام مريوم (بتنا اماندا من كووول لهجتنا بس عاجبها تعبير ياود امي) اماندا لو رخت اضانها زين بتسمع من حميديها ولض امي وتلك لهجه لاهل بلاد غرب السودان وهم قوم ضرب جدودهم الخيام في فيافي ربوع كردفان وسهول دارفور وظعنوا وظعنت معهم حضارة عريقة سادت في تلك المناطق واثرت وتاثرت بمن حولها ووجد فيهم الاباله والبقاره والخرافة والقليل من الرباطة والجن جا وييد قطاع الطرق الذين حالفهم الحظ وصاروا حكام لاعرق دوله يقال بانها مهد لاول حضارة انسانية..
ماعلينا فيما يفعله قليل الشغله وزعيم الغفله ومكشوف الرباط والمدعو حميدتي ذاك الغافل والذي لايعرف الفرق مابين القانون والغانون وبقت على اهلي حكاية السفيه النبذ الباشا فقد حكم عليهم القدر ان يبدلهم بسيئ لاسوأ..
على غفلةً مني وجدتني اتذكر كلام اخواتي وحنّيتهن لمن تحصل حاجة زي الزرّة دي فالواحده تقوم تكشحك بى بتاسف وهي تقصد به التعاطف (سجم خشمك وسجم رمادك) الغريبة انه السجم والرماد ديل تيمان ومن بطن واحدة لكنها عبقرية اهلي البقول ليك قوم اقيف وشايل السوق..
اهاااا قوم يا انا (دي بتعجبني شديد عند صلاح السعدني في مسلسل ليالي الحلمية) نفذت اوامر ناس الصحة وسوف اكتب لكم من مخبائي اقصد محبسي بشكل يومي فالحبس حبس والوحده حاره وانا زول قلبي معلق برجلي لكن للظروف احكام..
على فكره في نيتي ان اعمل برنامج اشغل به نفسي حتى لا اشعر بالملل وَيَا بختك يامحبس اتهنى بى فانا اصبحت ملك يمينك وماعندي غير السمع والطاعة بس بالله يامحبس خليك حنين معانا فانا في حواك…
نلتقي،،اتمنوا لي حبس طيب..
مع حبي الذي تعرفونه..
زولكم المحبوس غصب عنه
عثمان يوسف خليل
osmanyousif1@icloud.com
/////////////////////////
